لانت ملامح محمد ينطق: لاتخربين فرحتي
عهود: فرحتك مؤقته ، بتلقى غيري
تنهد محمد من تفكيرها ، وإنها للحين مو مصدقه انه يبيها فعلاً ومايبي غيرها ، مو مصدقه انه يحبها ومو إعجاب ، علاقتهم مِثل وصفه لها ، هي اسرائيل وهو فلسطين ، هو شرق وهي غرب ، هي شمال وهو جنوب ، كل المتضادات توصف علاقتهم ،
ناظرته يفكّر ، سكتت تطلع من عنده ، وناظر مكانها محمد يزفر بغضب من اجتاحته الضيقه الي ماتفكّه، يذوق مرارة الحُب ، وعرف سلبياته ، وايجابياته الي للحين ماشافها ،
،
راحوا الضيوف وبقوا بس العايله ، طلعت من عندهم الجوهره لجسّاس الي برا ، ناظرها ينطق: هلا باللي له الخافق يهلّي ، ياذا الزول الي عسّاه مايولّي
ابتسمت من ترحيبه ، وتقدمت تحضنه وتميّل راسها على كتفه ، ضحك جسّاس: اكيد ولدي الي قايل لك تضميني اعرفه طالع علي بسم الله عليه
ابتعدت من عنده: شقصدك؟ يعني لو مو حامل بولدك ماضمك؟ هاه ؟
ضحك جسّاس: هرمونات الحمل بدت من الحين؟ كذا نظامك يعني؟
شالها جسّاس وهي تصرخ: نززللنييي نزلللنييي
ما استجاب لها ، وعضّت كتفه تنطق:جسّاس ياكلبب حامل
ضحك جسّاس يركّبها السياره ينطق بطقطقه: احلفي
تقدم لمركَب السائق ، حرّك السياره جسّاس والتفت لها من نطقت: على وين خير
نطق جسّاس: مافيش صبر انتي؟ انتظري
صدّت تناظر الطريق تخمّن وكل توقعاتها خابت من شافت محل مُلتزمات الاطفال ، ابتسم جسّاس يناظر ذهولها ، ونزلوا وهو ماسكّ يدينها ، يتنقون احلا الملابس ، اخذت قِطعه بناتيّه توريها جسّاس تنطق: جسّاس شوف تمووت مرره
ابتسم جسّاس يناظر فرحتها وحماسها وهي تختار ونطق: تبين بنت؟
ناظرته تنطق: الي يجي من الله حيّاه الله ، احس كلهم كتكوتييين
ضحك جسّاس: كتكوتين؟ نشوف متى تنامين اذا جاء
ناظرته : اصلاً بخليك انت الي تنومهم حبيبي ، ولا وش فايدتك كـ أب ؟
ضحك جسّاس ينطق: بالله؟
هزّت راسها بالايجاب ، وكمّلت تتسوق للجنسين ، احتياط لو طلع بنت يكون عندها ملابس بناتيه ، ولو ولد يكون عندها ملابس ولاديه ، هو بدري بس حماس جسّاس كان يفوق حدوده ، ناظرت جسّاس الي وقف عند دُميتين ملبسينهم لبس ، وناظر العامل ينطق: جب هذا
اخذه العامل يطلع لهم ، وابتسمت بحنان الجوهره تناظره، التفت يناظرها تناظره وضحك ينطق:ماعندك اخوان انتي؟ جايّه تقضين لورعانك وتبصبصين على عيال الناس!
