Unicode
နေသာ၍ လေလာသောနေ့လေးတစ်နေ့။ငှက်ကလေးများက ကျွတ်စီကျွတ်စီတွတ်ထိုးနေကြသည်။ဆောင်းရာသီ၏နှင်းများသည် ပတ်ဝန်းကျင်တွင်ဖုံးလွှမ်းနေကာ ပတ်ဝန်းကျင်ကဝိုးတဝါးဖြစ်နေသည်။လေအဝှေ့တွင် ခန္ဓာကိုယ်ကချမ်းစိမ့်စိမ့်။လမ်းမပေါ်တွင်လူကြီးလူငယ်များက လမ်းလျှောက်နေကြသည်။ထင်းရှူးရနံ့များဝေ့ဝဲကာ ပန်းရနံ့များလွှမ်းထုံနေသည်။နေမင်းကြီးကမိုးကုပ်စက်ဝိုင်းအရှေ့ဘက်မှ ထွက်ပေါ်လာပြီး လောကကိုအနွေးဓာတ်များဖြင့် လွှမ်းခြုံထားသည်။ကောင်းကင်မှာတော့ တိမ်များကင်းစင်ကာပြာလွင်နေသည်......ဆိုရင် ဘယ်လောက်တောင်ကောင်းလိုက်မလဲ.......ခုတော့......
ဘင်္ဂလားပင်လယ်အော်တွင် ဖြစ်ပေါ်နေသောမုန်တိုင်းကြောင့် မနက်ကတည်းကတိမ်များမည်းသဲနေသည်။ပြိုတော့မည့်မိုးကြောင့် ငှက်များကတစ်ချိုးတည်းလစ်သွားသည်မှာ အမြီးပင်ရှာမတွေ့။လမ်းမပေါ်တွင် လူမပြောနှင့်၊ ခွေးအမြီးပင်မရှိ၍ သရဲကိုပင်တစ္ဆေပြန်ခြောက်မှာစိုးရသည်။နေမင်းကလည်း အကြွေးရှင်လိုက်လို့ထွက်ပြေးနေဟန်တူသည်။ကောင်းကင်ကလည်း ပျိုဖော်ဝင်ခါစမိန်းကလေးတစ်ယောက်လို ရှက်နေသည်မှာတိမ်တွေကြား ခေါင်းမြုပ်နေသည်။ကျောင်းပိတ်ရက်ဖြစ်၍ အားလုံးကကိုယ်စီကိုယ်စီစောင်ထဲကွေးကောင်းနေချိန် သူကတော့ ..... စိတ်ထိန်း စိတ်ထိန်း ပိုင်မင်းမြတ် ... နေနှင့်အုံး ကော်ဘူးဝယ်သွားပြီး အိမ်ရောက်မှ စောင်နဲ့ခွာမရအောင်ကပ်ထားအုံးမယ်။
ပိုင်မင်းမြတ်သည် စိတ်ထဲကြုံးဝါးကာ စိုစိစိပတ်ဝန်းကျင်ကိုလျစ်လျူရှု၍ ထီးတစ်ချောင်းနှင့်ဈေးဆိုင်သို့တရွေ့ရွေ့သွားနေသည်။သူများတကာကွေးကောင်းနေချိန် ဒီကရွှေငါးလေးမှာတော့ အိမ်ကမာတာမိခင်ရွှေမျက်နှာတော်ဝင်းရေး အပြေးအလွှားဈေးသွားနေရသည်။အာ .... အရေးထဲဒီအိုနာကျိုးကန်းမိုးကတော့ .... မေမေကအိမ်မှာခေါက်ဆွဲကြော်ပေးမည်ဆိုရာ ကြာညို့ပုလင်းကုန်နေသောကြောင့် လမ်းထိပ်ကဈေးဆိုင်ကိုပြေးနေရခြင်းဖြစ်သည်။
ကွာ ...... ကြာညို့ကလည်း ဒီနေ့မှလာကုန်နေတယ်။ပိုင်မင်းမြတ်သည် ကိုးနာရီရှိနေပြီဖြစ်သော်လည်း တဝါးဝါးသမ်းနေသဖြင့် ဈေးဆိုင်ကအန်တီကြီးက ကွက်ကြည့်ကွက်ကြည့်။တကတည်း သူ့ပါးစပ်ငှားသမ်းတာကျလို့။ဈေးဆိုင်ကပြန်ထွက်လာတော့ သူ့ဆဲထားလို့လားမသိ။မိုးကအငြှိုးနှင့်ရွာပါတော့သည်။
YOU ARE READING
တိတ်တခိုးဝေတဲ့မြူ (တိတ္တခိုးေဝတဲ့ျမဴ)
Romanceသိပ်ကိုလျှို့ဝှက်တတ်တဲ့သူ့ကို 'မြူ'နဲ့တင်စားမယ် သူဆိုတဲ့ လျှို့ဝှက်တဲ့'မြူ'တွေအောက်မှာ ရုန်းမရအောင် ပိတ်မိနေတဲ့သူကတော့ကျွန်တော်ပေါ့ ...... တိတ်တခိုးဝေတဲ့မြူ Written by YoonMoonight သိပ္ကိုလၽွို႔ဝွက္တတ္တဲ့သူ႔ကို 'ျမဴ'နဲ႔တင္စားမယ္ သူဆိုတဲ့ လၽွို႔ဝွက...
