بكت العنود تناظر صورة ابوها بيدها تبكي بحرقه وألم ، ماشفى غليلها من عُمرها "17" الى يومها ذا وعُمرها"47"
بالعكس تحسّه يزيد كُل يوم ، وكُل يوم يزيد حقدها لاخوانها الي حرموها منه ، ويزيد غليلها وحرقتها على ابوها ، بكت العنود تنطق بألم داخلها وهي ترجف : ياااارررب يسّرهـ
شهقت ماتكمل كلمتها ، تبكي بحرقه وألم ، كل مره يزيد ألمها عن الي قبله ،
،
«اليوم الثاني ، بيت خيّال »
نطق خيّال يرفع صوته : نجد
نطقت نَجد وهي بالمطبخ: نعم
نطق خيّال: اسلووب بالله ، المفروض اصبّح على وحده تقول صبّحك الله بالخير حبيبي ، ولا تصحيني بـ قُبله اسلاميه خاليه من الفِتن والمعاصي
طلعت من المطبخ نجد تنطق: خاليه من الفتن والمعاصي اجل ، المعاصي والله شوفتك
نطق خيّال : اح
هزّت راسها بالايجاب : اي نعم
رفع خيّال سَهم فوق ينطق: ها امشي امسكي ورعك
نطقت بخوف: يمه ضناااي، نزززله
ضحك خيّال يجلس وسَهم معه ، ضحك بقوّه ينطق: ياربي ياربي ، تقوول ضناااااي
انهى جُملته يضحك بكل مافيه ، يتشمت فيها وفي مُفرداتها ، وتقدمت نجد بتاخذ سَهم من حضنه وتعثّرت برجل الطاوله وطاحت على خيّال ، ونطق وهو يضحك: ارحبي
ضحكت نجد: ياكلب كله منك ،
قامت تعتدل بوقفتها ، واخذت سَهم منه تجلس على الكنب ، وتلاعبه ،
ابتسم خيّال يتأملهم ، امانيه تتحقق قدامه ، ويوم عن الثاني يزيييد حُبه لها ، عيونها حِكايه ، ورمشها الطوييل حِكااييات ، ملامحها الناعمه والمُلفته بنعومتها ، وجهها النيّررر ، وغمازتها الي زادتها حلاوه ، او بالاصح هي الي تزيد الغمارات حلاوه ، التفتت له تشوفه يناظرها: مهووس مهووس
نطق خيّال يأشر على نفسه: انا؟ مهووس؟
نطقت نجد ترفع حاجبها: لا، من قال؟ ابد
التفتوا من جَلس سَهم ينطق بتلعثم: د دادا
ضحكت نجد بفرحه تبكي وهي حاطّه يدينها على فمّها بذهول ، ضحك خيّال يستوعب ، ونزل من الكنب ينطق لسَهم وهو يضحك : دادا
ضحك سَهم ونطقت نجد: يمه بسم الله علييك اُمي انت
ضحك خيّال يناظر فرحتها فيه ، سكت يعطيها مجال ، وتقدمت لخيّال تنطق: خيّال جلس ، يمه جلس وتكلم
ضحك خيّال : قولي ماشاء الله لاتعطبين ورعي
مسحت دموعها وتقدمت تجلس قدامه تنطق: لبيه ياكل سهومي انت ، ياجعل مايجلس غييرك
نطق خيّال: ابك لا ، ورعاني المُستقبليين ياهيه
ضحكت نجد وسط دموعها تمسحهم: يووه كل تراب
خيّال : خلاص من يوم ورايح مايدخل عند الحريم
نطقت نجد تناظره: شفيك مستعجل انت ؟
،
اتصّل راجح على جسّاس : هاه وينكم ؟
نطق جسّاس : يبه الله يسعدك ، شفيك حارّ ، هوّنها وتهون ، والا ترانا ماعادنا طالعين برّ
نطق راجح: وين وصلتوا خل كثرة الهرج
نطق جسّاس : داخلين الديره
قفّل راجح ، والتفت على نوف الي نطقت : من عزمتوا ؟
نطقت خزنه: ماحنّا عازمين احد ، ماغير العايله
التفتوا لامجاد الي واقفه بنص الدرج ومعها عِزبة احمد تنطق: ساعدوووني
مشت لها نوف تشيل معها العزبه ونطقت: ولّ ، وش شايل بعزبته ذا
نطقت امجاد: وربي ادميه مو عزبه
نزلوها البنات بالحوش ورجعوا يدخلون ونطق راجح: عمّي اخو ابوي بيجي ، لاتلبسن بناطيل تراه نقّاد ،
نطقت نوف:ليه شدخل النقد بالبنطلون؟
ناظرتها امجاد: التفكير القديم حياتي ، ماعندهم كذا ، لو يشوفك ببنطلون يحسبك فاصخه
ضحكت نوف: ماتوصل !
