الريتانين " متراس الدرزياء "

_ الغُـرزة 43 || سوء فهم

﷽

روايـة : الريتانين " مِتـْـراسِ الدَّرْزِيُّــاء "
الڪاتبـه : تاليـن

• لا تنسوون التصويت بنجمة والتعليق بين
الفقرات " ڪونتيساتي " ... 🤎🪶
• متابعة حساب الواتباد باليوزࢪ tallen9n
• حساب الأنستا tallen.n_
• مُعࢪف قناة التلي 9_taffi

▪▫▪▫▪▫▪▫▪▫▪▫▪▫▪▫▪▫▪▫▪▫▪▫▪▫▪▫▪
" غيـدة "

واڪفة بنص الصالة اباوعلها وباب البيت يندگ بقوة وصوت الجيران تجمعوا برا زلم ونسوان يصيحون
::- ست سمرررر انتووو بخيرررر ؟
يا بناااات وينڪم ؟ غيددددة ...

جنت متيبسة بمڪاني بس عيوني ترمش نسيت الحرڪة ما ادري شلون بالگوة حرڪت رجلية ومشيت للباب فتحته للجيران باوعولي وحجوا بقلق
::- شصااااير معاااڪم ليش جنتي دتصرخين ؟؟؟

همست بصدمة وبلا وعي
_ ماما ماااتت
شهڪوا عيونهم لداخل البيت
::- وينهاااااا امج ؟ شصااار بيهاااا غيدةة ڪولي شي

اشرتلهم للصالة فاتوا لڪوها عالقنفة اتجمعوا على راسها النسوان يصحووها ويضربون على وجهها وما تصحى تعاونوا عليها شالوها وطلعوها لبرا جابوا سيارة جيرانه صعدوها واني واڪفة واباو؏ حتى دمو؏ ما بعيني صاحوا بية النسوان حتى اتحرك واطلع من صدمتي
::- غيدددة تعاااي وية امج تعاااي يا بنتي خلينااا
ناخذهاا للمستشفى

صعدوني بالسيارة ومشوا واني عيوني اباوعلها وڪل مشاعري تبلدت لا گلبي ولا روحي داحس باي شعور بيهن اعظم مخاوفي هي خسارة امي من بعد خسارة بابا وجاي اعيش هالمخاوف

اخذناها للمستشفى فوتوها جوة فحصوها الدڪاترة وطلع صاير وياها ذبحة صدرية الجيران قاموا بڪل الواجب خلوها بالغرفة واستفسروا من الدڪاترة وفهموا حالتها واني بس واڪفة وما احجي
وهي هم ما ڪعدت الى الليل الجيران راحوا لبيوتهم
واني بقيت يمها وحدنا بالغرفة

ڪل ساعة تمر اڪول هسة تڪعد وشوية تفتح عيونها وهي ما صحت ولا اعرف شلون وضعها وشجاي تحس
شلت هم وقلقت شلون راح ادبرها وياها واني وحدي بالمستشفى مع وياية احد يساندني

صار نص ليل واني مانايمة انسطرت لا ماڪلة ولا شاربة وراسي ديقوى ألمه اخذت موبايلي اتصلت
بـ رواگـد مغلق واتصلت بـ ايثار ما ترد ياربي شسوي وحدي محتاجة يڪونون يمي ويجون يشوفون وضع ماما الگتلها القهر علينا ومن مصايبنا

اتذڪرت هما بيت مِتْراسِ اتصلت بـ محمد وفزت روحي من دگ اتصلت هواي وما يرد وبقيت احاول لحد مجاوب
محمد ::- الووو
سمعت صوته وگلبي خوى نبرته تعبانة ورايحة من المرض
::- الووو غيدة !!
اخذت نفس اضيع غصتي
_ اسفة ازعجتك والدنيا ليل
::- صاير وياج شي ؟
_ لاااا بس داتصل بـ رواگـد وماترد هي يمك ؟
::- رواگـد بغرفتها نايمة على ما اعتقد
_ تڪدر تنطيها الموبايل احاجيها