غرغرينــــــــــــة
هناك هم متمكن و فايت فينا
يبي بتــــــــــــر
كيفا كيف غرغرينــــــــــــة
..
...
ليلة مرواح بوي كانت من اروع الليالي يلي نقضيها من يوم روحت
بدات بعد ماشفت وجهه ناير رغم المرض يلي فيه
قالي عبدالمعز انه ماقدرش يبلغه بكري بروحي لين مهدله بالشوي ولان الدكاترة يقولو ان مريض السرطان اي صدمه او حزن قوي يأثر عليه كذلك صدمة الفرح ثاثر عليه سلبا
ف اطر يمهدهاله لمده ايام
وسالته علاش ماقدرش يتصل اقل شي قال انه ديما مع بوي ومايبيهش يحس .. وقال انه ماقدرش يتصل جتى بالدرقه عليه لانه متاكد لو اتصل بيا معش يصبر لين يروحو وبيقطع العلاج ويروح
كمية الشعور الحلو يلي حسيته يوم قالها ماينوصفش
معز كنا انا واياه متقاربين هلبا بحكم قربه السنين ..
.
.
.
وتأجلت مشيتنا بعد مرواح بوي وعبدالمعز ولانه كان تاعب من جرعات الكيماوي يلي ياخد فيهم اطريت نقعد ومانمشيش لاهل اصحابي ..
وحلفت لفتحي يقعد معايا لين نمشو جميع ..
وتحشم حتى من بوي لما حلفله يقعد ..
ولكن اصر ندوروله عمل يفوت فيه وقته ومايابيش يضايقنا طول نهار ف الحوش ..
تفكرت ايوب ولد عمي عنده محل وطلبت منه يخلي فتحي يشد مع العامل يلي فيه ويشرف ع تنزيل لبضاعة وع طول وافق
وبدا فتحي يمشي من القايله للعشاء يروح
وكنت نفقد فيه هلبا بدات ان كنا 24ساعة مع بعض ف الحبس .. وحسيت بفراغ وكنت حتى انا نبي ندور عمل ولا اي شي نفوت بيه الكساد .. لكن طلعلنا موضوع جديد خلاني مشغول فيه
.
.
قصة اني ميت وف السجل المدني نازل اسمي من الموتى ف لازم ندير اجراءات ونثبتلهم اني عايش
ف قعدنا من مركز الشرطة للمحكمه للقاضي .. لجلسات الحكم
تو الاغلب يسال والراجل المدفون باسمي شن صار فيه
قدمت المحكمة امر لشرطة المحلية انها تنبش القبر وادير دليل DNI للجثه المدفونة ويرجعوها مكانها .. ويسجلو المعلومات ودرت انا كذلك التحليل باش نثبت للمحكمه ان المدفون لا يقرب للعائلة ..
وقعدنا من مكان لمكان ومن مركز لمركز و قضايا طولت باش اثبتت اني عايش
ورجع اسمي للحياة بعد ماكان مدفون مع شخص ثاني
..
..
الموضوع خدا منا شهر وهذا غير عند ايوب واسطات كان هذا طولت لشهور باش قدرت نثبت اني حي
.
.
ف يوم بعد لعشاء قعدت نشوف لساعة
طول فتحي ماجاش وانا مشغول عليه قبل كان يجي طول لجامع ونتلاقو يصلو ونروحو جميع واليوم ماجاش ..
خشيت لدار لقيت خواتي مقعمزين وكل وحده شادة هاتف وتمنخص : واك كم مرة قلت اقلعو هالكسير من ايديكم تو انتم تجو باش تقعمزو عليه وعيونكم فيه
