شيفرة أمل

13

أجهزي وخلينا نمشي ...

من غير م أعاين ليها قلت كدا ...رفعت الشنط في العربية ومشيت للشقة الأجرتها ...هي إتفاجأت لما وصلنا ..شكلها مفتكرة إني ح أرجعها بيتهم ..

هي في غرفة وانا في غرفة ..اسبوع بالحال دا والكلام بينا شبه معدوم ...كل م تحاول تتكلم معاي بتحجج بشي ...لسه راسي مشتت وفي قلبي كتير إتجاهها ف أبداً م جاهز إني أسمعها ...

جيت من المسجد لقيتها قاعدة في الصالة ..مع أنه معظم تواجدها بكون في غرفتها ...سلمت عليها وإتجاوزتها لطريقي للغرفة وقفتني بجملتها الجمدتني في أرضي ..

-هو إغتصبني وانا عمري 10 سنوات ..

إلتمست في كلامها نبرة الصدق ... إلتفتت عليها بصدمة ..

-كككيف ..كيف يعني ..؟

دموعها بتنزل بغزارة ...وجسمها كله برجف ..مشيت عليها وقعدتها في الكنبة وقعدت جنبها ...

-سمر أحكي حصل كدا كيف ...والحيوان دا منو ؟

كان قلبي بضرب بشدة وحاسي بتوتر شديد ...

-فترة زواج أمي وأبوي م خلت من المشاكل أبداً لحدي م إتطلقوا ...وانا الوحيدة الإتضررت من الإنفصال دا ..أمي تاني إتزوجت ..وانا قعدت مع أبوي ولأنه براه وبالاضافة لإنه عسكري لقى صعوبة في رعايتي...ف لما أمي إخترحت إنها تسوقني وافق طوالي ...ومن هنا معاناتي الحقيقية بدت ...راجل أمي أسوء راجل شفته في حياتي ..إبتدت الحكاية بإنه يتحرش بي ...لما أكلم أمي كانت بتقول لي دا زي أبوكي وأكيد م بأزيك ...كانت بتحاول تخليني بعيده عنه ..لكن صعبه وإحنا في نفس البيت ..لحدي في يوم وانا نايمة حسيت بلمساته القذرة في جسمي ..صحيت بخوف وعايزة أصرخ لكن قفل لي خشمي وعمل فيني أبشع حاجة ممكن تحصل لبت مش طفلة في عمري ..الصباح أمي جات ولقتني بالمنظر داك ..كل العملته إنها حممتني وغيرت لي ملابسي وهي بتقول "أوعك تحكي الحصل دا ل زول " جملتها دي كسرتني أكتر من الحصل لي ...خوفها من المجتمع وإنه يقولو عليها مطلقة مرتين كان أكبر من خوفها على بتها...إختارت إنها تعيش مع مغتصب بتها عشان أطفالها م ينحرموا من أبوهم ..خافت منه ومن تهديداته ليها ورضخت لأوامره وكفت حياتها معاه وم همها بتها والحصل ليها ..وانا سكت لأنو اذا إتكلمت الناس ح تقول انا بت م كويسة ...أصحابي م حيلعبوا معاي تاني ...وأبوي ح يعاقبني واحتمال يقتلني ...دا الكلام الحفظوني ليه أمي وراجلها ..أبوي لما شاف تدهور حالتي الصحية جا وساقني معاه ولكن بعد فوات الأوان ..

حسيت بضيق في الصدر..وكل كلمة تقولها كأنها سكين في قلبي ...

-طيب ليه م كلمتيني من زمان ..ليه خليتيني أظن أنو ليك ذنب في الحاصل ؟

-من وصلت سن الزواج وانا برفض أي واحد يتقدم لي ...لحدي م أبوي زهج من الحكاية ووضعه الصحي إتدهور وكان كل همه إنو يزوجني وبعدها يموت مرتاح ...آخر واحد إتقدم لي أبوي أصر إني أوافق بيه ...حصلت الخطوبة وقلت لازم يعرف الحقيقة قبل نتزوج ...حكيت ليه كل القصة ..عارف قال لي شنو ؟ قال "وانا البخليني أضمن شنو إنك مظلومة ! إحتمال إنتِ بت م تمام والحصل دا بإرادتك ...كلكم بتمشوا تغلطوا وفي الأخير تقولوا إنكم مغتصبات وتعيشوا دور المظلومات " قال كدا وببساطة كمان وفسخ الخطبة ..ومن يومها ماف واحد إتقدم لي لأني لو بت كويسة م كان خطيبي خلاني بعد أيام من الخطبة ...لحدي م يوم جا أبوي وهو بقول لي إنك إتقدمت لي وهو وافق وانا كمان المفروض أوافق لأنو عريس زيك م بترفض ...رضخت للأمر الواقع وقلت خلي اليحصل يحصل ...والمرة دي م حأحكي شي لأني ببساطة خايفة أنك تقول لي نفس كلام خطيبي السابق ...خليتك تعرف بنفسك وهسي حكيت ليك كل الحصل وانت حر تصدق أو لا..