شيفرة أمل

6

في نفس اليوم أبوي كلمنا إنو عاملين كرامة في بيت جدو ...جهزنا ومشينا كلنا مع بعض في عربية أبوي ...وصلنا هناك ولقينا أعمامي وعماتي كلهم متلمين مع بعض ..خشينا سلمنا ..وانا مشيت مكان النسوان ...سلمت على حبوبة وعماتي ونسوان أعمامي وبنات العائلة ..اشتغلت معاهم واتونسنا ..كان يوم جميل و مليء بالتفاصيل ..

بعد العشاء جاني ولد عمي صغير وقال لي ناس ابوك قاليك اطلعي ، ودعت النسوان وحبوبة وعماتي طلعوا معاي عشان يودعوا ناس أبوي ..

وقفوا كلهم قدام الصالون وعملوها ونسة ، لما تعبت من الوقفة شلت المفتاح من أبوي وقلت ليه حانتظر في العربية ، لما طلعت برا حسيت في زول ماشي وراي افتكرته واحد من أخواني إلا لما جاني صوت غير ..

-يا معين كيف حالك ..

إلتفت وراي لقيتو أشرف ولد عمي ومعاهو أخوهو الصغير بكون عمر 12 كدا ..سلمت على أخوه وبعدين رديت ليه ..

-بخير الحمد لله وانت كيفك ؟

-تمام والله ..

تاني سكتنا لانو ماف شي يتقال..بس هو اتنحنح وقال ..

-في موضوع كدا فتحتوا مع أبوك لكن قفلوا من دون م يقول شي ..

عرفت هو قاصد شنو ، لانو أشرف م الوحيد من أهل أبوي يتقدم لي وأبوي يرفض من دون تردد ..

-مدام أبوي قفله معناها ماف شي يتقال ..

-يعني عرفتي انا بقصد شنو ؟

هزيت راسي كان عايز يتكلم لكن ناس أبوي جو طالعين من جوا ..وبعدها رجعنا البيت ..

أعمامي وبعض من عماتي عايشين كلهم جنب ناس جدي ..أبوي فضل انو نسكن في مكان تاني ..عشان يكون قريب لشغلو...وتفادياً لمشاكل العائلة الممكن تحصل..لانو شايف السكن جنب بعض بجيب المشاكل ..وانو القرب م دايماً بزيد المحنة وخصوصي بين الأهل .. وفعلاً هسي بعض من أعمامي وعماتي ..طوالي في حالة مشاكل ..ي إما اولادهم سبب في بعض المشاكل ...خصوصي انو عماتي بعد وفاة امي كانوا مصرين لأبوي إنو يتزوج ..بس هو رفض وفضل يربينا بنفسوا بعيد عنهم ...بجونا زيارات بس ..سمعت انو أولاد عمي و أولاد عماتي كم واحد منهم حاول يطلب يدي من أبوي ..لكن أبوي رفض ..حتى م قال ليهم انو إلا تتم قرايتها ..لا هو رفض بالمرة ..لانو شايف انو الزواج من اسرتو دي بالتحديد هيجيب مشاكل لا ليها أول ولا آخر وصح كلامو ..وبسبب الشي دا هسي شبه زعلانين ...بس أبوي في حاجات زي دي م بجامل ولا بتعامل معاها بتعاطف ..هو شايف انو أهم نقطة في الزواج الاستقرار الذهني والنفسي ...وانو الأسرة البتحب المشاكل وبتكبرها ..بتشكل عائق كبير لعدم استمرارية اي علاقة .

بعد كم يوم جونا ناس خالتي عبير واولادها قيلوا معانا ..وناس خالتو إيمان جوهم إتونسوا معاهم برضو ..خالتي قالت لينا انو حاج اسماعيل جارهم تعب شديد لما رقدوهو مستشفى وهسي حالتو اتحسنت شوية حتى خرجوه للبيت ...وانو زاروه كم مرة في المستشفى وبلقوا خالد معاه ...قلت ليها غريبة خالد م كلمنا ...بعد هم مشوا ...انتظرت خالد لما جا مشيت ليهو في غرفتو ...دقيت الباب بعد قال اتفضل ..دخلت لقيتو راقد في السرير ورافع يدو في راسو وشارد بعيد ...قعدت جنبو في السرير ..