نطق راجح: توصل وتعداها ، البسن جلابيات ولا قمصان ولادبروا اعماركم
ارسلت امجاد بالقروب تبلّغ البنات ان جدّهم ، عمّ ابوهم بيجي ،
دخل احمد ينفض يدينه من التراب ينطق: خلصت ، باقي شيء ؟ القهاوي وين
نطق راجح: القهاوي نسويها عند البل هناك ،
التفت على نوف ينطق: يالله روحوا البسوا عجلوا
طلعوا البنات لغرفهم يلبسون ، وبعد دقايق خلصّوا مكياج خفيف وشعورهم ، ولبسوا عباياتهم ينزلون ،
صفّق راجح: يالله على السيارات السيارات
ركبوا البنات في السيارات يتوزعون ، ونطق احمد: انا مامعي احد ياهوه
فتح شبّاك سيارته راجح يطلع راسه ينطق: رح جب اهل عبدالعزيز من الفندق ،
ركب احمد سيارته وحرّك للفندق ، بينما راجح والي معه راحوا للبل
،
تقدم خيّال يشيل سَهم ونطق يرفع صوته: يالله يانجد ساعه
مشت له نجد تنطق: شسوي كنت خالصه ولابسه فجأه البنات يقولون جدّك ، عمّ ابوك ، بيجي ، ورحت لبست لي مخور
توسعت عيونه بذهول: جدّي حازم ؟
هزّت راسها بالايجاب ونطق : ياليل الليل
نطقت نجد : ليه ؟
ناظرها خيّال: مع كامل احترامي لابوي ، بس جدّي ذا كل ماشاف شيء طلع فيه عيب ، ونقّاد ، يالله العاافيه صدق
،
«عزبة راجح ، البل ، الساعه 7:30 صباحاً»
كانوا كلهم توهم واصلين ، نزلوا من سياراتهم ، والتفتوا من سمعوا صوت السياره ، وناظروا جسّاس الي يضحك ، فرشوا العيال السجادات الحمراء ، ونطق راجح: ها حطّوا ورا الكبينه [الكرفان] السجّاد الثاني للحريم
نطق احمد يحكّ دقنه: اصواتهم توضح يبه ، نبعّدهم شوي ؟
نطقت العنود: ولا تعال يا احمد ، حطّنا في جلسه وحده مادام عمّي حازم جاي ، نجتمع كلنا سويّا
نطق احمد: لا ياعمّه انا قلت ببعدهم والحين جايتني تقولين جلسه وحده ؟
نطقت خزنه بحدّه : احمد اسمع كلام عمّتك !
تافف احمد وتعاون مع العيال يبسطون سجّاد الحريم جنبهم بالظبط ، بينهم بس الوجار حقّ الحطب ،
تخصر احمد من خلص الشغل ينطق: ارتحتوا ؟
هزّ راسه سعود ينطق: كذا مظبوط
التفت سعود من جت الجوهره وبيدها رعد ، ابتسم: ماشاء الله ماشاء الله ، هاتيه
تقدمت الجوهره تقبّل راس سعود ، ومدّت عليه رعد يسلم عليه وياخذه ، نطق سعود ينطق : حيّ الله ذيبان
التفت راجح يتفقّد روز ونطق يعقد حجاجه: روز وينهي ؟
استغربوا من مالقوها ونطق راجح بغضب :ماجبتوها
نطقت خزنه بخوف: انا متاكده انها جت وراكبه السياره معنا بعد ، يمه بنتي ،
نطقت نوف برعب : الا وجالسه جنبي بعد
رفع طرف ثوبه احمد يستعجل خطواته ويصرخ : روووز
نطق راجح باستعجال: روحوا روحوا دوروها يمكن عند النياق
نزّل خيّال سَهم في حضن نجد ، وركض لجهة البل ، ناظر عامل النياق ونطق: ماشفت روز ؟
هزّ راسه بالنفي ، ورجع لهم خيّال ينثني يثبت يدينه على ركبته بتعب ينطق :مالقيتها
مشى محمد لجهة الوايت ، وانثنى يناظر تحته ، وشافها تلعب بالتراب وتضحك على وضعهم وهم يدورونها ، وسحبها مع طرف ثوبها وهو يضحك ، وشالها يمشي لهم وهو يضحك ويقرصها بخفّه: ملكّعه هاه
ضحكت وهي تلعب باللعبه الي بيدها ، وناظروها بذهول ، ماتوقعوا تكون تحت الوايت ، وابتسمت عهود تناظر محمد وهو يضحك مع روز ،
نطق راجح: عمّي جاء جاء
اعتدلوا ونزل حازم من السياره ، وتقدم بعصاته يمشي لجلستهم وسلمّوا عليه واحد تُلو الآخر ، ماعدا الهنوف الي ماتحلّ له ، بالنسبه للجوهره ونجد وعهود سلّموا عليه بِحُكم انه جدّ ازواجهم ،
ناظر الهنوف حازم يأشر بعصاته وهو جالس: منهي بنته هذي
نطق سلطان:بنتي ،
هزّ راسه حازم بالايجاب ونطق: ماعندك غارها ؟
ناظره سلطان ينطق: الا عانها ذي الي سلمت عليك ، نجد حُرم خيّال
نطق حازم: ناركم وراها طافيه ياراجح؟ وحريمكم وراهن جلوس هنه ؟
تنهد راجح ينطق : العنود ياعمّي تقول بنجلس مع عمي مادامه جاء
هزّ راسه حازم والتفت لرعد الي لابس شورت ونطق: هذا ولد من ؟وراه ملبّسه الماخوذ هذا ،
نطق جسّاس بحدّه: ولدي ، لبسه حنّا احرار فيه
هزّ راسه بالايجاب حازم يسكت ، والتفت راجح يأشر لجسّاس بإنه يسكت ، هم يدرون جسّاس مُستحيل يسكت لحازم لانه دايم يتمادى عليه ، وينتقد ايّ شيء ، ومايعجبه العَجب ، وبالنسبه لجسّاس مو مجبور يسوّي شيء يعجب حازم ، وبالعكس يردّ عليه بعشر ، وصار حازم مايمسّ اي شي له علاقه بجسّاس بكلمه ، يخاف انه يكسحه قدامهم ،
نطق راجح: صبّ القهوه ياولد
التفت خيّال لاحمد وقام احمد ياخذ الدلّه يمشي عليهم فيها ، واخذت الهنوف دلّة الحريم تصبّ لهم ،
نطق سيّاف : جابر واهله بيجون عزمتهم ، احمد قمّ شلّ فرشات الحريم ورا الكبينه
