شيفرة أمل

16

الصباح مشينا الجامعة وقبل المحاضرة كنا قاعدين انا ووسن برا ، هي بتشوف في مسلسل كوري وانا بحضر في الفيديو النزلو شيخ تميم من أمبارح طبعاً يداب لقيتو ..

تميم من جا السودان قلل نسبة الفيديوز البنزلها حكى السبب في فيديو وانو زمان رغم شغله الضاغط إلا إنه بخصص زمن بنشر فيه ، لكن هسي هو عايز يستمتع بأي تفصيلة في السودان .

وسن بعد خلصت مسلسلها عاينت لتلفوني لقتني بشوف لشيخ تميم ، طوالي قالت ..

-هي طبعاً م حكيت ليك ..

قفلت الفيديو وعاينت ليها ..

-أحكي طيب ..

-إنتِ عارفة اليوم داك بالليل أمي نادتني لشنو ؟

-أصلاً أنا إستغربت لانو الموضوع لو م ضروري أمك م بتسأل منك خالص ..

عاينت لي بحدة وقالت ..

-شكراً على الاطراء ي بيبي ..لكن برضو ح أحكي ..

-(ضحكت) أها أحكي ..

-مش قلت ليك خالتو شيماء إختارتك ل تميم ؟

لما قالت كدا ضربات قلبي زادت وعاينت ليها وانا مصدومة ..

-كيف يعني ؟

-عديل كدا ، أمي لما نادتني كانت عايزة تسألني اذا انتِ في زول في حياتك وكدا ،لانو خالتو شيماء فتحت معاها الموضوع وقالت ليها إنك عاجباها شديد ومتدينة وتصلحي كزوجة ل ولدها لانو هو وكلها إنها تختار ليه الزوجة المناسبة بشرط تكون حافظة للقرآن وانتِ اللهم بارك إتوفرت فيك كل الشروط ..

كنت لسه مصدومة وبعاين ليها لدرجة أطرافي بقت ترجف ..

-مالك ي بت مهجومة كدا ؟ لكن مقدرة وضعك لانو الزي تميم دا يصلحوا في المتاحف بس ،لكن يا صحبتي انتِ برضو م هينة وح تلبقي مع تميم شديد .. طبعاً قلت لأمي إنو ماف زول في حياتك ولا ناضمين فيك زاتو (ضحكت) ..المهم أمي كلمت خالتو شيماء وترقبي قريباً ح يفتحوا معاك الموضوع .

اليوم دا انا لا فهمت محاضرة لا أي حاجة غيرها ، كل تفكيري في كلام وسن ،والعجب لما أسمع صوت تميم وهو بصلي بالناس غايتو وسن م شالت فيني حسنه خالص..

زمان لما موفق قال عايز يتزوجني كنت شايفاه انسان جادي وملتزم وح ينتظرني بعد أخلص حتى نتزوج لكن كان إحساس عادي لأنو خاته إحتمالية إننا ممكن نتزوج وممكن لا ...أما بالنسبة ل شيخ تميم ف دا إحساس أول مره أجربه ، لأني شايفه تميم حاجة كبيرة شديد وأقل وصف في حقه إنه رجل دين ، الدعوة إلى الله أمر عظيم وأجرها كبير ..الزواج من شخص زي شيخ تميم ف هو صلاح لنفسي أول شي وهو ح يكون أنسب أب أختاره لأولادي ..عشان كدا تاني ح أذكره في دعواتي وانه ربنا يجعله من نصيبي لو فيه خير لي ..زي م الرجل بسعى وراء المراه الصالحة ف المراه ذاتها مفروض تسعى وراء الرجل الصالح لأنه هو الراعي وهو المصلح والمربي .