الجوهره: احس فيك شي متغير
جسّاس : مهووسه انتي؟ تركزين فيني لين تطلعين شي متغير؟
الجوهره: ويع يامحور الكون ، بعدين من علمك انت ان اليوم بنجهز للعرس ؟
رفع حاجبه جسّاس :افا عليك، انا الي قايل لهم اليوم بنجهز ، وانا الي محدد يوم العرس ،
الجوهره: اقعد
جسّاس: زوج الجوهره وماله راي؟ والعياذ بالله
،
عند الهنوف ونجد ، بيت سلطان ،
رفعت السماعه الهنوف ، ترقص بشعرها على مهنا ، نطقت نجد: حلو ، طلعت شخصيتك الحقيقيه؟
الهنوف: حبيبتي مخزنه ذي الشخصيه لعرسك انا ،
ضحكت نجد وهي متخصره تناظر فستان الهنوف الي على السرير، الابيض الي فيه سلاسل فضيّه ، ومفتوح ظهره بشكل دائري ، واطقم الفضّه الي جنبه ، صرخت الهنوف بحماس من دخلت امها ترقص بشرشفها: عااااششششت
هزّت رقبتها الهنوف مع الدقّه ترقص، تقدمت الهنوف تلاعب اسماء وترفع يدها ترقص فيها ، ورفعت صوتها نجد تناظر الهنوف وتغني مع مهنا : والهنوف الي عشان الزين نسعت جديله
ضحكت الهنوف ترقص مع نجد وهي تهز كتوفها وماسكه كفّ نجد
ضحكت اسماء تجلس على الكرسي الي وراها بتعب : وش خلينا للعرس ،
ضحكت الهنوف بحماس، تغني مع مهنا: افرحي واستامني بالخير يالعين الكحيله، والهنوف الي عشان الزين نسعت جديله ، تامن بظل القروم الي ماحد يامن خطرها
،
« في الحلاق »
رفع صوته العامل: انتا بزورا ؟ ، التفت على جسّاس ينطق: كيف هدا ابو بنت زوّج؟(كيف ابو البنت زوّجه )
ضحك جسّاس: الناس حظوظ يامدير
خيّال: اقول مدير ، تبيني ازوجك اختها؟
نواف: تعقب يالرخمه
خيّال: اما الانساب هنا، اسفين مادريت
فواز: الله يسامح ابوي
نواف : انا خابر نجد حكيمه، شلون وافقت على ذا
خيّال بفلسفه: هو عشانها حكيمه وافقت علي ياغبي
نواف : والله الغبي انت
شدّ العامل على خيّال يثبته ، نطق خيّال: صديق انت حاقد علي؟
،
«في سيارة الهنوف»
وقفت الهنوف عند الكوفي تاخذ طلباتهم ، وحرّكت متجهه للقصر ، الجوهره: نوني وش معجبك في خيّال؟
نجد: اسمه بس، الباقي خياس
رفعت صوتها نوف وهي محشوره ورا : هيه ترا اخوي يجنن بسم الله عليه طالع علي
نجد: هو بلاه انه طالع عليك
وقفوا عند الاستراحه البنات ينزلون ، دخلوا القصر يناظرون التزيين وتِذكار الي تشرف على العمال الي يزينون الكوشه والطاولات بـالورد ، رفعت راسها العنود بانتباه تناظر نجد: نجد امي ،حقت المكياج فوق تنتظرك
هزّت راسها نجد تطلع ونطقت نوف بشماته تضحك: الميك اب ارتست
العنود: اي هاذي ، وانتي خلي عنك الضحك وروحي تجهزي ماباقي شي
،
«في غرفة العروس»
مشغلين اغاني ويرقصون وهم يتجهزون ،والميك اب ارتست ترقص بالفرشه وترجع تكمل مكياج نجد ، كلهم يتجهزون الي عند هير ستايل والي عند ميك اب ارتست ، الا الجوهره تفضل شغل يدها ، تتجهز بنفسها ، دخلت نوف تدور بفستانها السماوي الي فيه فصّ فضي من فوق الى تحت ، عاري الاكتاف والصدر ، اكمام منفصله عن الفستان ، شفافه وعليها فصّ فضي ، وذيل للفستان طوويل وعريض، كان مُلفت بشكل ، وشعرها التكسير ، التفتوا من دخلت تتبعها الجوهره بفستانها الوردي غامق ، عاري الاكتاف ، له ذيله الطوويل بشكل راقي وهادي، واكسسوارتها الفضيه وشعرها الويفي ، دخلت امجاد بفستانها الي يميل للسُكري ، اللؤلؤ من على صدرها الى حد خصرها ، وله ذييل طويل ، وعريض شوي ، وشعرها الي يميل للاشقر