ضحكت الجوهره من عباطته
،
ناظروا محمد الي يهوجس ونطق سيّاف: وش جديدك على ذا الهواجيس
التفت عليه محمد من انتبه انهم يتكلمون معه ونطق: امحق محبّه كل ابوها انقطاع ،
وامحق وليفٍ كل ماجيته تكبّر ،
ضحك سيّاف يصفق ينطق: مُبدع ،مبُدع لانك اخوي طبعاً
اخذ الفنجال محمد يمثّل انه بيرميه عليه ينطق: يارجال البخ بس
التفتوا من دخل راجح: مارقدتوا انت وياه؟
نطق محمد: اجل حنا بنرقد هنا ياعمّي؟
راجح: سعود حلف علانا كلنا نرقد هنه اليوم ،
ساير: حي عينه ابوي علي بالحرام انه كفو
ضحك راجح: ارقد ارقد
اعتدل بجلسته ساير ينطق: مافيه نوم ياريجيل اليوم سمّاري ،
طلع من عندهم راجح وانسدّح خيّال بينام ،
ناظره فواز: عطاها وضعية الابو
ضحك نواف: شعرفك انت يعنني ورعه فالطريق ويتدرب
عشان ورعه بكرا يرسله بالستريك يقول الوالد ، ولا يكتب شايبنا ، ويحط حبتين ، ارحم حالك يارجال حتى الثلاثين مادخلتها ،
ضحك سيّاف ينطق يرفع صوته: عيش طفولتك ، ولا يانواف؟
هزّ راسه نواف: الا بالله هاذي هي
،
اخذت عبايتها سِهام ، وطلعت بتختّل ، واخذت جوالها ، تصور فلوق وهي تنطق: رايحه لبقالة الديره ، والي بلقاهم بالبقاله كلهم اعرفهم صدقوني ، منكم واليكم
قفلت جوالها وهي تتجه للبقاله ، دخلت تناظر كيف مشلّحه ورايحه فيها حرفياً ، اخذت لها سناكات ، ومشت للثلاجه بتاخذ بارد ، ناظرت الي واقف عند الثلاجه وطوّلت تنتظره يبتعد ونطقت بغضب : هيه انت
ماردّ عليها احمد ، ورفعت صوتها تنطق: ترا مو انت وبس الي بتشتري ، ابعد
التفت عليها احمد وشهقت من عرفته ، ونفس ردة الفعل عند احمد ، ناظرها ينطق: وش جايبك لحالك؟ ولو انه مو انا ؟لو رجال غريب؟ تصارخين كذا وتهرجين معه؟
ناظرته سِهام: من انت عشان تحاسبني! اسوي الي ابيه وبكيفي ! لا انت ابوي ولا انت امي شتبي؟
سحبها مع يدها احمد ينسى العادات والتقاليد يضرب فيها عَرض الجدار ، ووقف يحاسب على اغراضها ، ومشى وهو ماسك ذراعها ، ركبت السياره ورا وركب احمد يحرّك للبيت وهو ينطق: اخر مره اشوفتس بالبقالات اخر الليل تسمعين
ناظرته مع المرايه تضحك بسخريه وتنطق بإستفزاز: اطلع متى مابغيت وارجع متى مابغيت ، مالكك وِليَه عليَ
زفر بغضب احمد من مراددها وهو مايحب الي كذا ابداً ، حطت رجل على رجل سِهام تفتح جوالها، وتنهد يصدّ للطريق احمد ، وقف عند بيت سعود بِحُكم انهم بينامون كلهم هِنا اليوم ، نزلوا ،وناظرها سيّاف ينطق:سلامات؟ من وين جايه مع ذا انتي؟
نطقت سِهام ببرود: رحت للبقاله ولقاني هناك ، وتعرف اخو ولد عمتك راعي مواجيب، حلف علي قال والله مايوصلك غيري ، وانا ماحبيت اكسحه مسكين، بالبدايه كنت احسبه سواق صراحه ، بس قال ولد راجح وقلت اوكي مافيه مانع
ناظرها احمد بذهول ، وضحك سيّاف من نظرات احمد ينطق: ادخلي ادخلي
دخلت سِهام تمشي بهدوء وسمعت احمد يقول: تسذوب ياولد قسم ماصار من الي قالته هي ، رايـ
قاطعته سِهام ترفع صوتها من مكانها: شقصدك ؟ يعنييي انااا كذااااابه؟؟؟ ، ترضاااا عليييي سيّاف !!!
