سقوك ابسحر. يقطع فالنصيب
ويقهر فيك عايش في عذاب
اعراض السحر تعطيل وسريب
وكل سريب ماشي. للخراب
اهموم وحزن متباعد غريب
وعندك هم ما عندا اسباب
علي هالناس معزول وكئيب
وحتي الفرح هو عندك سراب
جبنا شيخ وأمام وخطيب
ايشخص فيك قايل لك مصاب
ايجيك السحر ديما من القريب
اللي للذنب ماداروا احساب
ايشوفو فيك مقهور وعطيب
طلاسم سحر حطو فالشراب
امغير الله هو عالم حسيب
ايفك السحر لو تحت التراب
ولو مرشوش هو قادر ايجيب
الباطل دوم مايغلب صواب
الشافي الله والعالم ابغيب
ادعاء مظطر يرجي في جواب
.
.
الشاعر محمد العقوري
.
.
مريم: ااا
معاذ" بعصبية: تي تكلميي وين درتيها
مريم: الحق وريتها لوليد لما لقيتها قالي بلا هبال نسون سحر شن هدم صغار خواتك ديما يلقطو ويخنتبو
معاذ: باه فهميني وين حطيتيه
مريم: ااا
معاذ" بعصبية : مريم تكلمي
مريم" حكت جبتها: حذفته ف لكناسة
معاذ"حطيت ايديا ع راسي : واااك منكم هبلتو تلقو حاجه زي هده مشكوك فيها وتحذفوها
مريم: هو قالي احذفيها وانتم ديما تخنسو
معاذ: بعقلك انت تو صغار خواتك امتى يخشو لدار الضيوف وانتم ديما مصكرينها الا لو جا ضيف وبعدين قلتي تحت لبساط من فيهم يلي بيدخلها غادي
مريم: اا صح معاك حق
معاذ" بغيض: معايا حق اي تو شن الحل باه
مريم: اا ماندري هو شن سحر ولا شن حسك خوفتني
معاذ" بغيض: اي خافه خافي وهلبا تحسابيه لعب سحر وتحذفيه ف لكناسة تو وين بنلقوه بكل "مشيت عن نعصب اكثر عليها: لاحول ولاقوة الا بالله لاحول ولاقوة الا بالله
خشيت للمربوعة وقعمزت
عبدالرحمن: خيرك متغشش معش تغشش روحك بإذن الله ربي يشفيهم
معاذ: والله الا واهق الحق تو لعويلة قالولي لقو مش عارفه شن شعر وخيوط وتلول مربطات ف دار الضيوف
عبدالرحمن: به كويس هاتها نرقوها ونفكوه
معاذ: المشكلة انهم حذفوه ف لكناسة حشاك
عبدالرحمن: لاحول ولاقوة الا بالله
معاذ: تو معناها بيقعد اثر السحر وله
عبدالرحمن: الشفاء بايد الله المهم ارقو ارواحكم وديرو حجامة واستمرو ف قراءة سورة البقرة تبي عزم وبأذن الله ربي يبعد عنكم كل مكروه
معاذ: ان شاء الله ان شاء الله .. لكن يلي محيرني من مستقصدنا قصدي سحر وف دار الضيوف معناها حد يا اما من العيلة او الجيران او الاصحاب
