بياض لحيتي يعكس سنين علايــــــــــــل
وميلة الوقت وانا أسماي المايــــــــــــل
..
...
ادهمت فتحي ورقينا للجبــــل
فتحي:، ماشاء الله ماشاء الله منظر الجبل مليح بكل..
معاذ: اييي بدات كان وصلت غادي تلقى المناظر مليحه تقول معش بنروح
فتحي: به تو انتم علاش جيتو لطرابلس كاني من زيكم نقعد ف الجبل خير
معاذ: عشنا ف الزنتان غير بعدها حولو عمامي لان خدمتهم ف طرابلس وبدينا نمشو زيارات غادي وبعدها حوشنا عرضناه للكرا وقلت مشاويرنا غادي الا لضرورة
فتحي: خلاص لزوهم وعطوني الحوش نكريه كرهتها طرابلس الحق زحمه ودوشه
معاذ: ههه تحسابنا عايشين ف صحراء راه نفس الشي مدينه وزحمه وحوشنا ف السيمافرو
فتحي : ووك به نبي مكان هادي ومريح
معاذ: ههه قلتلك بس يطلع منير نمشو للحماده غير جوك
فتحي: حماده ماحماده مش شوري كانها صحراء خالية زي يلي كنا محبوسين فيها
معاذ: هههه احرف
فتحي: ياودي الشقه مليحه امالا ماتشكي من شي
.. كلمنا هدرزه ونسيت زعلي منه اصلا من يقدر يزعل من فتحي هكا سبحان الله باسلوبه يجدبك ليه وقلبه الطيب يخليك تعفو عن اخطاءه
وصلنا للقلعة فعلا مناظر الجبل لا تعادلها مناظر حلوة ومميزه ... استقبلنا خو محمد اوس بعد ماعظمنا لاجر ليه واتجه بينا لحوشهم يلي كان فيه مكان مخصص للعزاء وقاللنا ان محمد قصدي سيفاو راقد .. بعد ماسلمنا ع الحضور يلي كان سلامهم حار لينا قعمزنا
فتحي" مقعمز جنبي قرب مني وهمس : اسمع نقولك فوت عيون المها وخودلك وحده امازيغية شوف شوف كيف شبابهم سمحين امالا نسونهم كيف
معاذ" بغيض: بالله اشقى بعمرك مادخلكش بيا راك اكبر مني ب4سنين وقريب اطق الاربعين بتخش سن اليأس
فتحي: لما نفوت سن الياس ونخش لشيخوخه نتزوج وحده صغيرة نجدد بيها شبابي ههههه
معاذ: لاحول ولا قوة الا بالله ربي تبت علينا العقل
فتحي: تعلم تعلم الامازيغية تستفاد بيها ف المستقبل راه تقعد تسب فيك وانت تهز ف راسك تحسابها تتغزل بيك هههه
معاذ: ضم فمك ضمك وصكر هالكشخه رانا ف عزاء
اوس" قعمز جنبي: سامحونا جبناكم ع عجله غير حال سيفاو واجعنا معش عرفناله حل
معاذ:، ان شاء الله بس ينوض تو نشوفوه
فتحي: شن حاله هو بعد روحلكم
اوس: والله من لما روح حاله باه صح مايتكلمش هلبا لكن يشارك مرة مرة لما ندكرو الذكريات اما ايام الحبس ماحكاش عنهم بس كان يذكر ف اسماؤكم بس معاذ وفتحي وفرج ومنير وسالم ويقول عمي مفتاح
