ريت عيون ماهن كي عيونڪ
ابداع الله كي ريم الغزال
بسواد الكحل مرسومه جفونڪ
واخد سير كي خط الهلال
وريت جيوش ما تابا تخونڪ
ارتال هدوبك ماتعرف خبال
وفيك جمال ياربي يصون
وياما ريت كي وصفك قلال
صغيرة سن ياسمحه في لونڪ
مضفور راسك علي ظهرك انهال
قمر ونور مأسر في سجونڪ
وعندك قلب معبى بالدلال
ولو يرضيك نا نبقى حنونڪ
ونكون غلاك ماهو في الخيال
انصون الحب مانخيب ظنونڪ
وفينا وصف لأولاد الهلال
منقول
مشيت ورى فتحي ولحقت فيه وقعدت نمشي جنبه وهو ساكت قعدنا نتمشو فترة طويلة بعدها مشينا وقفنا تاكسي وقلتله يرفعنا للبحر ...
وقفت ف محل خديت حاجات ناكلوهم وركبت ووصلنا للشاطي
ونزلنا وقعمزنا نتفرجو عليه والموج كيف يضرب بقوة وقتها كان الجو ريح كيف خاشين شهر3 ...
مديتله شن ياكل وانا ساكت مانبيش نزعجه بشي واضح انه مش قادر يتكلم ...
قعدنا ناكلو بهدوء عكس الضجيج يلي داخل روسنا ...
بعدها قلتله هي مدام النهار طويل خلي ندهورو ف طرابلس ..
خدينا تاكسي وقلتله يرفعنا لساحه الخضراء قعد يشوفلي بخوف وانا مستغرب خيره !!
بعدها اذكرت ان ايوب المرة يلي فاتت قاللنا اسمها ولى ساحه الشهداء
غير نتاقلمو مع الناس يلي تغيرو لين نتأقلمو مع المسميات يلي تغيرت!!
صححت معلومتي وقلتله قصدي ساحة الشهداء وقلتله كنت برى ليبيا وليا هلبا عليها باش قدر يبتسم واستراح لان كان خايف مني!! ومشينا لساحة وقعمزنا نتفرجو ع الناس وع الحمام
فتحي: تعرف كرهت الدوشه مش قادر نطيقها شورنا تعودنا ع الهدوء يلي ف الحبس حتى الكلام يادوب نتكلمو بدات السنين الاخيره ماعندنا مانقولو لا فيه اخبار جديده لاشي وكرهنا نعاودو ف الماضي امتعنا
معاذ: صح والله صدقت حتى انا بديت نحس ف راسي يصدع لما نسمع دوشه
فتحي:، امالا هي هي نوض لا نصكها عيطه هنا
معاذ: هههه هي وين تبي نمشو
فتحي: كان فيها كيف نمشو لصحراء خالية مخلية خير وخيرين
معاذ: هههه وعد غير نلتمو انا واياك وفرج ومحمد ومنير يطلع نرفعكم للحمادة شهر كامل
فتحي: هههه كان تخليهم شهرين خير
معاذ: هههه غير كانك صبرت يومين فيها مازيك حد
فتحي" بخوف: خلاص خلاص خلينا هنا خير
معاذ: هههه
خدنا تاكسي وف الطريق قلتله يتجه بينا لـــــــ بوسليم نبي نطمن ع اهل منير ونطمنهم عنه
وصلنا ونزلنا
معاذ: ما اتصلتش بخوه بلغته زعمه نتصل تو !
فتحي: ايح عادي طق عليهم صغار وين عندهم بيمشو ف هالقوايل
