~Present
Agle din woh university chali gayi thi. Uska khayal tha ke uski wapsi tak Uncle Jahangir aur Umer ke darmiyan jo baat honi hai, ho chuki hogi, aur ghar ka a'asab shikan mahol badal chuka hoga. Magar sapahar ko wapas aate hi usay pata chala tha ke Umer subah hi kahin chala gaya tha aur abhi tak wapas nahi aaya. Uncle Jahangir ka paraa aasmaan se baatein kar raha tha aur Nano ki samajh mein hi nahi aa raha tha ke woh kya karein.
Umer shaam ke waqt wapas aaya tha aur is baar Uncle Jahangir ne waqt zaya kiye baghair us se baat karni shuru kar di. Woh lounge mein hi baithe hue the aur Alizeh chand minutes pehle hi unhein chai dekar aayi thi.
"Main aap ko kal bhi bata chuka hoon ke mujhe aap se koi bhi baat nahi karni."
Umer ne lounge mein khade khade haath utha kar kaha tha.
"! Umer! Is tarah"
Umer ne Nano ko baat bhi mukammal na karne di thi.
"Granny! Main yahan is liye aaya hoon taake kuch din sukoon se guzar sakoon. Agar yeh mumkin nahi hai to phir main yahan se chala jaaunga."
Yeh keh kar woh lounge se nikal gaya tha. Nano ne use awaaz di thi magar usne unki awaaz ko nazar andaz kar diya tha.
"Alizeh! Jao use jaakar kaho ke aakar chai to pee le."
Nano ne Alizeh se kaha. Woh uth kar Umer ke kamre ki taraf aayi thi. Dastak ki awaaz sunte hi andar se Umer ne awaaz di thi.
Alizeh darwaza khol kar andar daakhil ho gayi thi. Woh apne gale mein bandhi hui tie khol raha tha. Alizeh ne Nano ka paighaam use pahuncha diya tha.
"Nahin, mujhe chai nahin peeni!"
Us ne bari tarshi se kaha.
Alizeh ne us ke chehre par thakan ke asar dekhe the. Us ki aankhon mein surkhi thi. Shayad woh raat ko der se soya tha. Alizeh ko be-ikhtiyar us par taras aa gaya. Us ka dil chaaha ke woh Uncle Jahangir ko yahan se wapas bhej de.
"Agar woh baat nahin karna chahta to Nano aur Uncle use kyun majboor kar rahe hain?"
Us ne khud hi jaanib-dari se socha tha.
"Kya main chai yahaan le aaun?"
Alizeh ne hamdardi se us se poocha tha.
"Nahin! Zaroorat nahin hai!"
Us ne bari rukhai se inkaar kar diya tha. Woh isi khamoshi se kamray se bahar nikal aayi.
"Woh chai peena hi nahin chahta!"
Us ne lounge mein aakar kaha tha.
"Woh mera saamna karna nahin chahta, aap dekh rahi hain ke woh mere saath kya kar raha hai."
Us ne Uncle Jahangir ka chehra surkh hote hue dekha tha.
"Alizeh! Tum us se jaakar kaho ke main bula rahi hoon."
Nano ne Uncle Jahangir ko jawab dene ke bajaye us se kaha tha. Woh ek baar phir wapas palat gayi thi. Usay apne peeche Uncle Jahangir ki aawaaz sunayi di thi, woh ek baar phir Nano se kuch keh rahe the.
Umer is baar us ke paighaam par bhadak utha tha.
"Main ek baar bata chuka hoon ke mujhe chai ki zaroorat nahin hai aur na hi mujhe bahar aana hai. Tum jaakar Granny se keh do aur please ab dobara yahaan koi paighaam le kar mat aana. Baar baar mujhe disturb mat karo."
Us ne khaas taur par talkhi se Alizeh se kaha tha. Usay yaad nahin padta tha ke Umer ne kabhi us tarah usay jharkaa ho. Woh ek baar phir palti thi aur tab hi ek jhatke se darwaza khol kar Uncle Jahangir andar aa gaye the.
YOU ARE READING
Amar Bail
Roman d'amourPresenting The Novel "Amarbail" written by Umera Ahmed in English language. Join the heart-wrenching journey of Aleezay Sikandar and Umar Jehangir. A story that beautifully portrays the intensity and sacrifices that love can entail. © All Rights Res...
