صحيت صلاة الفجر وانا شامة ريحة عطر أبوي في الغرفة عرفت انو جا أمبارح ...لانو لما يجي البيت بجيني في غرفتي وبتفقدني حتى بمشي بنوم ...قمت صليت وقريت الورد بتاعي وأذكار الصباح ...بعدها سمعت حركة برا عرفت انو ديل ناس أبوي بكونوا جو من المسجد ...طوالي طلعت وانا لابسة الاسدال سلمت عليهو في راسو ويدينو ...ضماني عليهو هو بقول...
-صباحك خير ي ماما .
-يسعد صباحك ي أبوي ...يشهد الله شوق كميات.
-وانا أضعاف والله .
اخواني رجعوا ناموا تاني فضلنا انا وأبوي وخالد بنتونس رغم انو أبوي كان نعسان بس جاراني في الونسة ...عملت الشاي وقعدنا نشرب فيه لما انضموا لينا أويس وفراس ...قعدة كانت بالدنيا.... نعمة الأسرة بحمد الله عليها في كل الاوقات ...بس اللمة كانت فاقدة شخص واحد 💔 أمي ربنا يرحمها 💔.
قبل الفطور أبوي وفراس طلعوا شغلهم ...أما احنا بعد فطرنا طلعنا بعربية خالد أخوي لبيت ناس خالتي .. طبعاً أويس م عندو عربية ف مرة يسوق من خالد ومرة من فراس 🤣 ... خالد اتصل لخالتي من أمس وكلمها انو احنا جاينها ومشى اشترى حاجات نشيلها ليهم ،خالد طباعو زي أبوي م بمشي مكان ويدو فاضية أبداً...لما وصلنا فتح لينا هاني .. بعد السلام ..هم مشو الديوان وانا دخلت لناس خالتي الكانت الفرحة ظاهرة في وشهم ،سلمنا على بعض وخالتي مشت لاخواني في الديوان سلمت عليهم بعد ضيفونا قعدنا نتونس ...خالتو عبير نادت اخواني وبعد اصرار منها حتى انضموا لينا وبقينا نتونس مع بعض ...ونسبة لانو اخواني م بصافحوا سلموا على بنات خالتي من بعيد بس ...بعدين خالد مشى نزل الاكياس من العربية وجابهم لخالتي طبعاً زي كل مرة شاكلتوا بس قال ليها انو اذا م بتعتبريني ولدك تاني م حجيب معاي شي ..هنا هي سكتت ...بعدين سألها من حاج اسماعيل طبعاً دا جار ناس خالتي ...راجل طيب جداً اخواني وأبوي بعرفوه ...صاحب خالد أخوي جداً كل م يجي هنا بمشي بزورو وبودي ليه حاجات ...وهو معتبر خالد زي ولدو الكبير ...
خالد طلع بأكياسو ومشى لحاج اسماعيل في بيتو.
وقتها سألت خالتي ...
-إنتِ يا خالتو الراجل دا قصته شنو وأهلو وين لانو الوقت كلو بكون قاعد بكرسيه برا البيت وم معاهو زول غير بتو الاصلاً م قاعدة تختلط بالناس ونادراً م ألقاها معاكم هنا ودقايق بس وبتمشي بيتهم .
-والله ي بتي حاج اسماعيل دا كان متزوج والوقت كلو مرتو عامله مشاكل لمن طلقها وساقت بتها معاها ومشت وقالو عرست بعد شهور بس من عدتها خلصت ..اها بعد كم سنة الحصل شنو م عارفة مشى ساق بتو منها ..وهي تاني م شفناها ولا حصل شفنا زول من اهلو جاهم غير كم مرة اخوانو بجوهو وم بطولوا بمشو ...وهسي مسكين السكري والضغط تعبوهو وخلى الشغل وتقريباً زاتو نزل المعاش وغايتو ربنا يعينو.
-اممممم...مسكين ياخي.
إتأثرت جداً بقصته ..قضينا يوم جميل مع ناس خالتي للمغرب كدا فراس جا من شغلو وجانا في بيت ناس خالتي وعمو عباس راجل خالتي ذاتو جا من الشغل اتبسط جداً بجيتنا... قعدنا لبعد العشاء حتى رجعنا البيت ونمنا طوالي .
