شيفرة أمل

17

-مبسوطة شديد إني شفتها ي أبوي ..دي المرة الرابعة تزورني في المنام ..م لقيت زمن أحكي ليك بالحلم وقدر شنو أنا فرحت بيه ..كانت لابسه إسدال صلاة أبيض ومكانها أخضر وجميل والجزء التاني من مكانها كان باهت وم فيهو حياة ..أرض يابسة فيها مبنى واحد بس وهي طول الحلم كانت بتعاين للاتجاه الباهت وللمبنى بنظرة حزن ..وتاني بترجع تعاين لي وبتكون عايزة تتكلم وتقول لي حاجة بس بصحى من الحلم ...أربعة مرات بنفس الحلم ..م فهمت مقصود الحلم لكن آخيراً شوفتها كأنها قدامي هسي ..

هو بس بسمع لي ، وانا بحكي ليه مرة ببكي ومرة أبتسم ومشاعري كانت ملخبطة شديد ..بعد خلصت كلامي حتى أبوي قال ...

-اللهم أجعله خير .. بتدعي ليها ؟ ..

-في كل أوقاتي والله ..م بنساها أبداً ..

-ربنا يرحمها ..

إتنهد بحزن وبقت في لمعة حزينة في عيونو ...

-مفكرة اسأل شيختي البتراجع لي يمكن تعرف المقصود شنو بالحلم دا ..

-ايوة اسأليها وانا كمان بسأل ليك ..وبرضو نعمل كرامة نوزعها للفقراء..انشغلنا مع الدنيا وطولنا م اتصدقنا ليها..

-طيب إن شاء الله .

تاني يوم إتصلت علي خالتي وقالت خالتو سمية إتصلت عليها وكلمتها انو وعد م عندها مشكلة وكمان إتكلمت مع خوال وعد وعمها وختتهم في الصورة ، فرحت وإستغربت لانو م متوقعة وعد توافق خالص لكن شكلها عايزة أويس ومقتنعة بيه ..

بعد الفطور خالتو سمية جاتني وقالت لي نفس الكلام وادتني رقم عم وعد وواحد من اخوانها هي قال اديهم لأبوي ..

أويس لما جا وكلمتو طار من الفرح تقول قالو ليه تعال عرسها هسي دا ..

اتصل لأبوي ورسل ليه الارقام حتى م انتظره لما يرجع من الشغل وقال ليه تتصل عليهم هسي ..

طبعاً متحمس ومتوتر شديد وفي الدخله والطلعه بفتح لينا في الموضوع..

المساء ابوي لما جا حكى لينا بالحصل وانو خالها وعمها ما شاء الله عليهم ومدحهم لينا وقالوا انو يدوهم مهلة شويه ولو في قسمة ح يحددوا زمنهم ويمشوا ليهم لخطبة رسمية ..

-ليه يعني المماطلة دي كلها ! وبعدين مهلة دي حدها متين يعني ؟ دي الشغلة الم بتنفع ..

دا أويس طبعاً عايز أي شي يتم بسرعة ..أبوي إتكلم معاه وقال ليه ..

-يا ولدي أمور زي دي عايزة صبر وتريس .. دي اشياء مصيرية م بتم بين يوم وليلة...

على كدا الموضوع إتقفل ، طبعاً كان باقي لينا اسابيع بس من الامتحانات النهائية ..

بالمساء كان عندي مراجعة مع الشيخة وبعد خلصت تسميع ..حكيت ليها الحلم وقالت لي بتكون عايزة كرامة ..الأفضل تعملوا زبيحة وتوزعوها للمساكين وممكن بليلة أو بلح المهم قدر الاستطاعة .