نزل الدلّه احمد وابتسم بإنتصار ، انه بيبعدهم عنه عشان اصواتهم وبالنسبه له "عيب "
وقفوا البنات يشيلون الاغراض الي على السجاد ، وتقدموا العيال ياخذون السجاد كلّه ويحطونه ورا الكرفان ، نزلوا الاغراض البنات ، وتقدم جسّاس ينطق: يمه قدر الذبيحه الي فالكبينه كويّس والا تبون اجيب غيره ؟
وقفت العنود تنطق: دقيقه ماشفته ،
دخلت العنود الكرفان ودخلت المطبخ تحديداً ، ناظرت القدر تنطق: لا زين معليه ، جب لي الراس بنشويه ،
هزّ راسه بالايجاب جسّاس ونزل من الكبينه يروح لجهتهم واخذ نص الحطب يحطه بعيد عن الكرفان عشان ريحة الشوي ، وشبّ النار ونزل الراس على الكيسه عشان العنود تجي وتشويه ،
نطقت الجوهره: وحده تتكلف بعيالي لو سمحتوا بروح اساعد خالتي
نطقت نجد: اي والله حتى انا وحده تاخذ سَهم ، مايتعّب بنات بس راقبوه وحطوا العابه عنده
نطقت تِذكار : خلوّهم هنا كلنا جالسين ، واذا راحت وحده البنات موجودين عادي
قامت الجوهره تنزّل عبايتها ولبست الجلال تلفّه عليها ، وكذلك نجد ونوف ، ومشوا لمكان العنود يساعدونها ،
حطّت الراس العنود على النار واخذت السكيّن تمررها عليه ، وتقلّبه ، نطقت الجوهره: خاله اقول لجسّاس يجيب حطب ثاني ؟ عشان نحط القدر الكبير ونطبخ فيه الرز والمفطّح
هزّت راسها بالايجاب العنود ونطقت: نجد ارفعي اكمامي
تقدمت نجد ترفع لها اكمامها ، ونطقت : مشكوره يا امي
ابتسمت نجد تكتفي بالصمت وتساعدها ، ونطقت نوف: بروح اجيب القدر مع الجوهره ، نجد خليك هنا عشان اذا امي احتاجت شيء
نطقت نجد: اوكي روحي
مشت نوف للكرفان تدخله وناظرت الجوهره الي تقطّع الكِبده ، ونطقت : اشيل القدر ؟
التفتت عليها الجوهره : اي وديّه وتعالي تشيلين الذبيحه معي
نطقت نوف: حيّه !
ضحكت الجوهره: اما عاد حيّه ، والراس الي خالتي تشويه برا وش ؟
ضربت جبينها بخفّه: نسييت
شالوا الخيشه الي موجوده فيها الذبيحه ينزلون فيها من درج الكرفان ، وتوجهوا للعنود وناظروا جسّاس وخيّال الي مشمّرين اكمامهم ورابطين ثيابهم على خصرهم ، ومتعصبين بـ شُمغهم ويساعدون العنود ، تقدم جسّاس يشيل الخيشه عن نوف والجوهره ، وحطّ خيّال القدر على النار وحطّت نجد المويه بالقدر تَغلي ،
نطق جسّاس : خيّال رح جب سيارتك حطها قدامنا هنا
عشان مايلمحون الحريم
هزّ راسه بالايجاب خيّال وراح لسيارته وركب يحرّك وقرّب منهم يغبّر عليهم بالتراب وضحك يلبّق،
نطق جسّاس: لععننننننه ياكلب
العنود : ماممنككك فووود ، خرربت العيششه علاناا
نطقت نوف : لا يمه ماجاها شيء الحمدلله
نطقت العنود بغضب: اي لانه لو جاها شي لعنت خيّره
نزل خيّال وهو يضحك ، وناظر نجد الي تفرك عيونها بكوعها ، نطق وهو مبتسم: تحتاجين مساعده ؟
نطقت نجد بعصبيه: كل تراب
ضحك خيّال :وكلّتكم ايّاه
التفت له جسّاس ينطق بحدّه: ولد
نطق خيّال: ياخي شفيكم كذا نفسيات ، ولدي وين ليته يطلع علي بس
نطقت العنود وهي تحرّك الرز: عوذا ، عوذا ، عوذا
خيّال: افا يمه ليه
نطقت العنود: ليته يسلم منك بس
ضحك خيّال ينطق: يا إني رافع ضغطكم
نطق جسّاس: زين انك داري
،
نطق جابر: ياولد ماش إرسال
هزّ راسه سيّاف بالايجاب ينطق: لا والله ، رح عند العيال هناك
التفت عليه جابر ينطق : وين؟
نطق سيّاف يأشر له : سيارة خيّال هناك ، شكلهم هناك لقوا لهم ارسال
وقف جابر ينطق: اجل بروح اتعيّن ، يمكن القا
تجاهله سيّاف يصبّ القهوه ونطق حازم: وراك تفكّ الغليّم هذا على محارمكم
نطق سيّاف : هذا منّا وفينا ، مايسوي الي تظنّ
هزّ راسه حازم يناظر راجح: ايه قولوا تسذاه لين يطيح الفاس بالراس ، ثم تعالوا قولوا والله انك قلته ياعمّي مير مانتبهنا
نطق سيّاف : ماننا بجايينك ، ولا حنا معتبّين علاك
نطق بحدّه حازم: من انت ولده انت؟
نطق سيّاف بحدّه اكثر: ولد عبدالعزيز ، بتخوفني ؟ عان ابوي جالس
التفت حازم على ولد اخوه ينطق: هذي تربيتك لولدك ياعبدالعزيز ؟
تنهد عبدالعزيز ونطق : تربيتي ماهيب شينه ، لكن كلٍ يحصل قَدره عند عيالي ،
ضحك سيّاف بسُخريه يناظر حازم ونطق: من طقّ الباب لقى له جوواب يا
ضحك بسخريه يكمل: حازم
احتدت ملامح حازم ينطق: يبي لكم من يربيكم انتم
كان بينطق سيّاف ويردّ يلجمه لولا راجح الي قاطعه ينطق: عيّنوا من الله خير
،
« جابر »
مشى وهو رافع جوّاله يدور الارسال واستوقفته الهنوف تنطق: هيه وين رايح؟
عقد حجاجه جابر يصدّ للارض من عرفها من صوتها انها الي شافها بحفل عيال جسّاس وخيّال ، ونطق: رايح للعيال
نطقت الهنوف: بس البنات موجودين !!
