شيفرة أمل

2

بعد خلصت من مشاهدة الفيديو ..كانت مرسومة بسمة راحة على وشها..قالت في نفسها "الفيديو رهيب ومؤثر كالعادة ".

لما مواعيد محاضرتها جات دخلت القاعة ولقت وسن نايمة ..إبتسمت وأخدت ليها صورة بالتلفون ،لما الدكتور دخل القاعة صحتها لكن م إهتمت ورجعت كملت نومها ..

بعد المحاضرة خلصت صحتها تاني عشان يرجعوا البيت ..

-م تقولي لي ح نرجع بالمواصلات ؟

-ليه تعبانة ولا شي !! ما شاء الله عليك مقضية كل اليوم نايمة ..

-كلها دقايق بس ي لوله ..م تستفزيني بيهم .

-دقايق !!..

-ياخي الشمس سخنة شديد ...خلي نشوف الفاضي من ناس البيت يجينا ولو م لقينا نتوكل بالمواصلات ..

-أكيد عربية فِراس مع أويس كدا أشوفو ..

-وهو إن شاء الله يقتنع ويجينا ..

-بقتنع إنتِ بس تابعي يا صحبتي ..

كانت بتتكلم بثقة ..دخلت رقم أخوها وانتظرت لما رد ...

" -الووو أويس ...اخوي الغالي..كيفك ..

-لوله ووسن أختوني ! سواقكم وانا ناسي ؟

-عليك الله الشمس سخنه شديد والله.

-يازوله اتصرفو .

-يهون عليك تخلي أخواتك في الجو دا يتبهدلوا بالمواصلات ..؟

-أيوة يهون وجداً كمان ..

-من دون كل الناس لجأنا ليك انت ..معقول تفشلنا !وبعدين الغداء م جاهز متين أرجع بالمواصلات وأعملو ؟

-ياالله....خلاص خلاص كفاية كلام كتير ربع ساعة وبكون عندكم ."

أنهى كلامو بنفاذ صبر وفصل الخط ..

-ثقيل كمان قافل الخط في وشي...؟يصبر لي بس.

وعاينت لوسن بإنتصار ..

-اها لقيتيني كيف ؟

-فظيعة ...كدا ممكن أموت بسلام وانو تربيتي م راحت ع الفاضي ..

-(ضحكت)افااا ..قليل مما لديكم .

بعد نص ساعة اتصل ليها وكلمها انو منتظرهم قدام البوابة ..

طلعوا من الجامعة ومشوا ركبوا معاه ..وسن سلمت ليه أما لوله عاينت ليه وهي بتقول ..

-عليك الله م كان تجي.

-يا زوله مالك!

-تقول لي ربع ساعة، وتطلع 4 ساعات..؟

-هسي بنزلك جابت ليها قلة ادب كمان...!

-هسي بنزلك قال ...تقول عربيتك .

-طيب لما عارفه م عندي عربيه بتتصلي علي مالك...؟