တိတ်တခိုးဝေတဲ့မြူ (တိတ္တခိုးေဝတဲ့ျမဴ)

chapter 22 (Unicode)

~~လေပြည်ညင်းတွေ တိုက်ခတ်မှ
သာယာပါတယ် ချစ်သူအပြုံး~~

~~အချိန်တိုင်းမှာ အနားရှိမှ
ပျော်ရွှင်ပါတယ် ချစ်သူအပြုံး~~

~~အိပ်မက်ထဲက ထုတ်လို့မရ
ကြင်နာသူရယ် မင်းမျက်ဝန်း~~

~~ဘယ်လိုမှကို မေ့လို့မရ
ကြင်နာသူရယ် မင်းမျက်ဝန်း~~

ထူးခြားစွာနဲ့ ဖြစ်တည်လာသော ချစ်ခြင်းတစ်ခု။
လိုအပ်ချက်တွေများလို့ ဖွင့်ပြခွင့်မရခဲ့ဘူး။

အချိန်တွေကြာခဲ့ပေမဲ့ မပြောင်းလဲခဲ့တဲ့အမှန်တရားတစ်ခု။
ရူးသွပ်စွာ လိမ်လည်ခဲ့ဖူးတယ်။

မဖြစ်နိုင်ပါဘူးဆိုတဲ့ ဘောင်တွေကြားက အတ္တတစ်ခုကပွင့်ထွက်သွားမိလို့ စိတ်မဆိုးသွားဖို့မျှော်လင့်မိပါတယ်။
နှင်းဆီနီရဲ့ရိုးရှင်းလွန်းတဲ့ အဓိပ္ပာယ်ကို သူမသိလေခဲ့ဘူး။

🥀+💧=🌹

၁၄.၁.၂၀၁၉ ။

ပြင်ဦးလွင်မြို့ အထက (၄) ၏စုံညီပွဲတော်နေ့။

ကျောင်းဝင်းတစ်ခုလုံး လူများဖြင့်စည်ကားနေသည်။အားလုံးကတက်တက်ကြွကြွနှင့် ပျော်ရွှင်ရိပ်များသမ်းနေသည်။တစ်နှစ်ပတ်လုံးကျောင်းလှုပ်ရှားမှုများတွင် ထူးချွန်သောသူများအပါအဝင် စာပေထူးချွန်ဆုများကို အခမ်းအနားဖြင့်ချီးမြှင့်သောကြောင့် ဆုရသူများ၏မျက်နှာတွင် ဂုဏ်ယူနေသည့်ပုံရိပ်များကအတိုင်းသား။မိဘများကလည်း မိမိတို့၏သားသမီးများအား ဂုဏ်ယူနေကြသည်။ဆရာမများကလည်း တပည့်များကို ပီတိပြုံးများဖြင့်ကြည့်နေကြသည်။

ဆုရကျောင်းသားများသာမက ဆုမရသည့်ကျောင်းသားများပါ လာရောက်ကြသည်။အကအဖွဲ့များက လှပစွာခြယ်သထားသည်မှာမှုန်လို့။ဝတ်စုံများကလည်း အရောင်အသွေးစုံလင်စွာ လှပနေကြသည်။မူလတန်းကလေးငယ်များက ဂါဝန်သေးသေးလေးများ၊ ဘောင်းဘီသေးသေးလေးများနှင့် လွန်စွာချစ်ဖို့ကောင်းနေသည်။

ဆရာမများကတော့ မနက်အစောကြီးကတည်းက ကျောင်းသို့လာပြီး ဧည့်ခံရေးအတွက်ပြင်ဆင်ရသည်။ကျောင်းသားတချို့ကလည်း ဝိုင်းဝန်းကူညီနေကြသည်။အစဉ်အလာအရ ကြာဆံဟင်းခါးဖြင့်ဧည့်ခံပြီး မိဘတချို့နှင့် ကျောင်းသားများက စားသောက်နေကြသည်။တချို့ကလည်း အခမ်းအနားထဲဝင်၍ ဓာတ်ပုံရိုက်နေကြသည်။