وصلنا السلاح الطبي.. واحنا داخلين كدا صادفنا حاج اسماعيل وبتو ...مشينا عليهم خالد لفت حاج اسماعيل ..الكان واضح عليه انو عيان ..سلمنا عليهم ..
-عم اسماعيل ..كيف حالك .؟
-اهلاً يا خالد ي ولدي ..والله الحمد لله.
-م تكون تاني تعبت بس ...
-والله حاسي بشوية تعب ..لكن سمر بتي اصرت الا نجي المستشفى ..وياهو شايف ..
-صاح كلامها ...كدا ادخل نتأكد أحسن ..
-لا لا ي ولدي م نأخرك ..
-فاضي انا م عندي شي ...يلا ..
دخلنا المستشفى ...خالد ساق حاج اسماعيل ..رغم انو بتو كانت مصرة انها ترافقو ..لكن خالد اقنعها انو ماف داعي.. مدت لخالد بطاقة وبعض من الاوراق ..شالهم ومشوا ..خلونا منتظرين احنا وسمر ...كانت متوترة وخايفة ف حبيت أطمنها شوية ..
-ربنا يشفيه ومعافى بإذن الله.
-امين يارب.
وسن مسحت على ظهرها وهي بتقول..
-م تقلقي م عليهو إلا العافية .
-ان شاء الله.
بعدها سكتنا وكسرت الصمت وسن وأصلاً مستحيل تسكت ..
-بالمناسبة دي معين وبنقول ليها لوله ..وانا وسن صديقة معين وممكن تناديني ب سونا و..
لو خليتها كملت كانت ح تحكي قصة حياتنا كلها والموقف م ناقص ..عشان كدا قطعت كلامها ..
-أحم ..أنا مَعِين أخت خالد ..أكيد بتعرفيهو ..إنتِ سمر صح ؟
-اتشرفنا يا مَعِين ..ايوة انا سمر و أخوك كتر خيرو قاعد يزور أبوي طوالي وم مقصر ..
-أقل من الواجب والله .
كانت بت جميلة شديد ورايقة ...لكن واضح الحزن في عيونها ...م عارفة الوصلها للمرحلة دي شنو وخلاها منطفية كدا ..لكن أكيد م شي ساهل ...ويمكن بسبب انفصال ابوها وامها ...
بعد مدة عمو اسماعيل جاء لكن من دون خالد ..بتو جرت عليهو بلهفة وبتسألو ..قال ليها بس الضغط ارتفع ..ساي كبرتي الموضوع ي بتي ...كانت بتقول ليهو شايف انو ضغطك يرتفع دا شي طبيعي ..؟
حقيقي احنا البنات ماف أحن مننا ...خوف سمر على ابوها ..خلاني ادعي انو ربنا يحفظو ليها ..وم يوريني في أبوي شر أبداً ..
خالد جا وشايل اوراق وادوية ..وقال لينا يلا ارحكم ...رغم اعتراض حاج اسماعيل وبتو انو نوصلهم إلا انو خالد كان مُصر ...ركبو معانا وطول الطريق خالد كان بوصي فيهو ..وانو المفروض يحافظ على صحته ...قال ليهو ..اها بقيت لي سمر نمرة اتنين 🤣..قبل نصل بيتهم خالد نزل وجا شايل اكياس دخلهم ورا ..وركب ..
-هسي يا ولدي في داعي للتعب دا ...كنا برانا بنجي بدل تتعب كدا ..وتاني راجيك مشوار من هنا لحيكم والمسافة براها مشكلة..
