Amar Bail

Part 39

"Sir major Lateef cover commander ka beta hai."
Babar Javed aglay din Umar Jahangir ko major Lateef ke kawaif se aagah kar raha tha. Umar ne be ikhtiyar aik gehra saans liya.

"Do mah pehlay promotion hui hai uski."
Babar Javed ne mazeed bataya.

Woh pichlle pandrah minute se Umar Jahangir ko uski Hadayat ke mutabiq major Lateef ke baray mein bta raha tha aur Umar ki tashweesh mein izafah ho raha tha.

Mazboot family back ground ka matlab uske liye pareshani ke ilawa aur kuch nahi tha. Major Lateef ke tor tareeqon se yeh andaza to usay pehlay hi ho chuka tha ke woh kisi seedhay saaday aam se gharane ka spot nahi tha. Uski gardan ke sariye mein usi terhan ke khham thay. Jis terhan ke Umar Jahangir mein thay. Isiliye Umar Jahangir ne uske tor tareeqon se yeh andaza laga liya tha. Aur yaqeenan Umar Jahangir ke baray mein yeh andaza major Lateef bhi laga chuka tha. Aisay khandano se talluq rakhnay walay log aik dosray ko barri aasani se pehchan jatay hain magar uske bawajood kisi mohom si umeed par Umar ne major Lateef ke back ground ke baray mein jan-nay ki koshish ki thi.

Magar jo tafseelaat Babar Javed laya tha, woh khasi hosla shikan theen. Uska poora bio data army se shuru ho kar army par hi khatam ho jata tha.

"Babar we have to be very careful."
Umar ne uski tamam baatein suneney ke baad kaha.

"Filhaal hamaray paas us aadmi ke khilaaf kuch nahi hai jis ko hum istemaal kar saken, is liye behtar yahi hai ke hum qadray mohtaat ho jayen. Mein nahi chahta usay atay hi mere oopar koi edge haasil ho jaye."
Umar ne Babar ko tanbeeh karte hue kaha.

"Sir mein ne pehlay hi tamam police station ke incharges ko warn kar diya hai, khud record check karna shuru kar diya hai mein ne. Police trolling ko bhi dekh raha hon. Insha Allah taala aapko koi shikayat nahi hogi."
Babar Javed ne Umar ko yaqeen dilatey hue kaha.

"Mujhe to koi shikayat ho ya nah ho, mein yeh chahta hon ke army monitoring team tak meri koi shikayat nah puhanche."
Umar ne uski baat ke jawab mein kaha.

"Aur un sab logon ko bta do ke mujh tak unki corruption ka koi maamla nahi aana chahiye. Agar mujh tak us terhan ka koi issue aaya to mein kuch dekhe ya sunay baghair suspend ( moattal ) kar dun ga aur us mamle mein koi wazahat qubool nahi karoon ga."
Umar ne Babar Javed ko tanbeeh karte hue kaha.

"Khud tum bhi apne khanay peenay ka silsila kuch der ke liye moqoof kar do. Tumhara bank balance khasi achi haalat mein hai. Abhi kaafi lamba arsa tum us mein mazeed izafay ke baghair waqt guzaar satke ho."
Umar Jahangir ab khud Babar Javed ki baat karne laga, jis ke chehray par aik khsyani muskurahat namodaar ho gayi thi.

"Yes sir!"
Usne usi andaaz mein apni khaft kam karne ki koshish karte hue kaha.

"Khaali yes sir nahi, mein waqai tumhe bta raha hon. Is baray mein tumhe bhi nahi bakhson ga. Pehlay to tumahray baray mein jitni shikaytein aati rahi hain, unhen nazar andaaz karta raha hon. Magar is baar mere liye yeh mumkin nahi hoga, yeh mein tumhe saaf saaf bta raha hon."

Umar Jahangir ka lehja Babar Javed ko khilaaf mamool sanjeeda laga tha, magar woh jaanta tha ke aaj kal woh jis qisam ki museebat mein bhunay hue thay us mein yeh ahteyati iqdamaat Umar Jahangir ki majboori thay. Uske ilawa uske paas koi charah nahi tha. Shayad army monitoring committee ki mojoodgi ke baghair Umar Jahangir us qisam ki koi Hadayat deta aur un par amal karwanay ki koshish karta to uska poora ma tehat amlah uske khilaaf aik tufaan khara kar deta.

Umar Jahangir ko us se pehlay apni postings mein kuch us terhan ke talkh tajarbaat ho chuke thay, jab usne apne matehat amlay par kuch sakhti karne ki koshish ki aur uska nateeja uske liye acha nahi nikla tha. Khud uska apna PA uske mun iqdamaat ke baray mein tamam it-tila-aat us se neechay amlay ko pohanchata raha tha. Uske ilaqay ke political big wigs ko uske tamam faislon aur uski mumkina naqal o harkat ke baray mein tamam it-tila-aat hoti theen. Nateeja uske har red ki nakami ki soorat mein nikalta tha. Soorat e haal kuch is terhan ki ban chuki thi ke uske shehar ki poori police aik DSP ki qayadat mein aik taraf thi aur woh akela aik taraf tha. Bazahir DSP aur baqi tamam police us ke ehkamaat par mustadi se amal karte thay magar androon khanah us ke ehkamaat ki ifadiyat ko zael karne ke liye woh uske ehkamaat anay se pehlay hille hi sargaram amal ho chuke hotay thay.