قاعدين في المستشفى لينا ساعة تقريباً ويداب دخلوها غرفة العمليات...كنا متوترين وخايفين شديد ...جا أويس شايل موية ووزعها لينا ...عاينت لخالد الأول مرة أشوفه م متماسك ومفزوع للدرجة دي ...كل شوية بلتفتت لأبوي الجنبه وبقول ..
-هي العملية أصلاً بتطول كدا ؟
-تطول شنو يا ولدي وهي دخلوها يداب ..
-طيب العملية خطيرة ؟ وهل ممكن تتأذي ؟
-إتطمن يا خالد ..عملية ولادة عادية ويومياً بتتعمل آلاف من العمليات القيصرية ...إنت بس أدعي ليهم بالسلامة والخلقة التامة ...
طبعاً دي سمر وإتقررت ليها ولادة قيصرية ..كانت معانا أمها وخالتو إيمان وأنا ...بالاضافة للاولاد وأبوي ..
باقي البنات قعدوا في البيت عشان يجهزوا هناك ...
الأجواء متوترة وكلنا بندعي ليها بس ...
بعد فترة الغرفة فتحت وطلعت الدكتورة بشرتنا بتوأم بنات ..
فرحتنا كانت كبيرة شديد...إترددت كمية من "الحمد لله" ومباركات لخالد البقى أبو البنيات...
في الفترة دي أنا خلصت التدريب وبقيت رسمياً أستاذة رياض أطفال ..
حددنا العرس بعد شهرين في الكويت...
ميس دخلت الشهر السابع يداب و وعد برضو حامل في شهرها الأول ..
بعد الاسبوع إتعملت سماية كبيرة للبنات وسموهن ( نور و أمل ) ...كانن كيوتات شديد والوقت كله بنقضيه في بيت خالد عشان البنات ...
إنشغلت في ترتيبات العرس..وبدينا نشتري في الشيلة ...م كترت في الملابس لانو ح أشتري من هناك ..
للريحة جات خالتي وعماتي بالاضافة لخالتو إيمان وسمية و عملوها في البيت ..
للحبسة خالتي قالت سايقاني معاها بيتها أتحبس فيهو ...جهزت شنطة صغيرة فيها شوية ملابس ..جاتني وسن وشايلة شنطتها طبعاً هي برضو ماشة معاي بيت خالتي ..
-عمو محمد منتظرك برا ...
طلعت لأبوي لقيتو منتظرني في الصالة ...قعدت معاه وهو بدا طوالي في الموضوع...
-كنت بتكلم مع تميم وسألني من المهر قلت ليه ح أشوف معين هي ح تحدد عايزه شنو ..
-هو م إلا يكون مبلغ نقدي صح ي أبوي ؟
-أيوة طبعاً...إنتِ حرة فيه وبتختاري العايزاه...
-طيب ي أبوي انت عارف إني خاتمة ب رواية حفص بس صح !؟ وتميم خاتم بالقراءات العشر وحتى إطلع على الأربعة المتواترات التانية عشان كدا مهري عايزاه يعلمني القراءة برواية ورش عن نافع ..
أبوي إبتسم وناداني أجي أقعد جنبه ...مشيت قعدت جنبه مسح على راسي وهو مبسوط ..
-ربنا يبارك في تربيتك ويكملك بعقلك ...الحمد لله على حسن التربية والأخلاق الإنتِ عليها يا بتي ...ربنا يحفظك ..
