مُوفق دا مدير الحسابات في الكلية...من سنة اولى وهو بحاول يتكلم معاي بس انا كنت بصدو ...فكرة انو في ولد بعاين لي بنظرة تانيه كانت مضايقاني جداً...كنت بقول انو ليه م لقى بت غيري يعجب بيها ...انا م عايزة زول يعجب بي ..عشان يقعد يفكر فيني ولا ينشغل بي ...ي جماعة والله مجرد التفكير في الموضوع كان برهقني...أما هو كل م اصدو دا بديهو دافع انه يواصل ...
بداية تالت مشيت عشان أسجل ..ويومها عكس كل المرات ..أبداً م حاول يلمح أو يتكلم معاي بخصوص إعجابه ..حسيت بالراحة وقلت يمكن أقتنع وطلعني من راسو ..شلت الايصال وطلعنا انا و وسن بعد سجلت ..جيت ادخل الايصال في الشنطة لقيت في ورقة مدبسه معاه ...وسن سحبتها وقرتها ..كانت مبتسمة وانا استغربت الفي الورقة شنو ..بعد خلصتها مدتها لي وهي ساكتة...شلت الورقة الكانت فايحة منها ريحة ورد جميلة شديد وبديت أقرا بصدمة خصوصي من الاسم الواضح أول الورقة ..
( "انا مُوفق عثمان ...عمري قبل م اشوفك 29 ، بس بعد عيوني شافت عيونك حسيت اني مولود جديد ...او يمكن اتولدت من جديد عشان اعيش عمر تاني وتكوني إنتِ العمار بالنسبة لي ...عشت تجربتين حب فاشلين بس انا عرفت الحب لما شفتك ...لمحت فيك سعادتي وهناي وقلت ياها أم أولادي ...ومتأكد ح يشكروني اني اخترت ليهم ام زيك ...انا يا بت قلبي م عايز العب بيك أبدا ...انا عايزك على سنة خالقنا والنبي حبيبنا ...ح تقولي هو انت حبيتني كيف...ومتين؟ ..وانت في السنة بتسمع صوتي مره..؟! ...بس كيف قلبي يقدر يصدك..؟حيائك ...التزامك ...حشمتك ...وادبك...وجمالك النقي ..رقتك ...صراحة كلك... كل م انطق اسمك بقول ياها المعين حقي في الحياة ...ياها نصيبي في الدنيا وحظي الحلو ...يا بختي بيك لو بقيتي مرتي♡ .
طارق لباب قلبك قبل بيتك فأذني له بالدخول " )
وقتها م بنكر انو الكلام أثر فيني وخصوصي بعد رجعت البيت كل مرة افتحها واقراها واشم ريحتها ...ومن يومها ومشاعري اتجاهو بدت تتحرك والزاد على كدا انو م بتعرض لي كتير ومحافظ على المساحة بينا...بس كل م اشوف وش أبوي او واحد من اخواني ضميري بأنبني وبجلد نفسي ...بس بقول انو انا م بعمل في شي غلط ...انا بس حبيتو...دي حاجه انا م بتحكم فيها لكن ...احنا م اتخطينا الخط الاحمر المرسوم لأي علاقة حب ....بس تاني بقول ....اذا م كان نصيبك ي معين..؟ مش المفروض تحافظي على عذرية قلبك ..؟مش مفروض تحبي زوجك وبس ..؟ م بتقدري تتحكمي بقلبك لكن بتقدري تتحكمي في افكارك وعقلك ...مش وصية أبوك وأخوانك دايماً انو ركزي في قرايتك بس ..؟ الحب ح يشغلك ي معين ...فجأة بتلقي مُوفق داخل في افكارك بطريقة ما ...يمكن لو انا مدياهو فرصة يتقرب مني اكتر كان اتخطى الخط الاحمر..؟؟ بس مُوفق م بعملها ....كان واضح معاي من البداية ..انو عايز رقم أبوي وح يجي يتقدم لي رسمي ...بس أبوي كلامو واضح ماف زواج قبل التخرج ...قالها لي أكتر من مرة وبلا مناسبة:(يا معين ركزي في قرايتك واتخرجي م باقي ليك شي والزواج وبقية الاشياء كلها ملحوقة ..بس شهادتك سلاحك...بتصيبي بيها اي شخص بحاول يقلل منك )رغم اني م حصل جبت ليهو سيرة العرس ...بس أكيد ح يخمن اني بت وأكيد ح افكر في الزواج ...انا مستحيل اخيب ظن أبوي واجيب ليهو عريس واصر اني اتزوجو ...ح ابعد ...ايوة ح ابعد ولو مُوفق من نصيبي ولي فيهو قسمة أكيد ح اتزوجو ...بس هل هو ح ينتظرني ..؟ مصيرو ينتظر ..اذا جد هو عايزني خليه ينتظر ...بس لوقتها المفروض اتحكم في قلبي ...وانا بعرف كيف اتحكم بيه ...
