شيفرة أمل

7

فعلاً تمت الخطوبة بناءً على طلبي عشان نتعرف على بعض شوية وم أظلمها معاي برضو ..يمكن انا م انفع معاها ..أو م نتفق مع بعض وكلها احتمالات حتى بعدها نفكر في مواعيد العقد وغيرها ...

بعد اسبوع من الخطوبة استأذنت عم اسماعيل إني سايق سمر مشوار وم حنكون برانا لانو م صح نطلع سوا واحنا لسه ماف شي شرعي بينا ... كانت معانا معين الم بتطلع مكان من دون وسن ..

طلعنا مع معين ووسن ومشينا ليهم ...قعدت مع عم اسماعيل واتونسنا بعد مدة جو البنات ومعاهم سمر الجهزت وطلعنا سوا ...

مشينا مطعم وبعد الأكل معين ووسن إستأذنو ومشوا طاولة براهم عشان يدونا فرصة ..عاينت لسمر كانت منزلة عيونها تحت وساكتة ..

-سمر ..

هنا رفعت عيوانها وعاينت لي وبسرعة نزلتهم وهي بتقول ..

-نعم ..

-أنعم الله عليك...إنتِ راضية بعلاقتنا دي ؟أقصد انو م عندك مشكلة من الزواج بي ..

كان لازم اسألها من موافقتها عشان اكون مطمن انها برضو راضية بي وم تكون مجاملة لاحترام رغبات ابوها ..سكتت مدة وصراحة خفت انها تقول شي م برضيني لكن الحمد لله قالت ..

-لأ م عندي مشكلة ..لكن انا محرجة لأني م بعرف اتعامل مع الجنس الآخر..

إبتسمت واتبسطت في نفس الوقت ..لانو ماف راجل بحب انو انثى بتخصه تكون منفتحة في تعاملاتها مع الرجال الأغراب ..

-طيب عايزة تعرفي عني شنو ..عشان المفروض لزمن العرس نكون فمهنا بعض ونشوف اذا بنقدر نكفي أو لأ ..

هزت راسها وسكتت ف بادرت انا بالكلام ..

-طيب ح أحكي ليك عني ..خالد محمد خالد الرشيد زي م عارفة طبعاً وعمري 32 صيفاً لانو م عندنا ربيع هنا صح !..

وقتها لاحظت ابتسامتها وانها مركزة معاي..

-اتخرجت من كلية الصحة جامعة الخرطوم ..وكان عندي شغف شديد في الجيش ..ف طوالي بعد التخرج دخلت الكلية الحربية وبعدين اشتغلت في كذا مكان لحدي م انتهى بي المطاف ل ضابط صحة برتبة نقيب في السلاح الطبي...العربية العندي دي تبع الشغل ..عندي بيت قريب من بيتنا الحالي أو إن صح القول هو حق أبوي لكن طلع من نصيبي ..مستقبلياً م بفكر في الخروج من السودان أبداً ودا لأسباب أولها إني متعلق بيه جداً وتانياً إني م بحب الفراق أو البعد من أبوي وأخواني ...في حاجة كمان وهي إني حافظ للقرآن بالقراءات العشر ..م عارف اذا مهم تعرفي ولا لأ لكن انا فخور بالحاجة دي وبعتبرها أهم إنجاز أعمله في حياتي ...

وقتها لاحظت انها عاينت لي بتركيز وهي بتقول ..

-ما شاء الله تبارك الرحمن..هنيئاً لك وربنا ينفعك ويرفعك به ..

-آمين يا رب وعقبالك ..

-اللهم آمين ...

سكتا بعدها عشان اديها فرصة اذا عايزة تتكلم بعد م حسيت انها ارتاحت للقعدة شوية..