والبُني ، وابتسموا البنات من شافوا سِهام تمشي بكل غنج وهي داخله عليهم وتدور بفستانها الوردي فاتتح، ضيق وعاري الاكتاف ،يتوسع من عند الخصر ، منفوش من تحت الخصر بشكل رهيب ، والي زاده جمال غنجها ودلعها ، ناظروا الهنوف الي دخلت بفستانها الضيق الي له سلاسل فضيه من فوق لي تحت ، واكمامها لها سلاسل بعد ، وظهرها مفتوح بشكل دائري ، وشعرها الويفي ، والتفتوا لتِذكار الي لابسه اورنج هادي ، ضيق يوصل لتحت الركبه ، وعلى جنب ذيل ، وشعرها الي مسويه ويفي لاطرافه ، دخلت عهود الي فستانها ضيق تركواز ، ومن ورا كُحلي ذيل طويل عريض ، وحركة الاكس من عند رقبتها،
صرخت نجد بحمماس: بناااااتنااا نارررررر
ضحكت الجوهره: ماتلاحظون اغلبنا ذيل
الهنوف: بس تجننننوون بسم الله عليكم
،
ناظرتهم نجد تنزل دمعتها من اقبلوا عليها ابوها واخوانها وبنصهم خيّال وراجح ، مسحتها وهي تضحك من لمحت الهنوف تأشر لها بمعنى "لاتبكين تعبنا على المكياج"
والتفتت من قبّل جبينها خيّال بلطف وابتعد ، تقدموا يضمونها نواف وفواز وضحكت تنطق: ابعدوا ثيابكم بيضاء تتوصخ من المكياج
فزّ نواف يبتعد ينطق: بلعنك لو جا ثوبي شي
خيّال: الله وثوبك عاد، بعدين حدّك الا زوجتي! اكسر رقبتك ياورع ،
نجد: ماعليك منه نوافي سوّ الي تبي
ناظرها بطرف عين: نوافك اجل؟
هزّت راسها نجد: نوافي وفوازي ، انت شتبي
خيّال: طيب خيّالك مايمشي؟
هزّت راسها بالنفي: لالا
كشّر يصد خيّال: ميت عليك انا عاد
نجد بإنبهار وهي اول مره تشوفه بشماغ: تصدق شكلك يجنن بالشماغ ليش ماتلبسه دايم
خيّال: الله يلعني ان عادني نزلته ، برقد فيه
ضحكت نجد : انت كذا خلقه خفيف؟
تنهد خيّال: بالعكس انا ثقيل ، حتى كانوا البنات الي عندي بالشغل يحاولون ياخذون سنابي ، مايستحون مُتحرشىات
ضحكت نجد بذهول: خيّال! مُتحرشىىات؟ صاحي انت
خيّال: وش يسوون مالومهم انا ترا ، مايقاوموني
ناظرته نجد من تذكرت : تعال تعال
قرّب منها خيّال ونطقت : لااا
خيّال: اجل؟
نجد: معك شغل بالبنات؟
ضحك خيّال من كلجت ونطق: عيدي بالله
ضحكت نجد تنطق بنبرة زعل :خيّااال! ،
نطق خيّال بنفس النبره بهيام : الله يلعن خيّااال
ضحكت تصدّ للعنود الي جت تسلم عليها وتنطق: عاد ذا ولدي الغالي، هو بسم الله عليه ذكي ومافيه احسن منه ورجال وفزعه ، لكن انه يـ
قاطعها خيّال يبتسم ،قبل تجيب خوافيه: يمه مو الحين الله يسعدك
،
تقدم جسّاس ينزل ثوبه وشماغه بتعب ينسدح ، دخلت بعده الجوهره تنزل عبايتها ، وناظرها يعتدل يجلس ينطق وهو يرفع حاجبه:اوها
صفّر من تحركت بشكل دائري توريه الفستان ، ضحكت تنطق: مُراهق
رفع حاجبه يأشر على نفسه: انا مُراهق؟
الجوهره: اي
هزّ راسه جسّاس بتوعد: ها روحي بدلي اجل
مشت الجوهره تدخل غرفة الملابس تطلع لها قميص حرير احمر وعليه روب ، لبسته ومسحت مكياجها وحررت شعرها ، اخذت الربطه تلمّه بشكل عشوائي ,دخلت الغرفه تطفي النور ، كانت بتستلقي على السرير لولا يدّ جسّاس الي سحبتها وصرخت بخوف ،
جسّاس: اوبا ، هدّي من روعك
رفعت راسها تناظره: وش الحركات ذي جسّاس اعقل
رفع حواجبه جسّاس: حركات وش! زوجتي ترا
ضحكت الجوهره: ياشينك اذا قلت زوجتي ، كانك قايل نكته ،
لفّها جسّاس لاتجاهه ،يقبل طرف ثغرها ، ويمرر انامله على خصرها بهدوء وترّها، بعدت يده عنها: جسّاس وش تسوي!
