إذا استطعت، قم بمساعدة الآخرين وإن لم تستطع لا تضرهم على الأقل
قرب مني محمود : هي هات ايدك بسرعة قبل يتساعى
مديت ايدي وحطها ورى كتفه وشدني وقفني ومشى بيا طالع وانا عيوني ع خالد يلي الدم ينزف منه لين طلعنا
... طلعني برى المبنى و قربني م السيارة ركبني فيها وركب جنبي وولعها
معاذ: بتخلي صاحبك ينزف
محمود" شافلي : شن تبي نرفعه معانا !!!
معاذ: بس مرات يموت هنا بروحه
محمود" حرك السيارة وضحك بهزوة: انت طبيعي !!
معاذ: اصحابي الاثنين ماتو وما اندفنوش مستحيل نرضاها لمسلم يموت ويقعد ملوح
محمود: لا تخافك وهاهو تو نحاولو ننقضوه " طلع نقاله من جيبه"
معاذ" حسيت بتعب وراحه عجيبه نزلت عليا وغمضت عيوني ونحمد في ربي يلي نجاني منهم .. فتحت عيوني بصدمه وانا نسمع ف كلام محمود
محمود: خطفته باش نبتز بيه عائلته وناخد منهم فلوس .. هههه تم يامحمد المهم اسعف خالد وراك تقوله اني انا كلمته " سكر الخط وشافلي ببتسامة "
حسيت بصدااع في راسي استغفر الله ياهارب من غولة طايح في سلال قلوب .. غمضت عيوني وتنهدت وهمست: الحمد لله ع كل حال
محمود : تحمد في ربك !!!
معاذ "وانا مازلت مغمض عيوني: الحمد لله ع كل شي مقدرلي نعيشه مهما
محمود: تتوقع عيالك كم بعطوني مقابلك
معاذ" فتحت عيوني: تتوقع انهم يصدقو اني عايش!!!
محمود: عاد انت وحظك هههه كان هذا موت خير
معاذ" ابتسمت : شورة الموت مزال مطول وبنعيش ف مغامرات جديده
محمود " ضحك بهستيرية : هههههههه والله انت واحد غريب عجيب من اي عالم طلعتلنا
معاذ: قول من اي عام ونقولك من2011
محمود " شافلي ورفع هاتفه وفتح الروشن وحذفه بعيد وهو يمشي وانا مستغرب ف تصرفه شاف القدام وتنهد: تعرف لو كان واحد غيرك والله لا صدقته ولا ساعدته لكن انت سبحان الله انسان ماقابلتش ف حياتي زيك
معاذ: يعني مصدقني اني عشت ف الحبوس م2011
محمود : مصدقك لسببنين الأول تمسكت بالصلاة رغم كل العذاب يلي تعذبته مانسيتش ولا تغافلت وتسبيحك وذكرك لله ويلي زيك مواضب ع صلاته اكيد مايكذبش
ثانيا اثار التعذيب يلي ف جسمك وظهرك واثار الكلابشات القديمه يلي ع ايديك ورجليك دليل قوي انك عشت الحبوس زمن طويل خاطي لحيتك ومظهر يلي يقول انك سنين ماشفتش حتى لمراية
معاذ" تنهدت : الحمد لله انه بعتك ليا باش تصدقني
محمود: انا يلي نحمد ربي انك حطك ف طريقي " تنهد وهو عيونه ع الطريق: عشت حياتي كلها لهو ولعب وكنت سجان نسجن ف الناس ونعذب فيهم او نبتز ف اهلهم ويعطوني فلوس .. الصلاة يوم نصلي وعشرة لا ومايهمنيش بكل .. كنت انا وخالد ومحمد مجموعه من المجرمين يلي ماخلينا اجرام مادرناهش .. بس الكبائر والقتل ربي يشهد عمري ماقتلت ولا درت حرام .. لكن كنت شاهد ع قتل هلبا ناس كبار سن وصغار ع ايدين خالد .. يلي كاره شي اسمه معمر وجماعته لان كان ف حبوسهم وشاف انواع العذاب وحتى للاسف تسببو ف عقمه هدا باش كاره اي شي يتعلق بمعمر وجماعته
