شيفرة أمل

27

السعودية -الرياض

-"ايوة يا محمود ..أي معاك ، اها قررتو جايين متين ؟ بكرة ! طيب تمام ... تصلوا بالسلامة " ..

-أويس .. يا أويس ..

-"ثواني يا محمود ..بنادوني ..طيب مع السلامة " .

-بتتكلم بالتلفون ولا شنو ؟

-ايوة بتكلم مع محمود ..

-اها م قال ليك جايين متين ؟

-بكرة إن شاء الله...

-كويس والله ...ربنا يوصلهم بالسلامة ..

طلعت من غرفة أويس لقيت سلمى داخلة على المطبخ ..لما لاحظت إبتسامتي غيرت طريقها وجاتني ...

-ربنا يديم الضحكة على وجهك يا ست الكل ..

-اللهم آمين يعمري ..

-إلااا وش السر !

-(ضحكت)بكرة ناس جدك ح يجوا..

-يا سلام جدو ومحمود جايين ..

إلتفتنا بضحكة ل رحيم القال كدا وهو بنطط ..

-بتعمل هنا شنو ي رحيم..مش إتفقنا إنو مالم الساعة 9 تجي م تطلع من غرفتك ؟

-ي ماما لكن انا انتهيت من الواجب ..

-طيب أشرب الحليب حقك وأمشي نوم ..

عاين لي وكشر وشو ..

-أمشي أشربو أصلاً انت معاقب لأنك أخرت الواجب ..عشان كدا ح تشرب حليب ساي من غير عسل أو كاكاو ..

نزل راسو بزعل ودخل المطبخ ...

-ربنا يوصل ناس جدك بالسلامة ..

-آمييين ..ياخي اشتقنا لجدو وخالتو وعد شديد ..

-بالحال من جيتي منهم شهر م تميتيه ...

-(ضحكت)اتعودت عليهم ياخ ..

ضحكت معاها وبعدين هي مشت ل رحيم في المطبخ وانا مشيت لغرفة كريم ..دقيت الباب وفتحته لقيته قاعد في المصلاية وبقرا في قرآن ..حسيت بفرحة كبيرة وانا بعاين ليه ...لما دخلت قفل المصحف وجا باس يدي بإحترام ..

-ربنا يرضى عنك ي حبيبي ..

-آمين ..اها مافي خبر من ناس جدو ؟

-بكرة بإذن الله ح يكونوا معانا ..

-(إبتسم) ربنا يوصلهم بالسلامة...

قعدت اتونس مع كريم الكل مرة ببهرني ب وعيه الزايد واحترامه الكبير لي أنا وأبوه وأخوانه كمان ...كريم يعتبر أكتر واحد واعي وهادي في أولادي ..تم حفظ القرآن أبدر منهم كلهم وفي عمر ال 10 سنين هو ختم ..

رغم انه هسي عمره 16 سنه ويعتبر أصعب سن بمر بيه الطفل ...لكن تميم كان بقول لي انه في التربية م تبرر للأطفال تصرفاتهم على أساس إنهم بمرو بمرحلة المراهقة ...لأنو الواحد اذا عمل تصرف طايش وانت عديته ليه لانو مراهق ..ف دا بخليه يزيد في تصرفاته الطايشة ويبرر لنفسه انه ماري بمرحلة اسمها المراهقة وفيها مصرح ليه يعمل أي شي ...