قاعدة في السرير وم جايني نوم أبداً ..عاينت للسرير التاني لقيت وسن في سابع نومة ، وهناء بت خالتي منزلة ليها مرتبة في الأرض ونايمة برضو ...
مسكت تلفوني وعدت الفيديو النزلو تميم للمرة الكم م عارفة ، رغم إنه نشرو خلال اليوم لكن نسبة مشاهدته تخطت المليون ،وعدد كبير من الصفحات شيرته ،" غداً عقد قران الداعية الإسلامي تميم النجمي " .
مع إنه تميم م حصل حكى عن حياته الشخصيه للمتابعين إلا إنه شاركهم خبر إنو بكرة ح يعقد ، وهو بحكي كان مبسوط شديد وفي لهفة في صوته كأني أميرته المنتظرة من زمن طويل ، البشوف الفيديو بقول إننا بنعرف بعض من زمن طويل وانو تميم منتظرني من مدة عشان أوافق بيه ... الفيديو خلاني أيقن تماماً إني م حألقى أحسن من تميم وبإذن الله م حأندم على الزواج دا ..ودا واضح من القيمة الكبيرة الخاتيها لي وللعلاقة دي ..
إبتسمت براحة وقلت الحمد لله...
تاني قعدت أتذكر في المشكلة العملها أشرف أمس ...جا البيت وهو هايج شديد ، أويس المتهور إشتبك معاه وإضاربو إلا حجزوهم ...كان معترض على العقد وقال م حيحصل إلا على جث*ته ...إحترت على تمسكه الشديد بي طبعاً وهو أصلاً أنا بتلاقى معاه بالصدفة في جمعات الأهل ..
"أنا ود عمها وأولى بيها من الغريب
طلبتها منك ياعمي قبل هو يجي من السفر ورفضتني ولا عشان هو منهدس بترول وأنا موظف عادي ؟"
كان بفلت في الكلام بطريقة عجيبة ،ومُصر إنو العقد م لازم يتم وأنا م أتزوج غيره ..
كنت أنا والبنات في شقة ميس فوق وبنتابع في الأحداث من الشباك ..خفت شديد من إنو أشرف يتهور ويخرب لينا العقد ..
تميم كان ماف طبعاً و أبوي قاعد لكن ساكت وبعاين ليه فلما بقى يقلل أدب ويفلت في الكلام أبوي وقف وأشر ليه على الباب ..
-جاي في نص بيتي وم خاتي لي قيمة ولا محترم حتة إنو أنا عمك وبعد دا عايزني أزوجك بتي ...أطلع برا ..
الباب فتح وجا تميم وخالد داخلين ..قلت كملت خلاص ...هو من شاف تميم إتفكى من محمود الكان ماسكوا ومشى على تميم عايز يضربو لكن تميم مسك ليه يدو وخالد ثبتو وهو مستغرب ..
-مالك يا زول ؟
وأشرف هايج وعايز يضرب تميم بأي طريقة ..لما فهموا الحاصل إتفاجأنا بتميم وهو بقول ليه ..
-تمام يا أستاذ أشرف ممكن نقعد راجل ل راجل ونتكلم مع بعض ؟
-أنا م عندي معاك كلام ..وبت عمي م حتتزوجها لو عملت شنو ..
-طيب تمام ...برضو خلينا نتكلم وإتأكد إنو العقد اذا تم حيتم بالتراضي واذا لأ فهو لخير ..
الهدوء عم المكان وحتى أشرف سكت وبعدين هز ليه راسو ...دخلوا الاتنين بس جوا الصالون وانا م مطمنه أبداً لأنو واضح أشرف دا متهور قدر شنو ...بعد ربع ساعة طلعوا الاتنين وإتصدمنا بأشرف وهو بعتذر من ناس أبوي وببارك ليهم مسبقاً بعقدنا وطلع ركب عربيته ومشى ..