عقد حجاجه ينطق: من ؟
نطقت الهنوف : حريم العيال
هزّ راسه بالإيجاب وكان بيروح و التفت لها ينطق: ابي مويه ولا عليك امر يا
قاطعته الهنوف تنطق: الهنوف
ابتسم جابر وهو صادّ : ونعم
ابتسمت الهنوف بتسليك ماتعرف تردّ ، ومشت للكرفان تدخل تجيب موية ، وطلعت ونطقت تِذكار: لمين
نطقت الهنوف بوهقه: لي !
هزّت راسها تِذكار بالايجاب ومشت من عندهم الهنوف لجابر ، مدّت عليه المويه ونطق:اتعبتك معي ، مشكوره
نطقت الهنوف : ميرسي
عقد حجاجه جابر ينطق: اسلمي ؟
ابتسمت تنطق: سلامتك
مشى يتخطاها جابر ومعه المويه
وناظر سيّاف الي عند البل بعيد عن الكرفان وحاطّ لهم سجّاد واحد لحالهم ومراكي ثنتين ، جلس جنب سيّاف يرتكي على المركى ويناطر البل ينطق: الله ينكبك ياولد
نطق سيّاف: افا ليه
جابر : العيال عندهم حريمهم ، حاطين السياره بينا وبينهم وانت ارسلتني الله ياخذذك
ضحك سيّاف ينطق: وش يدريني انا ،
عقد حجاجه باستغراب يكمل : المويه من معطيك اياها
سكت جابر بربكه يخاف انها اخته ، ونطق : الحين انت عندك خوات؟
سيّاف : اي عندي ، وش الطاري ؟
نطق جابر بتوتر: وش اساميهم ؟
عقد حجاجه سيّاف : اخوو من طاااع الله
نطق جابر : طيب عندك اخت اسمها يبدا بحرف الالف
هزّ راسه بالنفي سيّاف وتنهد بإرتياح جابر ،
نطق سيّاف: العلم بحر ، وش عندك تسأل ؟
تنهد جابر ينطق: اهخخيه يابو عبدالعزيز
ضحك سيّاف من استوعب انه شاف وحده وتوقع انها اخته ، ونطق يضحك بذهول : ابببن عزيّز صدددق منهي الي تبداا بحررف الالف
ضحك جابر من قفطه ونطق : توقع انت
سكت سيّاف يتذكر ان زوجة جسّاس بحرف الالف بس ، ولثواني استوعب انه يقصد الهنوف ونطق : يلععن شكلكك ، ماتوقعتها مننك
نطق جابر بسرعه: لا والله اسمعني ، نيتي طيبـ
قاطعه سيّاف الي ضحك من خلّاه يقمط ، ونطق جابر بحدّه :كللب طووول عمرك تبقى كلب
نطق سيَاف وهو يضحك بشكل هستيري: اه يابطني
صدّ جابر ينطق : جعله للفقع
ضحك سيّاف : استهد بالله يارجال!