ضحك احمد بذهول ينطق: يااولدد
نطق سيّاف: يارجال انا وانا اخوها ماقدرت عليها ، اسكت بس وخلّها على الله
دَخل احمد للخيام وتبعه سيّاف ينامون ،
،
الساعه 9:00
- المطبخ -
مابين ضحك وسوالف البنات ، يجهزون الفطور ، وهم مُبتسمين ، ويضحكون وبشوشين الوجيه ، دخل خيّال ينطق: نجودتي وييين
ناظرته نجد تنطق: بستفرغ طلعوه عني طلعوه طلعوووه
ضحكت العنود: الحرمه متوحمة علاك يا امي اطلع اطلع
لانت ملامح خيّال: افا ياذا العلم ، وش ذا الورع النشبه هاذي بدايتها؟
نطقت نوف: حبيبي وش بدايته الحرمه اوشكت على الولاده وانت تقول بدايتها
تقدمت نجد بسرعه للزباله تستفرغ "يُكرم القارئ"
ورمت نعالها العنود على خيّال تنطق بعصبيه: مانت بجايبٍ لي خير اذلف عن الحرمه
فزّ خيّال يحكّ ظهره بألم من الضربه وطلع من المطبخ والبيت كله للخيام وناظرهم جالسين وانسدح على ركبت ابوه ونفخ عليه راجح ينطق: قم قمم
قام من عنده خيّال ينطق: كلكم متوحمين علي اليوم؟
، وبعد ضحك وسوالف تفرقوا لبيوتهم قبل الظهر بشويّات ،
،
نطق سعود: جواب نهائي ياعهود طولنا على الرجال
ابتسم ساير يمثل الخجل ويرمش بسرعه: موافقه
ضحكت عهود وناظره سعود: وش اسمتس انتي؟ موافقه اجل
نطقت عهود: انا موافقه
التفتتوا عليها بذهول وضحك ساير بفرحه: مابغيتي يا اختااه ، ياووك انا طرت من الفرحه كيف محمد عاد
سعود: مسكين ذوقته عهود المراره واللعنه
اخذ جواله سعود بيدق على محمد يبلغه واستوقفته عهود تنطق: لا بابا لاتقول له الحين
تخصر ساير: ياشيخه!
والتفت يناظر ابوه : والله لتدق عليه يبه ذي بتجلط الرجال
دقّ سعود وهو يضحك ، وردّ عليه محمد الي يمشي طالع من المسجد ينطق: يالله ياكريم بالبشاير ياعمّي ، اسلم وش بغيت
نطق سعود: الله يبني بيتكم على العزّ والطاعه ،
لانت ملامح محمد ينطق بعدم استيعاب : من؟
ضحك ساير يرفع صوته: عهود وافقت وتقول بنملك اليوم بعد
قرصته عهود من عند كتفه تناظره بذهول: خيرر كذااب
وقف محمد ينطق: اسألك بالله ياعمي
كشّر سعود: امزح معك انا؟ اصغر ورعانك؟
محمد بخوف انه يهوّن: لالا محشوم
ضحك سعود بقوه: ياوك يامحمد الله يعينك
ابتسم محمد براحه: اهخ ياعمي احبك
نطق سعود بذهول: ويش! يانكر عيني نكراه صدز
ضحكت عهود: اغار على ابوي خير
همس بداخله محمد: ياحظّه
ونطق يرفع صوته: عمّي الملكه والعرس كلهم بعد ثلاث ايام عائليه ماعاد فيني صَبر ابدّ
سعود: الله يتمم ان شاء الله
قفل تحت ذهول عهود الي نطقت: بابا يقووول بعد ثلاث ايام!!
نطق سعود: اي الرجال انتظر واجد ، روحي مع ساير اليوم للدوادمي وتقضّوا
هزّت راسها بالموافقه تقوم لغرفتها ، وناظرت جوالها وكمية الاشعارات وكلها من رقم غريب ، ردت بـ: نَعم؟
ابتسم محمد من وسط اهله يكتب لها وارسل: احبك
كتبت بسرعه ترسل : خير من انت ؟ بجيح
ابتسم محمد ينطق: لاحول ولاقوة الا بالله ،
والتفت لجواله يكتب وارسل : محمد
كشّر من جاه بلوك في ثواني ، والتفت لهم ينطق: الحين وين مارحت معسرّه؟
عبدالعزيز: ليه
ابتسم محمد: نسيت اعلمكم ، ابشركم ملكتي بعد ثلاث ايام
توسعت عيون عبدالعزيز بذهول: وافقت؟
هزّ راسه محمد بالايجاب ، وابتسم من مباركاتهم ينطق: الله يبارك فيكم والعقبا للسرابيت احمد وسيّاف
نطق بسرعه احمد: اعتقوني ماني متزوج ماني متزوج ماني متزوج ، ذريتكم سبع طعش نفر ، زوجوهم هم
نطق راجح: انت واحد من السبع طعش نبا نزوجك
هزّ راسه بالنفي يشرب من فنجاله ، ينطق: اقنعوا مني مافيه يعني مافيه
،
نطقت الجوهره بذهول: كذاااابه
