ايجي وقت في ساعة صفاء نحكيلك
ما انضايقك تربح او شد رحيلك
نا عارفك ظالمني
و ما اتريد تسمعني و لا اتكلمني
لو جابك حنين او جيت ما تحرمني
خليني انفضفض مالزعل نشكيلك
انت بالخيـــــــانه و الجفاء تاهمني
راه الظلم مردوده عشم يا ويلك
ايجي وقت في ساعة صفاء نحكيلك
توه امسامحك تربح او شد رحيلك
#عبدالله_المعيوف
..
..
كان وداع محمد لينا مايقلش عن لقاءه بعائلته وكانه بوداعه هذا يبين انه لقى عائلة وبيفارق عائلة ...
حتى انا وفتحي حسينا بوجع من فراقه لكن ف نفس الوقت فرحنا ان لقيناله اهله واخيرا بيرتاح وان شاء الله يرجع طبيعي او اقل شي يتكلم وبحكي ويشكي ..
ودعناه وداع حار ووعدناه نمشوله للقلعة لما نجتمعو كلنا ..
صكرت باب الشقه وخشيت بعد ماوصلناه لسيارة قعمزت ع الصالون وجا فتحي قعمز مقابلني
فتحي: اووخ الحمد لله هنينا ع واحد مزال اثنين
معاذ" باستغراب: اثنين من؟؟
فتحي: منير وانت " وابتسم بخبث"
معاذ" حذفت ع وجهه المسند وهو شده وقعد يضحك .. عصبت: ضم فمك خيرلك
فتحي: بالله عليك تو زعميتك ماتفكرش ف هداك الموضوع وهديك لعيون
معاذ" بغيض: تفكيرك الخارب فكني منه بعدين كم مرة قلتلك عرض صاحبنا معش تحكي عنه
فتحي: يارب يارب قريب يبدا عرضك حتى انت
معاذ: لاحول ولاقوة الا بالله "وقفت: انوض خيرلي "رن نقالي طلعته ورديت اول ماشفت الاسم: السلام عليكم ... اهلا اهلا يونس كيف حالك وحال خوتك وعويله كلها ... شن لامور... اي الحمد لله... شن صار معاك ... ايح ... اا ... به ... به كويس... زعمه فيه امل ؟... امم .. به به المهم نقدرو نشوفوه ؟... تمام تمام الله يبارك فيك ... لا عارفك ماتقصرش .. نردهولك ف الخير.. تمام الله يسلمك "صكرت الخط"
فتحي: شن قالك
معاذ: قالي انه مزال يحاول يدور محامي شاطر لمنير يقدر يطلعه من الحبس ويطلعه براءة باش ماحد يقعد ف جرته.. وقالي ان حاليا بيحولوه لطرابلس .. لان القضيه جرمتين .. و قال لو تحول هنا بتسهل عليه ويقدر يساعده .. لكن الخوف من انه يتحول لبنغازي غادي معش نقدرو نديروله شي
فتحي : ياودي بنغازي قالو نظام غادي ودبس لو تحول غادي معش نحلمو نطلعوه بكل
معاذ: ان شاء الله يصير منه الكلام ويتحول هنا اقل شي نقدرو نشوفوه بين فترة وفترة نطمنو عنه ونطمنو حتى عويلته
فتحي: عويلته اممم
معاذ" شفتله بغيض: نمشي خير مانرتكب جريمه
"مشيت وانا نسمع فيه يضحك وقفت قدام باب الشقه وعليت صوتي: هالكشخه تصكرها خيرلك .. وبعدين دير هاتف راه موصلين كلام للعويله ومنبهين عليهم يقولولك اشري نقال واتصل بيهم "نقصد اخته"
