အဆိပ်

Part (26)

#Unicode

ပျော်ရွှင်သော အိမ်ထောင်ရေးဆိုသည်မှာ အဘယ်နည်း။ ဦးလွှမ်းထွဋ်နှင့် လက်ထပ်ပြီးစမှပင် သားသမီးသုံးယောက်မွေးပြီးသည့်ကာလပတ်လုံး နှစ်ယောက်ကြား၌ အဖုအထစ်မရှိသည့်အိမ်ထောင်ရေးမှာ သားငယ်လေး၏ ရှစ်နှစ်ပြည့်မွေးနေ့၌ ယုံကြည်မှုများ ပျက်စီးရတော့သည်။ ဤသည်ကို သားသမီးများကမသိသော်လည်း သူတို့နှစ်ဦးကြားမှာတော့ ပြဿနာကြီးတစ်ရပ်အဖြစ် ယနေ့တိုင်တည်ရှိကာ ဒေါ်ယမင်းခင်ကတော့ ဤပြဿနာအား သေသည်အထိ လျှို့ဝှက်ထားရန် စိတ်ဆုံးဖြတ်ထားပြီးဖြစ်သည်။

အတွေးနယ်ချဲ့နေစဥ်မှာပင် အနောက်မှလာသိုင်းဖက်သည့်အထိအတွေ့ကို ခံစားလိုက်ရသဖြင့် ဒေါ်ယမင်းခင်၏ အတွေးစတို့ရပ်သွားရသည်။
"မာမီ ထမင်းစားမလို့လား"
သံသာ့အမေးအဆုံး၌ တုန်ယင်သောအသံဖြင့်
"ဟုတ်တယ် သံသာ"
"နှစ်ယောက်စာတောင် ပြင်နေတာ ဘယ်သူနဲ့တူတူစားဖို့လဲ"
"သြော်... သမီးဒယ်ဒီနဲ့ပေါ့"
"ဒယ်ဒီကအပြင်ထွက်သွားပြီလေ..မာမီ"
သံသာ့စကားကြောင့် ထမင်းပြင်နေသည့် ဒေါ်ယမင်းခင်၏လက်များ တုန်ယင်လာကာ လက်ထဲမှဇွန်းလွတ်ကျသွားတော့သည်။
"သြော်... ဟုတ်လား မာမီနဲ့တူတူစားမယ်ပြောပြီးထွက်သွားတယ်ပေါ့လေ...ဒီလူကြီး ပြန်လာမှတွေ့ဦးမယ်"
ဟန်ဆောင်စကားပြောနေသော်လည်း ဒေါ်ယမင်းခင်၏အမူအယာမှာ ထိန်းမရအောင်ပင်ပျက်ယွင်းနေသည်ကို သံသာသတိထားမိလေသည်။

"ဘာလို့တုန်နေတာလဲ မာမီ...ဇွန်းတွေလည်း လွတ်ကျကုန်ပြီ"
"မာမီ နေသိပ်မကောင်းလို့ပါ"
"အဆင်ပြေရဲ့လား မာမီ"
သိုင်းဖက်ထားသောလက်များကို ဖြေလွှတ်ကာ ဒေါ်ယမင်းခင်၏နဖူးကို လက်ကလေးဖြင့်စမ်းလိုက်ပြီး
"မာမီ ကိုယ်တော့မပူဘူး... ဒေါက်တာပင့်လိုက်ရမလား ဘာဖြစ်တာလဲသိရအောင်"
"အိုကွယ် မလိုပါဘူး...ရပါတယ် အသက်တွေကြီးလာလို့ဖြစ်မှာပါ"
"စိတ်ပူတယ်လေ မာမီရဲ့... မမပန်းကိုကယ်ပေးရဦးမှာကို"
"အမလေး သံသာရယ်... ကိုယ့်အမေကိုယ်စိတ်ပူတာ မိန်းကလေးတစ်ယောက်အတွက်ကြောင့်ပါလား"
မာမီက မျက်စောင်းပစ်ရင်း ရွဲ့ကာမဲ့ကာပြောလိုက်သောကြောင့် သံသာပြုံးပြီး
"အဲ့လိုတော့လည်းမဟုတ်ပါဘူး မာမီရဲ့...ကိုယ့်အမေပဲလေ စိတ်မပူပဲနေပါ့မလား... မမပန်းကိစ္စက စကားအရသာပြောတာပါလေ"
"ဟင်း...မသိရင်ခက်မယ်...သွား လုပ်စရာရှိတာလုပ်တော့ ကုမ္ပဏီပြန်မသွားဘူးလား"
"သွားမလို့ပဲ မာမီ့ကိုရှာတာမတွေ့လို့ ခုမီးဖိုခန်းထဲရောက်လာတာ... သွားတော့မယ်နော် မာမီ ... meeting ရှိတယ်"
"ဟုတ်ပါပြီကွယ်...ဂရုစိုက်သွား သမီးလေး"
"ဟုတ်ကဲ့ မာမီ...မမပန်းကိစ္စမာမီ့ကိုအပ်တယ်နော်"
"အိုကေစိတ်ချ.. မင်္ဂလာဝတ်စုံသာ ရွေးထားချေ"
သံသာမှာ မျက်နှာလေးရှုံ့ကာဖြင့်
"အင်းပေါ့လေ...မမပန်းသာ အန္တရာယ်ကင်းမယ်ဆို သံသာ ဘာပဲလုပ်ရလုပ်ရပါလေ"