رمت عليها عهود المخده بقوه تنطق: تراك دبلتي كبدي كل ماقلتي شي شهقتي وقلتي كذاااابه
ضحكت الجوهره بعدم استيعاب: ياويلي ماني مصدقه انك وافقتي ، الضعيف وش ردة فعله
نطقت عهود وهي تلعب باظافرها: ارسل لي واتس
ضحكت الجوهره: ايييييييييه كيف جاب رقممك
توسعت عيونها بذهول عهود تنطق: كلِ زق وربي مادري ، بس يقولون الحُب افعال
اخذت جوالها من دق ، وناظرت الرقم وعرفت ان امها الي داقه وتنهدت بحزن تنطق: بتخرب كل شي اعرفها
نطقت الجوهره: تخسى ! خلي زواجك بعد ولادتي وشوفي وقفتي بزواجك ، والله ماخلي بنت امها تخرب عليك
ردّت عهود تحطه سبيكر ونطقت نرجس: هاه ؟ وافقتي ؟ ماعندتس كرامه انتي ؟ رجال مطلقتس يحب وحده ثانيه وش تبين فيه انتي؟انتس طالعه نِسره على اختس اللي ماتتنتسمى
سكتت الجوهره تتجاهلها ، ونطقت عهود: وافقت ولا ماوافقت مالك شغل فيني
ضحكت بسُخريه نرجس: ايه مكبرين راستس علي ، اقول بس خلي ابوتس يحول النفقه ، ينقّها ريال ريال
ضحكت الجوهره: انتي ماتسوين الريال الواحد مدري كيف صارفين لك نفقه خمسميه
سكتت نرجس من الجمتها الجوهره ، وماعرفت تردّ
انحرجت تقفّل ، وضحكت عهود تنطق: عشقييي ،
التفتت نرجس على روند تنطق: شفتي؟ عوب عوب هذلّي بنات سعود ، مير اسمعي ، انتي بنتي البِكر ماني مخليتن هذلّي يتغلبن علاتس ، حتى لو انها اختس ، سمعتيني؟ لاتغلبتس العاطفه وتروحين معهن سواسي ،
نطقت روند بهدوء: ساير وعهود يدروون اني اختهم؟
هزّت راسها نرجس بالنفي تنطق بسرعه: ولا تعلميننهم انتبهي ،
نطقت روند: يدرون انك متزوجه قبل سعود؟
نطقت نرجس: لا لا ابداً لاتجيبين لهم طااري سامعه؟
هزّت راسها بالايجاب روند ، وطلعت من عندها نرجس ، قعدت تفكر روند وكيف بترجّع لها محمد ، نزلت دموعها بحراره من درت ان عهود وافقت على محمد ، ماتتخيله مع اُنثى غيرها ، احترق قلبها كما تُحرق النار حطبها ، وتحولها للرماد ،ومحمد بذي القصّه النار الي تحول الي تحبه للرماد ، اخذت جوالها تفتح البلوك عن محمد ، وناظرت محاولاته ورسايله لها تبكي زياده ، دقّت عليه تنتظر منه ردّ وماكان منه الايجاب ابداً ، كتبت له تبوح بسرّ امها : امي نرجس ، متزوجه ابوي قبل سعود ، وجابتني وتطلقت من ابوي ، وربيت مع خالتي على اساس انها امي ، وعهود وساير اخواني ، لاتفرق بيننا وتكون انت السبب في شتاتنا ،
ارسلت وهي تمسح دموعها الي تنزل اضعاف ، رمت الجوال على السرير تبكي وهي تناظر السقف ، تشوف احلامها تنهدم وحده وحده ، تحس انها مظلومه بـ اُم زي نرجس ، تستعمل عيالها كـ ذخيره لها ، تستعملهم ضدّ اعدائها ، ولا تخاف تخسرهم ، هذي هي خسرت ساير وعهود ، ولا همّها ، وبدت تحاول تدمر في روند ، ساير وعهود عندهم ابوهم ملجأهم ، بس هي ابوها متوفي ، وين تروح ؟ مالها الا امها ، ومظطره تصبر ،
رفعت جوالها تنتظر من محمد ردّ ، بس كان صحّ واحد ويعني انه مبلكها،
،
نطق خيّال من ورا الباب حق المطبخ: طيب بدخل
نطقت نجد: إصحكك يااخيّااال
تنهد خيّال ينتظر نوف تجيب له القهوه من المطبخ بِحُكم انه مايقدر يدخل بسبب "وحام نجد"
ضحكت العنود من حالهم ، وحال خيّال بالذات
نطق خيّال يرفع صوته: طيب لي اسبوع ماشفتها بدخل اشوفها
نطقت العنود: لا ياخيّال فكّنا منك
تنهد خيّال ينطق: طيب
صرخت نجد بقوووه: يمممممماااااه بووووولددددددد
المووووييييييه الموويييه
فزّوا كلهم بِرُعب ، وتقدم خيّال بسرعه يدخل وناظرهم بضياع : العبايه العبايه عبايتها ابك هاتوها