ناظرها جسّاس: ترا مشيتها لك لانك كنتي متوتره مني ومانتي متعوده علي ، الحين خلاص طفح الكيل ، انا اعلنها لك اذا انتي بتقعدين تكابرين كذا
صرخ : احبببش تعرفين وشو يعني؟ يعني اهيمش ، يعني اتنفسش ، يعني ابي رعد باختصار ، هذا اكثر شي اعبر عن حبي فيه ، رعد
تنفست بهدوء الجوهره تتوتر ، هي ما تقدر تقول لا وتاخذ ذنب ، استسلمت له تسكت ، قبّل ثغرها جسّاس ، وبادلته القُبله الجوهره بخجل ، ابتعد عن ثغرها ، سحبها مع خصرها يتجه للسرير ، حرّرها من لبسها ، يتحرر هو قبلها من لبسه ، ونقدر نقول امتزجت الارواح ، انتصر حُب جسّاس الطاهر ، في هذه الليله ، كلاهم يتخلص من خجله ، "واولهم انا الكاتبه" ،
انتهت الليله ، بوصل احد ابطالنا واهمهم ،
،
ناظرتهم نوف بجنون ترفع صوتها: فواز ماراح اخذه لو اموت
العنود بعصبيه: فواز اقرب لك من ساير!
راجح: ماهي على القرب ياحرمه ،البنت تبي ساير ، خلاص ابلغ ساير انها موافقه ،
نوف: ياخي انتي وش لاقيه بفواز؟
العنود: رجال
راجح بحدّه : وساير ارجل منه ، وازين ماختارت بنتي ،
العنود: لاتجننوني! اخر عمري اعطي بنتي لولد نرجس!!
نطقت نوف بحدّه توقف: ساير وماني اخذه غيره لو اعنّس عمري كله
التفتت العنود لراجح: شفت شفت، تحبه انا داريه تحبه
راجح: لو ماهو رجال ماجا يخطبها ، اختار انه يحبها بالحلال ، الرجال مافيه عيب لو تطلعين لسهيل وتعودين ، ساير اعتبره ولدي، زي ما خيّال وجسّاس واحمد عيالي،
تقدمت تضمّ ابوها نوف ، شدّ عليها يبتسم وابتعدت عنه تطلع لفوق ، دخلت غرفتها ،
التفت راجح يناظر العنود: لاتنكدين عليها ، خليها
العنود: اي خليها خليها، ولا صار فيها شي قلتوا العنود ماوقفتهم
راجح: لا ماننا قايلينه بس كفينا شرك
اخذ الجوال راجح يدق على ساير ، ويناظر في العنود ينتظره يرد ، اعتدل بجلسته ساير يرد : ارحب
ابتسم راجح: تبقى يامرحب ، البنت وافقت والله يبني بيتكم على العزّ والطاعه ان شاء الله
توسعت عيونه بذهول يوقف: انا في وجهك ياعم
ضحك راجح: ترا بهوّن
نطق بسرعه ساير: لالا ، وش تهوّن الله يصلحك
راجح: الله يوفقكم يابو سعود، ووالله انك تستاهل كل خير
ساير بفرحه :تستاهل الطيب جعلني قبلك
قفل راجح وصرخ ساير : حاااااي
نزلت عهود تناظره مرعوبه ، ناظرها يضحك وصرخ ينطق بحماس وهو يبتسم : ووش يقووول مهنناا
افرررحي واستاامني بالخيير يالعييين الكحييله
ضحكت عهود بذهول : احلف بالله
كملت عهود تناظره: هييه كذاااب
فهمته لان الشطر ذا عندهم مربوط بالافراح ، كل ماتزوج واحد شغلوه ، فهمته ان نوف وافقت ، ضحكت عهود
وصرخ ساير بحماس يرقص ، حذف عقاله يطيره فوق ويرجع يمسكه ، مسكت جوالها تصور ساير وهو يرقص على الشيله وشايل السماعه ، ارسلته بالقروب الي جامعين عايلة راجح وعايلة سعود وعايلة عبدالعزيز وعايلة سلطان فيه ، طلعت من الحمام الجوهره
"يُكرم القارئ"، وناظرت جوالها الي امتلى اشعارات ، دخلت القروب تناظر الفيديو وضحكت تناظر ساير ، لانت ملامحها من سمعت الشيله! ،
همست الجوهره: تكفى ياساير!
