اللهم اختر لي الافضل في كل امور حيــــــاتي ثم ارضني باختيــــــارك.
فتحي" بصدمه: تي وين تقع هذه بسم الله شورنا ياراجل ف تشاد رسمي
معاذ: به وين هذه شرق ولا غرب ولا وين
ضيف الله: ماا نعرف
فتحي: تي فهمني تو احنا ف ليبيا ولا وين
ضيف الله: اه ليبيا
فتحي: عمري ماسمعت بمدينه اسمها تراكن بكل
معاذ: تي بالك قصده تراغن
ضيف الله: آ آ تراكن
فتحي: تي ع اساس عارفها وين هذه غير فهمني وين تقع تراكن ولا تراغن هذه راه حصص الجغرافيا كنت نهرب منهم زمان
معاذ: هههه ف الجنوب كاني مش غالط هكا جيهه سبها ، باه قولي ياضيف الله المدينه بعيده من هنا
ضيف الله : آ مسافه
فتحي: باه صاحب هالرزق يجي امتى
ضيف الله: اليوم مر ويقعد يومين ثلاث ويعاود
فتحي: ايح عاد معناها مطولين هنا
معاذ: ماعندنا مانديرو ياراجل بنستنو
" قعدنا نهدرزو وماجبناش سيرة ان كنا مأسرين ولا هو مسكين سألنا شي وكان مهدود حيله ولا هو متعود يرقد بكري اتكى رقد طول ورقد فتحي وقعدت انا مقعمز برى ع النار ونخمم ف الجاي كيف بيكون
.
.
ف الصبح نضنا بكري ع صوت الكلاب والحمير حشاكم والسعي ولقينا ضيف الله موتي الشاهي والفطور وبيسقد يسرح
اصريت نمشي معاه نعاونه بما ان ماعندي ماندير ومافيش كيف نمشو للمدينه يلي قال انها تبعدنا ب مسافه طويله وخلينا فتحي يلي قال تعبان ومش ماشي
شديته ع تركينه ونوصي فيه: رد بالك ع روحك مرات لتو قاعدين يدورو علينا ولا تعال امشى معانا
فتحي: ياراحل ماعندي خلوق اخرها نبدا سارح سعي
معاذ: عيب ياراجل شن الخدمه عيب هاهو مالقينا غير هالسارح يلي هازي ع خدمته يساعدنا لولاه راه متنا جيف
فتحي: يارب سامحني مش قصدي هزوة ولا شي .. والله صدقت هاهو طلع خير من اولاد بلادنا يلي رينا الويل والعذاب من تحت ايديهم
معاذ: المهم رد بالك ع روحك وانتبه زين
فتحي: كون هاني
مشيت لضيف الله وقعدت نساعد فيه ونحوش معاه ف الغنم وانا نذكر ف بويا يلي كان عنده غنم ويحبها ويقول هذه ورثه جدودي مانتخلاش عنها ... فوتت وقتي كله وانا نستغفر ونقرأ ف القرآن الله يبارك فيه منير يلي عودنا هالعادة وان كل ماتبدا فاضي اشغل نفسك بالاستغفار وقرأءة القرأن
وان شاء الله يكون بس بخير ونجى منهم هو ومحمد.. كان يعلم فينا كيف نحافظو ع الاذكار والاستغفار باش ربي يقوي عزمنا ويعاونا ...