ركضت نوف تجيب عباية نجد وعبايتها هي وشرشف امها ، لبسوها عبايتها وشالها خيّال على ثقلها ، حطّها ورا وتقدم يركب قدام وورا اسماء ام نجد ونجد ونوف ، وقدام العنود على يمين خيّال ، حرّك بسرعه خيّال وهو متوتر من صراخ نجد وتألمها ، حرّك لاقرب ديرة فيها مستشفى ، ودخلوا اسوار الديره وزاد سرعته من صرخت نجد ، وقف بالمواقف حقت المستشفى ينزل ، ركض يجيب لها عربيه وركبوها فيها ، واسرع يركض وهو يدف عربيتها وهي تصارخ : بوووولدددد بولددد
ضحك خيّال وهو يدفها: يابنت الحلال دروا كلهم
صرختت نجد تنطق: خيّااااللل بوووووولددد
اخذوها المُمرضات يدخلونها غرفة الولاده ، جلس خيّال جنب الغرفه ينتظر، وناظر اسماء الي تبكي بخوف، والعنود جنبها تهديّها ونوف توثق اللحظه ، اخذ نعاله خيّال ورماها على نوف الي ابتعدت قبل تصيبها تنطق: خيرر خيّالوه ! لاتخليني ادخل وانحر زوجتك وورعك
ناظرها خيّال: ان قمت عليك ماهو من صااالحك
دخلوا فواز ونواف والهنوف وابوهم سلطان المستشفى وهم يركضون ووقفوا من ناظروا خيّال ، نطق خيّال : وش جايبكم؟ حرمه بتولد انتم وش تدورون؟ بتولدونها؟ انا زوجها ماولدتها شتبون انتم
نواف: كل تراب جايين نوقف مع اختي
خيّال: والتراب فيك انت واختـ
قاطعه فواز: ترا بحشى فمك من التراب
التفتوا من طلعت الدكتوره تنطق: ابو الولد فين ؟
التفت خيّال يبتسم: يازين الكلمه ياناس ، انا ابوه ياجعله قبلي
نطق سلطان يضحك: ابك لا
نطقت نوف: وش ذا الابو المعتوه
ناظرتهم الدكتوره تبتسم : تعال وقّع على الاوراق حقت البيبي
راح معها خيّال يخلصون الاجراءات اللازمه ، ورجع لهم وناظرهم يتكلمون مع الممرضه الي مو راضيه تدخلهم ونطق خيّال: اذلفي هنا بس قالت ماندخل قالت ،
التفت عليهم خيّال يأشر لهم وهو صادّ باصبعين وينطق: لتس قو
وقفت العنود تستوقفهم: خلوه يتكلم مع زوجته لحالهم ثم ندخل حنا
هزوّا روسهم بالموافقه ودخل خيّال ينطق: الله الله وش ذا الجمال
التفتت عليه نجد ونطق: ماقصدك اقصد نفسي ياحلوني
ضحكت بخفّه وتعب وهي تناظره يناظر المرايه ويمدح في نفسه ، تقدم لها ينطق: الحمدلله على السلامه، اسمع صراخك وانا باخر المستشفى ، والله ولدي ماهو هيّن
نطقت بهدوء غير عادتها: كل زق انت وولدك اهخ
ضحكّ خيّال بخفّه: اي قاهرك ولدي ؟ اعترفي
ضحكت نجد بتعب وهي تحاول تقاوم الضحك :خيّال لاتضحكني كل زق بطني يعورني اذا ضحكت قوه
نطق خيّال : طيب بسكت
مثّل انه يسكر فمّه خيّال ، وسكت وهو كاتم الضحكه ، ناظرت شكله نجد وضحكت بقوه ، من شكله وكيف كاتم الضحكه ، نطقت وهي تضحك : يمه بس بس
ضحك خيّال بخفوت وتقدم يجلس جنبها يقبّل جبينها وينطق: الحمدلله على سلامتك يام سَهم
ابتسمت نجد: الله يسلمك ، سجلت الاسم ؟
نطق خيّال يقوم من مكانه : الله يذكرك بالشهاده بروح اسجله الحين ،
مشى يطلع خيّال ودخلوا اهل نجد والعنود ونوف ، ناظرتها اسماء تنطق بحنيّه: ياعين امي انتي
ابتسمت نجد تسلم عليهم وهي مكانها ، وتقدم نواف ينطق: الحفيد وين ، الستريك له شهر طافي
ضحكت نجد: ولدي ماهو محتوى لك انت وستريكك
حق ستريكي انا بس
نطق فواز: ماردا من الخال الا الام الله يعوض ولد اخيتي بس
ضحك سلطان: عطوني حفيدي وينه
نطقت نجد بهدوء: ماجابوه للحين يبه ،
،
تقدم للممرضه خيّال بعد ماخلص اوراق البيبي ينطق: عطيني بيبي خيّال بن راجح
الممرضه : لا بابا ممنوع الحين ، بيبي انتا حضانه
ناظرها خيّال ينطق: عطينيه ترا ولدي ماني باكله
رفعت صوتها الممرضه: انتا مافيه مفهوم كلام!!! بيبي مافيه !
