" حرّم الله كفّك الحسّاس,عن رمضى يديني "

- بارت 2 -

-يوم جديد-
صحوا و تجهزوا عشان يرجعون ل بيوتهم و يزورون وسن ، بسيارة عمر نجود تناظر الدريشه و مالها خلق احد فزت من يد جود الي حطتها ع كتفها جود بـ بهدوء : بسم الله عليك شفيك سرحانه و متضايقه صاير شيء ؟
نجود والضيقه ماليه صدرها: عرفت ليه ابوي يبي يزوجني ، زينه مرت عمي خالد مطلعه كذب ثانيه و مشوهه سمعتي عند ابوي عاد امي تقول احمدي ربك ما مد يده عليك !
جود بصدمه: وش قايله ذي بعد ؟
تكتفت ولفت عليها ونطقت بحزن : تذكرين يوم كنت اكلم فتون قبل اسبوعين بالمزرعه تخيلي شفت زينه تناظرني من بعيد و عيونها كلها شر بس ما توقعت انها بتروح لـ عمي تقول له اني اكلم عيال ، و عمي خالد اتصل على ابوي يقول له و دخل ابوي على امي يهاوش يدورني وقتها انا كنت عند فتون و اتصلت امي على فتون بس امها الي ردت وقالت اني مو عندهم طلعت صديقة زينه و زينه مكلمتها قبل تسوي كذا و قرر يزوجني .
جود ب عصبيه : وابوي طبعاً على طول صدقها ليش ما سألك طيب ؟
نجود فقدت الامل : خلاص وش اسوي لازم ارضى بالامر الواقع لان مصيرها بتطلع كذبه ثانيه عاد انتِ انتبهي منها بكرا تلفق شيء ثاني عليك.

لف عمر ب استغراب : شعندكم تتساسرون علموني
ضحكت جود:شفيك انت ملقوف ركز بالطريق بس
لف عليها عمر بصدمه : بنت ترا بنزلك هنا
فكت نجد السماعه: شفيكم تتهاوشون
جود ضربتها مع راسها : هذا الي يحط سماعته و ما يعرف وش صاير بالدنيا
رجعت السماعه ولفت ل الدريشه تفكر ب نيار و تفكر ب كلام ريلام هل صدق حبته ولا تتوهم !

-بسيارة نيار-
ريلام تحاول تسحب كلام من نيار : اي نيارو مو ناوي تتزوج؟
نيار بأنزعاج: نيارو بعينك ، بعدين شعندك تبيني اتزوج وانتِ كنتي تقولين ما راح تتزوج و بنبقى بالبيت للابد وش تغير الحين؟
ريلام بدلع فطري :هو صح ما ابيك تتزوج بس اذا كانت الي فـ بالي لا عادي راضيه تتزوج .
لف عليها وهو يضحك : ومين هي الي فـ بالك ؟
ريلام تقدمت : يمكن يمكن نجد مدري ،شرايك انت؟
تغيرت ملامح نيار و بـ مكابر : لا تكفين قليلة ادب وش ابي فيها!
نطقت  : حرام عليك والله حليله شفيك عليها؟
نيار بتغيير للموضوع : بيجي عندي ثامر اليوم ابيك تنظفين الملحق وتبخرينه تكفين. 
فهمت انه بيغير الموضوع و صدت ل الدريشه:تمام ابشر

-عند تيام -
نزل تغريده اذا يبون المتابعين بث ولا لا دخل عليه ثامر : تيام اخبارك غريبه ما بثيت اليوم؟
ضحك تيام من سؤاله : توي منزل اذا يبون ولا لا ، عاد تدري ودهم فيك شرايك تبث معي ؟
ثامر قام من عنده وهو طالع : ودي والله بس بروح عند نيار مواعده ،نشوف وقت ثاني ابث معك.
فتح جواله وشاف ان الاغلب يبون بث ف قام يجهز وضعه عشان يبث.

-بيت حسن-
وصلت سيارة نيار : يالله ريلام حبيبتي انزلي سوي الي قلته لك و انا بروح عندي شغله .
نزلت من السياره مع امها : تمام بس ترا كل شيء ب حقه لا تحسب اني بسكت !
تعالت ضحكاته : اعوذ بالله ام لسانين طيب كل شيء بحقه .
دخلت ل الداخل و فكت عبايتها و اخذت سماعاتها و رفعت شعرها عشان تروح تنظف ، دخلت ل الملحق وركبت السماعات وبدت تنظف و ترقص شوي ودخلت بـ جوها .
وبعد نص ساعه عند نيار اتصل عليه ثامر : الو نيار ترا وصلت انت موجود؟
نيار توه يتذكر انه ما قال له عن الشغله الي طلعت له و بورطه : اسمع البيت بيتك ادخل وانتظرني يا اخوي نسيت اقول لك طلعت عندي شغله.
ثامر وده يصفقه : تستهبل ليش توك تقول كان اخرت جيتي الين ما تخلص ؟
نيار بضحكه : خلاص ياخوي مسوي مستحي تراه بيت خالك ادخل بس انتظرني
سكر بوجهه ونزل يدخل لـ بيت خاله توجه لـ الملحق و وقف فـ مكانه من الصدمه يناظر الي تغني قدامه و تنظف ، كانت تغني :اختياراتي مدمره حياتي...
لفت و طاحت المكنسه من يدها و صرخت هنا استوعب وطلع من المكان ركب السياره يستوعب الي صار و تعالت ضحكاته من الصدمه ، اما عند ريلام تمنت الارض تنشق و تبلعها من الفشله و دخلت ركض ل غرفتها واتصلت على نجد عشان تقول لها .
وصل نيار وشاف ثامر بـ سيارته دق الدريشه: شفيك ما نزلت مستحي صدق ؟
ثامر تذكر الموقف وفيه الضحكه : لا شدعوه بس جاني اتصال من المدير فـ جلست اكلمه و زين انك جيت اخاف ادخل والقى احد موجود.
نزلوا و دخلوا ل الملحق و لقى كل شيء مرتب و القهوه جاهزه مثل ما قال لها ارسلها رساله "ريلام الوعد اليوم فره بالليل و قهوه على حسابي ".