ليلة الجمعة قاعدين كلنا حول التلفزيون وبنحضر في فيلم الرسالة ..اللي يعتبر تراث وتقليد بالنسبة لينا ...كل سنة يتعرض بنحضره وكأنها المرة الأولى ..
-قالو إنو مخرج الفيلم شيعي ..م ملاحظين بعض المفاهيم فيها لمسة شيعية !!
رد أبوي على أويس وهو بقول ..
-خذ اللب وأترك بذوره ...أظن يا أويس إنكم على دراية كافية تحول بينكم وبين أي طمس يحصل للسيرة النبوية ..صح ؟
-صح ...الحمد لله ..
قام فراس ووقف قدامي وهو بقول ..
-يخوانا نستأذنكم ح ننسحب أنا والأمورة دي لانو عايزها في موضوع مهم قبل أنساه ..
أي موضوع ح يكون أهم من مشاهدة فيلم الرسالة كلنا مع بعض ؟...طلعنا لغرفته وكل الأفكار السيئة بدت تتراود قدامي ...وإن شاء الله الموضوع م يكون ليه علاقة ب موفق ..بدا هو بحديث مغاير للموقف ..
-تتذكري لما كنتي صغيرة أي مشكلة تواجهك في المدرسة أو لما البنات يحكوا عن أمهاتهم وانتِ تزعلي أول م ترجعي البيت كنتي بتشكي لمنو ؟دموعك الكانت بتنزل على ملابسي وانا أقول ليك ..
-يا بت إنتِ دموعك دي م بتخلص ؟لازم كل يوم تبللي لي التيشيرت كله !
كنت ببتسم وانا بكمل ليه جملته المستحيل انساها ..فراس كان بالنسبة لي صديق أكتر من هو أخ ..أكتر واحد بفهمني.. لما كنت صغيرة بعتبره بطلي كل مشكلة أعملها بكون أول شخص بكلمه بيها والحل دايماً عنده ...مواقفي معاه كتيرة لكن مناسبة الزكرى شنو ؟وهل دا الموضوع المهم العايزني فيه !
-طيب أكيد عارفة انه انا م بحب زعلك ولا برضى زول يكسر بخاطرك صح ؟
-فِراس انا بديت أتوتر قول في شنو ؟
-اي شعور ناتج صدفة وم حيستمر معانا لمدى الحياة دا م حب ...طبيعي نحس إتجاه شخص مُعين بنقابله لأول مرة الإحساس دا ، مثلاً إنتِ هنا متعودة على حب اخوي أو أبوي لكن م جربتي إحساس إنه راجل آخر يحاول التقرب منك ...هنا بتحسي بمشاعر غير ...هل دا نصك التاني ..زوجك المستقبلي؟...في اللحظة دي بتتولد مشاعر إتجاه الشخص دا ودا بيرجع للطبيعة بين الذكر والأنثى على العموم ..في كيمياء ربانية بينهم ..اذا حصل بينهم أقل موقف ببدأ القلب يترجم ليهم تقربهم دا على انو مشاعر حميدة أو حب وعشان كدا تعاليم الدين كانت لصالحنا ...عدم الإختلاط والمصافحة وغيرها كلها عشان تعيد الإتزان الطبيعي للحياة والتحكم في سير العلاقة بين الجنسين..
كلامه مضلل وم فهمت قصده لكن م قدرت أمنع نفسي من سؤال ..
-طيب ح أحس بالحب الحقيقي متين ؟
-لما تتزوجي بإذن الله..حب مبارك وأبدي لا ينتهي ..
-عرفت الكلام دا من وين وانت م متزوج لا تكون متزوج عرفي واحنا م عارفين !