هزّ راسه جابر يرفع حاجبه :جتك
،
ناظرتها نجد: وراك بلا انتي
التفتت الهنوف لورا ورجعت تناظر تنطق: ماوراي شي والله
سكتت نجد تناظر سخافتها ، وناظرتها الهنوف ،بعد ثواني من النظرات نطقت نجد: تصدقين انك حماره وانا الي تكلمت معك حماره بعد
نطقت الهنوف: بالنسبه لـ إنك انتي حماره ، اتفق ، لكن انا ؟ تخسين
ناظرتها نجد بتنطق لولا اسماء الي قاطعتها: يافضحي العنود تشتغل لحالها وانتن وقوف هنا
نطقت نجد: لا الجوهره تساعدها
مسكتها اسماء مع كتفها تمشّيها لجهة العنود ،
ضحكت العنود من شافتهم ، ونزلت المغراف تنطق : وش العلم
نطقت اسماء تفكّ نجد: اكرفيها ، مسموحه ، وعلميها السنع يـ ام جسّاس ، عليتس فيها
التفتت نجد تناظر امها بذهول وناظرتها اسماء تنطق: وانا صادقه لاتناضريني كذا ، صرتي ام خلاص بكره خيّال يعشّي ويغدّي لينتس ماتعرفين تطبخين
نطقت العنود: لالا فيها الخير والبركه
ابتسمت نجد: صادقه
نطقت اسماء : مدّاح نفسه تسذوب يا امتس
كشّرت نجد تنطق: امي مستقعده لي اليوم
،
انصعقت سِهام من رِسالة ابوها ، بين فَرحه وصدمه ، تناظر الرساله ، وفزّت برعب من نطّت عندها نوف تسأل : وش وش
ضحكت سِهام بحياء : وش تتوقعون مثلاً مثلاً مثلاً
نطقت الجوهره بسرعه: يخصّ احمد
ناظرتها سِهام بذهول: يمه يمه اعوذ بالله ، جنيّه
ضحكت الجوهره : صحح؟
توسعت عيون امجاد بذهول: مقدر !! احمدوه بيتزوج ؟
نطقت نوف : اويلي بنات من يصددق ! احممد؟ وزواج؟ يمه مستحيل
ضحكت سِهام: تبوني ارفضه ؟
نطقت الجوهره ترفع عصا العنود الي جنبها : تخسين وتعقبين ، والله ادخل ذي بحلقك، مشغلتنا حب وحركات واخر شي ترفضين؟
نطقت سِهام: بقبل عشان الجوهره ها ، مو لشيء ثاني ابد ترا
الهنوف: طيب وجامعتك؟
سكتت سِهام ولوهله نطقت: تبون الصدق؟ مابي اكمل ، بنات تخصصي كئيب بموت
ناظرتها نوف: وش تخصصك ؟
نطقت سِهام بحزن: ادارة اعمال
عقدت حجاجها العنود: احمدي ربك ، غيرك يتمنى القبول وانتي تتشمتين
نطقت تِذكار: احس احس ، ان الي مانقبلوا ، بيجيهم العوض ويطلعون اطلق من الي انقبلوا ،
نطقت الهنوف: صادقه احس لهم مُستقبل مدري ليش
نطقت نوف : اقول انتي ، ارسلي لابوك موافقه يلا
ناظرتها العنود: خلي البنت تستخير اول
ضحكت نوف بسُخريه: ماتفووتني الامور ذي يا ام جسّاس ، استخرت بدالها واحس موافقه ، يلا خير البرّ عاجله
ضحكت الجوهره تنطق: لا سِهام ، مثل ماهي مطّت موضوع ساير وماوافقت عليه غير بعد دَهر ، صيري زيّها ولاتوافقين على اخوها غير بعد سنه ، حقّك فكري
ناظرتها نوف بذهول: ايا النذله ! بعير انتي بعير؟ ماتنسين؟ مايفوتها شيء اعوذ بالله
ضحكت الجوهره ترفع حاجبها: انسى موضوع اخوي؟ حشى
ضحكت نوف ورجعت تناظر سِهام ونطقت
باستعجال :ابك هاه وش قلتي ؟
هزّت راسها سِهام تناظر فوق تنطق بلكاعه :افكر
ضحكت الجوهره تصرخ بفخر: تربيييتتتي
صرخ جسّاس: الهجااد
وتبعه صوت احمد الي صرخ بحدّه: العلممم وييشش
سكتوا البنات يقمطون العافيه ، ونطق خيّال من ورا الكرفان وهو صادّ : البسوا غطاويكم وتعالوا ، جابر راح
لبسوا البنات وبسطوا فرشاتهم جنبهم ، وجلسوا كلهم بجلسه وحده، والتفتوا من جاء جسّاس بالحليب ، وجلس ينطق: الي يشرب الطاسه كامله له خمسمية كاش الحين
قالها بِحُكم ان ماحد منهم يحبّ الحليب الا قليل ،
نطقت سِهام : لو انها الف وافقنا ، بس ماش خمسميه قليل
ضحك جسّاس : الف يالله ، وش قلتوا
ناظرته سِهام: اي وش عاد الف؟ لو انها الفين
نطق احمد: وصليها عشر الاف شرايك
ضحكت سِهام بخفوت ، ونطقت تِذكار بتردد: انا
ناظرها جسّاس ونطق: صامله؟
هزّت راسها بالايجاب ومدّ لها الطاسه جسّاس ، واخذتها تتنهد : امبيه شلون تشربون ذا انتم
نطق نواف: ايا الرخممه
ناظرته تِذكار بطرف عين واخذت الطاسه تشرب من تحت الجلال ارتعش جسمها من الطعم ، وضحكوا من حركتها ، ونطقت: يابوي شلوون تشرببوه ذاا
اخذته نوف: مالها الا رجالها
تنهد ساير: تراك اُنثى يرحم ابوك
ضحكت نوف : خلاص لعيونك مالها الا بناتها
نطق خيّال: بناتها ولا عيالها ها ها ها
التفت من تسلطت الانظار عليه وعلى راسهم حازم الي يناظره بحدّه ، ونطق يضحك بخفوت: شدعوه نلطف الجوّ شوي
