انتهى العزاء وكُلٍ منهم غادر لدياره ، وتجاوزوا المُصيبه الي حلّت عليهم وتنازلت نوف عن رفاع وادّى تنازلها لغضب اخوانها لكنها تجاهلتهم وقررت ونفذت بنفسها ، ورضوا بالأمر الواقع ،
،
«نادي الرمايه »
دخلت نجد تمشي بهدوء بجانب خيّال ، تتأمل المكان والمُتدربين والهاوين ، فزّت من سمعت صوت الطلق ، ضحك خيّال يهمس: توك ماشفتي شيء
مسحت على جبينها بتوتر ونطق خيّال: ماوعدتك اعلمك الرمايه ؟ وفي نادييّ بعد
ابتسمت نجد: زوجي وفي ولا ؟
خيّال: تشكين ؟ تبيني انادي هذا يطلق عليك بدال الهواء
ضحكت نجد : تسويها
خيّال: تاكدين لي انك تشكين يعني
مسك السلاح خيّال وثبّته على مكانه ، والتفت على نجد ينطق: تعالي
قرّبت نجد ووقفت عند السلاح خلفه بالظبط وخلفها هي خيّال يحط يدينه على يدينها يعلّمها كيف تصيب الهدف ، شدّ على يدها ينطق: شدّي على السلاح لاينفلت منك اذا اطلقتي ،
قال كذا لان فعلاً من قو الطلقه يهتزّ السلاح بشدّه ويخرج عن سيطرتها لذلك يجب ان تشدّ عليه بكامل قواها ،
شدّت عليه نجد وظفغطت على الزناد ترمي ، صوّبت طرف الهدف ومدّت السلاح لخيّال بسرعه ترتبك : يمه يمه
ضحك خيّال من خوفها ونطق: ماش ماعجبتيني
،
صبروا على حُبهم لحد ما انتصروا ، وكُل واحد حَصل بدال الثَمره الوحده لِحُبّهم ، ثِماار ،
،
دخل فهد البيت يناظر ابوه جسّاس جالس يسولف مع رعد عن الشغل ، دخل بخلسه وهو يجرّ خطاويه ، ووقف يعضّ شفته بوهقه من نطق جسّاس: وين رايح
التفت عليه فهد ينطق: سمّ طال عمرك
نزل نظارته جسّاس ينطق: اقول وين رايح لاتصرف عمرك
حكّ راسه فهد يتنهد ينطق: والله يالغالي برقد
جسّاس : والمخالفه من يسددها وانت راقد حظرة جنابك ؟
عضّ على شفايفه لإن ابوه درا ، وهو كان متوقع كذا لان ابوه مايخفى عليه شيء،
التفت رعد يناظر جسّاس: خلّه يبه ، انا بسددها عنه
ناظره جسّاس: تحسبني عجزان اسددها ؟ لاحشى ، لكن خلّ الحمار يتأدب ، سددها من مكافأتك
سكت فهد بوهقه وطلع لغرفة امه وناظرها تسرد لبُروق قصصهم قبل ،
نطق فهد: بُروق اطلعي بتكلم مع امي
بُروق: اذلفف جت اللقطه المنتظره من القصه كلها !
رفع صوته فهد: قومي برا
وقفت بقهر تطلع ونطق فهد يجلس عند الجوهره : يمه
ناظرته الجوهره تنطق: وش قال لك ابوك هالمره بعد
فهد: يمه يقول سدد المخالفه من مكافاتك
الجوهره: سددها
نطق فهد بوهقه: مُعدلي مايساعد وقطعوها عني
ناظرته بصدمه : فهد
فهد: يمه والله اني شاد حيلي
ضربته بالعصا بخفّه: قم قم انقلع ولاتحلف ، شاد حيلك اجل
فهد: طيب بس هالمره تحايلي ابوي
وقفت الجوهره تنزل شرشف الصلاه تمشي معه تهدده: والله يافهيد ان ماعقلت ماعاد اتوسط لك عنده
ضحك فهد: عاشتت ام رعد عاششت
ضحكت تهز راسها بقل حيله ، ووقف فهد يناظر مع الدرج فوق ، ونزلت تجلس على الكنب تنطق: ابو رعد
تمتم جسّاس ونطقت الجوهره: سدد هالمره بس ياجسّاس واوعدك انا المره الجايه اتلّه مع اذنه
نزل نظارته جسّاس ينطق: وينه السلوقي وينه، مرسلك لي
ضحك فهد وهو فوق يناظرهم مع الدرج ، رفع راسه جسّاس من سِمع الضحكه ونطق: ابن ابوي
كمل جسّاس: تقل وحده مخطوبه ومستحيه تقول لاهلها موافقه
ضحك رعد يحكّ دقنه ، ونطق جسّاس يناظره: ضحكت انت ، ها سدد المخالفه
ناظر امه رعد بوهقه ونطقت الجوهره: عشاني ياجسّاس سددها انت
تنهد جسّاس واخذ جواله يدخل على سداد يسدد المخالفه ، وسكّر جواله ونطق رعد: سددتها ؟
جسّاس: سددناها الله يعوض
،
