خبر حمل سمر فرحنا جداً وإكتملت فرحتنا ب رجعة فراس وميس الح يسكنوا معانا في البيت لأنو فراس بنى ليه شقة بفوق لينا ، كرمنا ليهم برضو وكانت لمة حلوة شديد ..
أويس يومياً بعيد لأبوي في موضوع وعد وانو إن شاء الله تتم خطوبة بس وهو ح ينتظرها لمن تتخرج ، لما اصرار أويس كتر أبوي قال ليه خلاص ح اشوف الموضوع ، طبعاً أويس إتبسطت شديد ودي كانت أول مرة أشوف أويس ساعي ورا حاجة بالجدية دي ..
بعدها أبوي إتكلم مع خالتي على أساس نمشي أنا وهي لخالتو سمية ونفتح معاها الموضوع وتشوف رأي وعد حتى بعدين تكلم خوالها وعمها لانو تقريبا وعد عندها عمين واحد متوفي والتاني عايش لكن ياهو مشغول بحياتو وم سائل فيهم حسب كلام خالتو سمية..
فعلاً مشينا مع خالتي لبيت ناس وعد وإتكلمنا مع أمها ..
-والله دا يوم المنى وعيال دكتور محمد كلهم م فيهم كلام ،ويابخت بتي براجل زي أويس وح أكلمها وإن شاء الله م تسمعوا إلا خير ..
دا كان رد خالتو سمية الرحبت بالموضوع جداً وكانت مبسوطة شديد والله ..
وعد في اليوم دا كانت شغالة جامعة ، قالت لينا بعد تجي طوالي ح أكلمها وبعدين بكلم أخواني ولو في قسمة ح تبقى بإذن ..
لما رجعنا البيت أويس لقيناهو منتظرنا في الباب وبسأل الحصل شنو ..
-اها بشرو قالت شنو ؟
-والله يا ولدي م عارفة اقول ليك شنو ..
طبعاً خالتي عايزة تلعب بأعصابو ونجحت طبعاً لما تعابير أويس إتغيرت وبدا القلق يظهر في وشو ..
-معقول تكون رفضت من البداية كدا ؟ ولا في واحد سبقني وادوهو ؟ااا ..
لما شفناه جادي م هان علينا ، عاينت لخالتي وهي عاينت لي وفي نفس اللحظة فكينا الضحكة...
-مالكم في شنو ، شايفين الوضع بضحك يعني ؟
-معليش يا ولدي لعبنا بأعصابك لكن أم البت ما شاء الله م قالت كلام شين أبداً والله ولو عندك قسمة بتعرسها م تخاف ..
وقتها شال نفس وقال ..
-الحمد لله ياخ م شفتو الأفكار السيئة البقت تخطر على بالي ..
ضحكنا كلنا تاني ، وهو ساق خالتي عشان يوصلها بيتها لانو قالت بناتها م في البيت وماشة عشان تعمل الغداء ..
أما أنا دخلت جوا ولقيت البيت فاضي قلت أحسن أمشي ل ميس بتكون براها ومالة ...لما مشيت ليها لقيت معاها وسن وسمر ..طوالي إستلموني أسئلة الحصل شنو وخالتو سمية قالت شنو ؟..كلمتهم بالحصل وطبعاً الموضوع كان شبه مزحة لانو أويس ومحمود ديل زول بصدقهم في المواضيع الجدية دي ماف لانو مزاحهم بموضوع العرس دا كتير ..