ضحكت نوف وقدّمت الطاسه لفمّها تشرب بشويش ، نزّلت الطاسه من انتهت من شُربها وضحك جسّاس: سوّتها بنت راجح
ضحكت نوف تاخذ المنديل تمسح طرف شفايفها ، ونطق جسّاس : ها دوّري الفلوس عند رجالش
ناظرته بذهول تتلاشى ابتسامتها : خير جسّاسووه
نطق ساير: تبشرين بها ، لكن اول انت ، عطها الالف واعطيها من عندي الف ، اما اني اعطيها عنك لا بالله تخسى
نطقت العنود تضحك بهدوء: المؤمنون عند اقوالهم يا جسّاس
طلّع من جيبه خمسميات ثنتين جسّاس يمدّهم على نوف وناظرته بعد ما اخذتها تنطق: غصببب
ضحك جسّاس : قليلة خاتمه
،
«بيت وافي»
ابتعد عيّاد عن هِتان من دخل ابوه وابعد يده عن شعرها الي كان شادّه ، وداخل بنقاش معها ،
ناظرهم وافي يبدّل انظاره بينهم ينطق: وش عندك انت وياها ؟
مسحت دموعها هِتان تسكت ونطقت لمياء بتلعثم: اخـ اخوان عادي يابو عيّاد تصير تصير
التفت عيّاد على ابوه ينطق: ترفع صوتها علي
صرخ وافي: لانك تستاهل ، تستاهل يالرخمه ، تمدّ يدك على اختك ياكلب؟
غمّض عيونه بقوه وغضب عيّاد ، ورجع يناظر ابوه: يبه
رفع صوته وافي بحدّه: وحطبه الا وحطبه ياللي ماتنتخي
جلست هِتان وهي تعدل شعرها وتمسح دموعها ، ونطق وافي لهِتان: جاك خطّاب
رفعت راسها بسرعه هِتان ، ونطق وافي يكمل: فواز بن سلطان ، ولد خال الجوهره بنت عمك
ناظرها وافي وكمّل: تبينه؟
سكتت هِتان تناظر لعيّاد ، تبي توافق وتتخلص منه ومن هواشه ومنازعه لها ، تبي اي وسيله تهرب فيها منه ، ابوها كبر وانهدّ حيله وماصار يقدر في عيّاد ، يهاوش ويضرب ، بس ماقدر فيه ، طلع عن سيطرته ولايفيد فيه شيء ، التفتت لابوها تنطق: موافقه
ناظرها وافي بذهول: بذا السرعه ؟
تأفف ينطق عيّاد : اي لانها مشفوحه
التفتت عليه ترمقه بنظراتها ورجعت تناظر ابوها الي نطق: نصبح وابلّغه ان شاء الله
قامت هِتان تطلع لغرفتها ، ووقف عيّاد يلحقها ورفع صوته وافي: خلني اشوفك معتّب على باب غرفتها
تأفف عيّاد يغير مَساره ويطلع من البيت بـ أكمله ،
تنهدت لمياء بتعب تنطق: الى متى
ناظرت وافي الي تجاهلها وقام يطلع لغرفته ، قامت تتبعه وتدخل الغرفه تتوكل على الله وتسلّم امرها له وتنام ،
،
صحى فوّاز على صوت جواله ، وردّ ينطق بنعاس: هلا
نطق وافي: صحّيتك اعذرنا يابوك
اعتدل بجلسته فوّاز من ادرك انه وافي ، ونطق: سمّ ياعمي ، لا ابد معذور
وافي: مثل ماقلنا لك ، الراي راي البنت والبنت موافقه ،
توسعت عيونه بذهول ، يهمس بداخله: معقول بذي السرعه؟
ابتسم ينطق فوّاز : الله يبارك اجل ياعمّ ، بكره نملك وبعده بيومين حفله محفوفه بيننا
نطق وافي: ان شاء الله
قفّل وافي ونزّل جواله فواز يطلع من المشب يغسّل ويرجع يلبس ثوبه ، ونطق خيّال: المباراه اليوم ياعيال
نطق نواف: نحط لنا جلسه بالحوش ونخليهم يسوون لنا شيء ننقنق عليه
نطق سلطان: تبا تنقنق اجل؟ البنات بيتابعون المباراه معكم ، لو جتني وحده تشتكي لعنت خيرك انت وياه
ناظرهم فوّاز : غشّ قسم بالله يبه ، ليش مايتابعون داخل؟ قسم بالله قرف ، مناشبينا بكل شي
ناظره سلطان بحدّه ، وسكت فواز يصدّ يستغفر ونطق خيّال: خلاص بتقوم القيامه لو جو؟ بالعكس نجدول عليهم
ضحك جسّاس: هذا همّه الجدوله ياريجيل
مسك ياقة ثوبه فواز بغبنه يشدّها لقدام ينطق: هذا الي غابنّي ياعيااالل ، بيفقع مرارتي
ابتسم فواز من تذكّر ينطق: اي ابشركم
نطق جسّاس: اسلم
ناظرهم فوّاز : رسمياً انا مِعرس العايله لذا الاسبوع
توسعت عيون خيّال ينطق بفرحه وهو يضحك: احلااااا
ضحك فواز ونطق نواف: انا اخوك مادريت ياكلب ، منهي طيب؟
فوّاز: بنت عمّ حرمة جسّاس
صدّ خيّال ينطق: ياخال ابوي حكّ ظهري ،
رجع يناظره ينطق: اختصر لنا يارجال مالي قدره اتذكر منهي
ضحك فوّاز : بنت وافي
كشّر محمد: اخت عيّاد؟ عوذا
ناظره فواز: بتزوجها ولا بتزوج اخوها انا ؟
ناظره محمد يبتسم ويأشر باصبعه عليه: ذي بعد صح
،
«هِتان»
مقفّله الباب وتسمع تهديداته ، سكّرت اُذنيها بيدينها تمنع نفسها تسمع له ، نطق عيّاد: افتحي والا والله اكسرر الباب عليك
صرخت تنطق: انقلع يامُتخلف اذلف عني كفّني شرّك
نطقت لمياء تمسك كتوف عيّاد: خلاص يا امي انا اسوي لكم القهوه ،
ناظرها عيّاد بحدّه يصرخ: يمممه لاتجننينني !!
