في واحد من بيوت العاصمة السودانية ،سورة البقرة شغالة وقراءة ماهر المعيقلي البتبعث الطمأنينة في القلوب،كانت ست البيت لوله (زي م بناديها الكل) شغالة تمسح في الأثاثات حقت البيت ..وباين عليها الإرهاق طبعاً بسبب حملها في الشهور الأخيرة ..وجنبها ولدها العمرو خمس سنوات بلعب بالمكعبات بتركيز شديد..
-لو سمعتي كلامي ح يحصل شنو يعني! ..
إبتسمت وإلتفتت لراجلها الجا من شغله يداب ولقاها شغالة ومتعبة نفسها ..
-السلام عليكم ورحمة الله وبركاته.
إتذكر انه نسى يسلم لانو كل الشاغله تعبها حالياً..
-وعليكم السلام والرحمة والبركة ...لكن مش إتفقنا إنك ليوم الولادة م تتعبي نفسك ؟
مشت عليه بعد م شالت كباية موية ..أدتها ليه وهي موجهة كلامها لولدها الكان حاضن أبوه وم عايز ينزل منه ..
-أنزل ي ماما وأمشي كمل لعبك خلي أبوك يرتاح ..
أدى ولدو كيس حلويات ف إبتسم وشال الكيس وجرى لمكان لعبه ..عاين ليها ف بادرت هي بالكلام ..
-م بعمل حاجة مرهقة أو مؤذية ..بعدين شغل وم قاعدة أمشي ألهي نفسي بشنو يعني ؟
-كلام دكتورتك واضح يا لوله ويا ريت تلتزمي بيه ..
-حاضر .
-لقيت هسي الأولاد بلعبوا برا ..مع إني ناديتهم لكن ليه للآن م دخلوا !
-إتلهوا مع اللعب وبكونوا م ركزوا معاك ..المهم أمشي غير ملابسك وهسي بتلقاهم جو ...
(محمد خالد الرشيد ..جراح صدرية عمرو 40سنه ، متزوج أمل مختار السيد .. معلمة في مدرسة أساسية عمرها 35سنه ، وعندهم 3 أولاد ذكور وهسي حامل بطفلها الرابع ،وحياتهم سمنة على عسل اللهم بارك )
______________
حقبة زمنية أخرى ..
جامعة الخرطوم وتحديداً كلية التربية .
-آخ السنة كنا خريجين ..وح نتفك من التربية وسنينها ونتزوج ..
ضحكت على كلام صحبتها الواضح انها مستاءة شديد خصوصي بعد محاضرة مدتها 3 ساعات ..
-لخير يعلمه الله ..وبعدين إنتِ عايزة تتخرجي عشان تتزوجي ؟
-ماف شغف يا لوله..انا القراية دي كرهتها ..بيت زوجي يلزمني .
-(ضحكت)..لأ الظاهر انو المحاضرة دي ذهبت بعقلك يا وسن ..
-أقعدي أضحكي كدا يا لوله لما أجيك ب لوله صغيرة شايلها ابوها وانتِ تكوني جارية ورا طلابك ..
كانت مواصلة في الضحك على صحبتها الوحيدة والعزيزة لما جاها اشعار في التلفون ..
-أسكتي أسكتي شيخ تميم نزل فيديو جديد ..