كتبت لهم ترسل: اسألكم بالله!
ضحك جسّاس يناظر ردة فعلها ورجع يناظر محمد الي ارسل : حي ابو سعود
"محمد وساير رجعت علاقتهم طبيعي ولا كأن صاير شيء" ، ارسل ساير : خلاص من قدكم العريس ابو سعود يراسلكم
ضحك جسّاس بقوه يرفع صوته: ياااووويييل امهااا ياساير
ارسل موقع الاستراحه ساير يكتب تحته : حياكم الله على عشاء ابو سعود بمناسبة ملكته بكره ، حجزتها لنا قبل الملكه بيوم ،
ارسل احمد: يعني نجي الحين ولا بكره؟
كتب ساير يرسل لهم: يارجال اقول لك قبل الملكه بيوم والملكه بكره يعني تعال اليوم
ارسل احمد: طيب لاتنافخ ولا والله ماحضر
ضحكوا من حسّيت احمد ، وارسلت الهنوف: نوف يعنني مستحيه تشوف وماترد ، بليز مو لايق
كتبت بسرعه نوف ترسل: تخسين من قال ، هذي حركاتك انتي ونجد
ابتسم ساير يكتب: ارحبي ام سعود
كتبت نوف وهي تضحك ترسل: ترا بخلعك
ساير: لاحول ولا قوة الا بالله ،استهدي بالله
احمد: ترا بعلم ابوي
ساير: زوجتي انت شتبي
احمد: زوجتك بكره يالسلقه
ساير: تمون يابو نسب
وقف جسّاس عند باب الاستراحه هو والجوهره وكتب يرسل بالقروب: افتحوا الباب بس
ساير: قلنا له اقلط وقلط صدق
جسّاس : انت بتلبخ ولا كيف
ساير: بلبخ عشان زوجتي بس
التفت جسّاس من فتح ساير الباب ودخلوا ، ضمّته الجوهره تضحك: مبروك يالحب
ابتسم ساير يبتعد ينطق: الله يبارك فيك
،
«قسم الحريم»
ابتسمت نوف من دخلوا البنات تنطق: ارحبوا خوات زوجي العزيز
ضحكت الجوهره من فزّت نوف من قرصة العنود ،
تآوهت نوف بألم تفرك مكان القرصه: ياخي عادي شفيها زوجي !
العنود: انتي مارج مافيتس طبّ
ضحكت الهنوف : الايام ذي الزواجات ماتوقف ، مافيه بريكات ماشاء الله
نجد: جسّاسوه الزق فتح لهم مجال ،
ضحكت تِذكار: هم ينتظرون احد يحركهم بس
سِهام: الله يستر علينا يارب لايجينا الدور
خزنه: افكر اخطب لاحمد
همست تِذكار: حوالينا ولا علينا يارب
ضحكت اسماء : كل واحد تدبّس ببنت عمه والي بنت خاله والي بنت خالته ، غيّروا وراكم ثبتوا
نجد: انا بزوّج اخواني برا القبيله بعدّل النسل
سِهام: أأيدك
التفتت عليها نجد: بس انتي حلوه ماتتوفتين خلاص بخليك لواحد منهم
سِهام: لا حبي انا بتزوج سيركاي
ضحكت تِذكار: وش ذوق المراهقات هذا
نجد: صدق سِهام انتي وش تدرسين؟
همست سِهام بهمس سمعوه: والله البلشه هاذي ناويتني
ضحكت نجد ونطقت سِهام: بأول جامعه
،
كانوا العيال صافين ويرقصون بحماس ، وكسروا الارض على دروبهم ،ضحك سعود: يا الله انك لاتسلط علينا
راجح: ولدك مطفوق ، كيف زوجته بنتي انا
سعود: ماني خابره كذا ، بنتك الي عامله العمايل يابو جسّاس
ضحك راجح: تقوله صادق؟
ابتسم سلطان: الله يبني بيته ان شاء الله
ارسل جسّاس للجوهره تفتح له باب القاطع الي بينهم وطلعت تفتح له وهي لابسه عبايتها ،