التفت يناظر باب غُرفة هِتان ، ينتظرها تفتح ونطقت لمياء بخوف: عادي عادي يمكن تتجهز ! تبيها تسوي قهوه وهي عروس ؟ لا يُمه الله يرضى عليك
تأفف عيّاد يبعد يدها عن كتوفه ينطق: يووه خلاص تراك محسستني اصغر عيالك
تنهدت لمياء تبتعد عنه ، وطلع من عندهم عيّاد يعدّل شماغه بعصبيه ، ناظر المملك الي نطق: الكتاب ، توقيع البنت
اخذ الكتاب وافي يطلع من عندهم وتقدم لغرفة هِتان وناظرها تبكي ونطق: ماتبينه؟
هزّت راسها بالنفي بسرعه تنطق: لا لا بس عـ
بكت ونطق وافي: وراك فوّاز ، ماعاد يقدر عليك ، وقعي
اخذت الكتاب توقع ونطق وافي: روحي المقلط واناديه
طلعت هِتان بفستانها السماوي الهادي ، تسلّم على العنود ونوف وامجاد وخزنه الي يباركون لها ، وطلعت من عندهم تدخل المقلط وناظرت فوّاز الي ينتظرها ، وتقدم لها يسلّم عليها ويبارك لها واكتفت بالصمت ، وبعد ثواني دخل عيّاد بغضب: للحين هنا انتي ؟؟
سكتت هِتان بتوتر ، وتقدم لها يسحبها بقوه ، وتقدم فواز يمسك يد عيّاد بغضب يفكّها عن يد هِتان ، ويلوي يدّ عيّاد ورا ظهره وتاوه بألم عيّاد : ااااهخ فكّ
نطق بحدّه فواز: طلعت من ذمتكم، على ذمتي ، يعني اشوفك مادّ يدك عليها ، ولا اشوفها مشتكيه منك ،
هزّ راسه فواز بأسف يكمل: مايحصل لك طيب ، اسالهم عنّي يعلمونك
ابتعد عنه عيّاد يكتم غضبه ويطلع من عندهم ، وتنهدت براحه هِتان
ونطق فواز: لاتخافين منه ، رخمه ماعنده ماعند جدّتي ، يمسّك بشيء عطيني نغمه بس
اخذ جوالها يدخّل رقمه فيه ، وطلع من عندها للمجالس،
ناظره عيّاد لين طلع من عند هِتان ، ودخل لها ينطق: اذلفي سوّي قهوه
ناظرته وسكتت تتجاهله تطلع ومسك يدّها بقوّه يستوقفها ، ونطقت : اكلّمه؟
ناظرها بذهول يعقد حجاجه : منهو؟
رفعت جوالها تورّيه اسم فواز وفلت يدها بغضب ،
طلع من عندها عيّاد وابتسمت بإنتصار تنطق: هذا نظامك ياعيّاد ؟ حلو
ضحكت بسُخريه وتحسّ بثلج على صدرها مِن عرفت كيف تتصرف معه ، والتفتت لأمها الي دخلت تنطق: وينك انتي ؟
نطقت هِتان: موجوده
مشت تدخل مع امها للصاله الخاليه من الضيوف ، راحوا كلهم بعد ماسلّموا عليها ، التفتت لمياء من دخل عيّاد ، وجلس ينطق لهِتان: جيبي لي ماء
تجاهلته هِتان تقلّب في جوالها ، وشدّ على كفّ يده بغضب يتأفف ونطقت لمياء: قومي جيبي ماء لااخوك!
