خلصنا الإمتحانات وارتحنا من الضغط والتوتر الحصل لينا بسببهم ..
طبعاً تاني حلمت بنفس الحلم مرتين ..سألت خالد وفراس اذا بتذكروا انو أمي في حياتها كانت عايزة تعمل شي لانو أويس يمكن م يستحضر لكن قالو م عارفين ..
قلت يمكن أمي م حكت لزول ...
بالعصر كدا اتفقنا مع ميس نمشي نزور ناس خالتو سمية ، فعلاً مشينا ليهم ..لقينا نزار في الباب عنده ورق برسم فيه ..يعني سبحان الله نزار دا من تشوف ليه بتنسى همومك كلها ، عنده إبتسامة وقبول كدا عجيب ..سلمنا عليه ودخلنا جوا ، لقينا وعد ماسكة مرجع قدر الضربة ومتربعة في السرير وجنبها دفاتر وأقلام وحالتها جايطة شديد..
-عروس أخوي السمحة ..
-احااا وآخيراً سمعت كلام يفتح النفس ..
ضحكنا عليها وميس قالت ..
-طلعت وسن أختي م براها ..
جو أخوات وعد الأصغر منها سلمن لينا وطوالي دخلن جوا ..
-طبعاً انا م مطمنه لأويس خالص عادي بكرة يجي يقول لينا عايز أتمم العرس ..
دا كلام ميس ..وعد عاينت ليها ورفعت يدينها للسماء..
-قادر يا كريم ..من خشمك ولباب السماء..
عاينا ليها مصدومين طبعاً..
-(ضحكت)طلعت ساي ظالمة أخوي ومفتكرة انه ضاغط عليك ،طلع الوضع عاجبك لا لا تمام لو كدا احنا ح نكون بعيدين ..
-ياخي القراية دي محتاجة دعم وجداني وبعدين انا زهجت وعايزة موضوع أغير بيه شوية ..
-اها حفظك كلمة دعم وجداني وخلاك ..
قعدنا نضحك وبعدها بقينا نتونس لما طلعت خالتو سمية من جوا ، قال كانت بتتكلم مع أخوها بالتلفون ...اتونسنا معاهم حبة وطلعنا ..لما جينا مارين ب نزار كان رافع الورقة الراسم فيها فوق وبعاين ليها ..دققت في الرسمة وانا بقول شفت الرموز دي وين ولا المبنى !...دا قريب شديد من المبنى البشوفو في حلمي ،والرموز هي نفسها المعلقة في واجهة المبنى ..م حصل ركزت فيها ..لو ركزت شوية كنت فهمت أي شي..
مشيت على نزار بسرعة وسألتو ..
-الرسمة دي ؟
م عرفت أقول شي ف هو طوالي عاين قدامو وقال ..
-رسمناها انا وماما أمل الله يرحمها ..بعدها ب شهر هي ماتت ..انا بتذكرها لسه ..م نسيتها ،في كل صلاة بدعي ليها ولأبوي ولعمي ولسفيان ولد خالي ...انا م بنساهم بدعي ليهم كلهم..
-ربنا يرحمهم ، طيب متذكر السبب الرسمتو فيه الرسمة دي ؟
-بتذكر ..أي بتذكر انا م بنسى الحاجات الزي دي ...
حسيت بشوية راحة وانو بكدا كل شي ح يتحل ..
-طيب ممكن تحكي لي ؟