نطق خيّال بذهول: ابو سَهم صدق
الممرضه: زقّه فيك انتا and سَهم
ضحك خيّال يطلع من جيبه فلوس يعطيها اياه ينطق: هاك طيب وجيبيه لي
ابتسمت الممرضه ونطقت: اي بابا مافيه مشكل اجيب الحين
ضحك خيّال ينطق: يلعن شكلك هذا نظامك؟ اي اعرف لك انا
تقدمت له بسرير البيبي ونطق خيّال يرحبّ بولده: ارحب يابعدهم كلهم انت ، ياناس بسم الله عليه
نطق خيّال يستوقف الممرضه الي كانت بتروح: تعالي تعالي
تقدمت له الممرضه تبتسم ونطق: هاتي الفلوس
كشّرت الممرضه وتلّها من يدها خيّال ينطق: ممرضات اخر زمن ، يالله دزّي ام امها ، فلوسي في مخباي وورعي في حضني ، ها الخلا الخالي
طلعت من عنده بغضب ، ودفّ سرير البيبي خيّال يتجه لجناح نجد ، دخل يناظرهم مجتمعين ونطق: وسعوا للامير وسعوا
ابتسمت نجد: يابعددد كل الازوااال
ابتسم خيّال: لايغركم ترا تقصدني من ورا التريلات
ضحكت نجد: جب ورعي جبه بس
نطق خيّال : تراه ورعي حتى انا
ناظرته نجد: جيييب ورعي
نطق خيّال بتحدّي: واذا ماجبته؟
وقفوا نواف وفواز ناوينه ، ومشى بأدب خيّال ينطق: لاخلاص
ضحكت نجد: ازواج اخر زمن
نطق خيّال: ترا ماني خايف منهم بس اعطيهم على جوهم
ناظرته نجد: اي واضح
فتح جواله خيّال ينطق: دقيقه اوريك فيديو لي تهاوشت مع واحد دبغته دبغغ
نجد: خرطي ، الظاهر هو الي دبغك
لفّ عليها الجوال يوريها ، فيديو له يتهاوش مع واحد يتحرش في وحده من بنات النادي حقّه ، وهو كان حاضر والبنت انتخت فيه ، وهو ماقصر ، ضربه لين الدم طلع من خشمه وفمّه ، وراسه من فوق يصب شوية دمّ ، ويدّ خيّال كلها دمّ الرجال ذا ،
توسعت عيونها بذهول : يامُجررم !!
ابتتسم خيّال : الحميّا فينا ومنّا
نجد: بعدين تعال ! النادي حقّك يشتركون فيه بنات؟
خيّال : حبيبتي زوجك رجُل اعمال على فكره ، وترا مو نادي رمايه اسلحه بس! كل انووواع الرمايه ،
نطق فواز: ليه سميّت ولدك سَهم بالذات؟
نطقت العنود تجاوب بدال خيّال: خيّال يموت بالاسهُم ويحب الاسلحه ويحب انواع الرمايه كلها ، بس ليش الاسم ذا بالذات حتى انا ابي اعرف
نطق خيّال يبتسم ويناظر سَهم : لان مافيه اسم حلو بقد سَهم ، لانه يوصف هِواية ابو سَهم ، ولإن حُب امه صابه كالسِهام، يكفي؟
التفت يناظر نجد الي تتأمله بِحُب ، وضحك ينطق: المُعجبين ياخي
ناظرته بطرف عين تضحك ،
💙💙