التفتت هِتان لـ امها تنطق: عنده يدين؟ عنده رجلين؟ يقوم هو
ناظرتها لمياء بذهول ونطق عيّاد : نفخ راسك علي؟ بتندمين
تجاهلته هِتان واستغربت لمياء الي يصير ، ماهي فاهمه هدوء عيّاد الـ غير مُعتاد ولاهي فاهمه قوّة هِتان الي طلعت على عيّاد فجأه ، وسكتت تدعي انه خَير ،
،
«بيت راجح - الحوش »
بدأت المباراه ، ونطق خيّال : الفقراويه لايتابعون ، يعرفون النتيجه
نطقت عهود تضحك: يابنات يقول فقراااووويه
ضحكت بهستيريا ونطقت وهي تتنفس بسرعه اثر الضحك: لككك مييين عمم يحكككي ، طاااقيييه؟
صرخت تضضحك بشكل مُبالغ فيه
وناظرها محمد: سكرانىه قبل تجين انتي؟
نطق خيّال : عشان ماتحسّ بألم النتيجه، ارحمك صراحه
رصّ على بيالة الشاهي جسّاس بتوتر من اقتربوا الفريق الي ضدّهم النصر لمَرمى الهلال بالكوره، انكسرت البياله بيدّ جسّاس وشهقت الجوهره: يمه ، شفييك
نفض يدّه جسّاس يمسحها بالمنديل ، وناظرهم ينطق: مافيه شيء ، اسكتوا بنتابع
سجّل النصر هَدف وضحكت عهود توقف بفررحه وتصررخ: هااااااه ياطووااقي وششش تقولوون؟؟ مااسمعع
تأفف محمد ينطق: من يضحك اولاً يبكي اخيراً ، اهجدي
ناظرته وهي تجلس: نشووف ،
اقترب لاعب من الهِلال لمَرمى النصر ، وتقدم لاعب النصر يصدّها ، وصرخ جسّاس يوقف بغضب ويأشر على التلفزيون: الععععن ابووووه كلبببب
ضحكت عهود بخفوت تكمل تتابع بإندماج ونطق محمد: بتشوفون الحين ، ان ماجابها الهلال علي بالحرام لحلق شنبي
ضحكت عهود تلتفت له: كيف استعداداتك تشوف شكلك بدون شنب؟ باقي شوي بس
لانت ملامح عهود من سجّل الهلال هدف ، ونطقت تصرخ: لااا خيررر مستحيل ، تحكيم يابووي تحكيم
ضحك محمد: اي يصير خير ان شاء الله
نطقت نجد: ادخلوا في نيّة الحكم بعد ! ياخي خلاص تقبّلوا انكم خسرانييين وماتعرفون تلعبون ، مو كل شيء تحطونه براس التحكيم
ضحك خيّال:زوجتي العزيزه اول مره تقول شيء صح
رمقته بنظراتها نجد ، ورجعت تكمل تتابع ،
سجّل الهدف الثاني الهلال وفزّ محمد يصررخ بفرحه ، ويضحك بإنتصار ، صرخ ينطق وهو يضحك: ايييييييه اييييه هذااا الهلال الي انا اعرررفه
مسكت راسها عهود تدوخ اَثر الهُبوط في الظغط ، وناظرتها الجوهره تنطق: عهود؟ عهووود؟؟
تسمعها عهود والرؤيه مغبّشه ، وسكتوا كلهم يناظرونها بصدمه ، وتقدم لها محمد ينطق: لابوها من كوره ، ابك ماتعودتي على خسارات النصىر للحين؟
سكتت عهود تمسك راسها ترصّ عليه ، وتقدمت الجوهره بجهاز الظغط ، اخذه محمد يسكّره على يدها ، وناظر هبوط الظغط الي عندها ، وبعّد الجهاز ينطق : جيبوا حليب بسرعه
وقفت نجد تدخل المطبخ وتجيب الحليب وطلعت لهم ومدّته على محمد ، اخذه محمد يفكّه لها ، وشربت منه عهود ، وبدا يرتفع عندها الظغط ، وضحك خيّال: قايل لك لاتهااايطيين وفريقك ذا
ناظره محمد بحدّه ، وقمط خيّال يسكت ،
،
ابتسم فوّاز ينزل من سيارته ودخل المشب ينسدح ، وناظر رسالتها الي محتواها " شُكراً مره ، ذا سايكو وماحد يقدر يوقفه عند حدّه وساعدتني انت "
سكت يحتار بردّه وبعد ثواني من التفكير ، كتب لها رسالته يرسلها " ابد بالخدمه ، وخلّيه يلمس منك شعره بس ، مثل ماقلت لك ، عطيني نغمه وانا اتفاهم معه "
ابتسمت هِتان تناظر رسالته وتعضّ على اصبعها تصرخ بخفوت ، ضحكت تنطق : خفيفههه
ارسلت قلوب بيضاء ، وسكّرت جوالها تضحك : يعني ابعد الشكوك قلوب بيضاء؟
،
زلّت عهود القهوه في الدلّه ، وجابت السكر تسكبه فيه نصّ فنجال سكر بالدلّه ، ضحكت بحقد ، وطلعت بالقهوه تنزلها بالنص ، وتقدم نواف يصبّها لهم ،
شرب من فنجاله محمد ، وتفله وراه يتافف: هذا وش؟ سكر بقهوه ؟
شرب منها خيّال ونزله بضجر : إفووووه، الرفله الي مسويه القهوه من ؟
ضحكت بسُخريه عهود وانتبهوا لها ونطق خيّال: عز الله انك رفله ،
التفت عليه محمد ينطق: احترم اني زوجها طيب
ضحك بخفوت خيّال : المره الجايه
نطقت عهود: عسااها نالت اعجابكم ؟ اهم شي عندي رضاكم تعرفون
نطق نواف : اي لا روعه ماشاء الله ، لاعاد تعيدينها
التفتوا من نطق خيّال : صفّررر ابك صفّررر
احترق دمّ خيّال وهو يصرخ ينتظر الحكم يصفّر ، وصرخ جسّاس : ياكلببب صفّررر
ضحكوا بفرحه من صفّر الحكم ، وفزّ خيّال ينطّ بفرحه ويصرخ: اييييييه ايييه
نزلت دمعة عهود تنطق وهي تشهق: قسم بالله كذب والله خير
بكت تثني راسها لتحت ، ونطق محمد: ترا كلها كوره
ناظروا محمد بذهول ونطق خيّال: ماخليت شي ماسويته والحين تقول كلها كوره ؟؟ كلها كوره يامحممد؟
نطق جسّاس:ابوك يالقرف ، قم قم انت وياه
ضحكوا وقام خيّال: انا رجال عندي كرامه ، بطلع بدون مطرود
ضحكت نجد: يعني اسفه بس لو انك مو زوجي بصدّق
نطق خيّال: هو مشكلتي انّي زوجك ،
تنهد يكمل: الله يعوضني
نَجمة تقديراً لتعبي💙
