Amar Bail

Part 29

☆☆☆

"Yeh aalam shoq ka dekha naa jaye...
Woh buut hai ya kkhuda dekha nah jaaye.."

Qulukarah ki aawaz fiza mein goonj rahi thi. Samaeen ghazal ke har bol ke sath! hi th apna sir dhun rahay thay. Aleeza gayab dimaagi ke sath ghazal ko sun rahie thi. Yeh Tahira Syed ki chauthi gazal. Agar woh Zehni tor par composed hoti toh shayad waqi sabhi logon ki tarah umdagi se gaayi jane wali ghazal ko srah rahi hoti. Magar us zehni kefiyat ke sath kisi ghazal ko sarahana...

Har nai ghazal ke sath mehfil ka rang jamta ja raha tha. Uska dil aur ucchat hota ja raha tha. Logon ki farmaishi chitting ab aik tawatar ke sath gulukarah ke paas pohanchna shuru hogayi theen. Ab coffee serve ki jarahi thi. Aleeza ne apne samnay pari plate mein se kuch sonf aur alaichi muh mein rakhi aur coffee ka aik cupp utha kar khari ho gayi. Kharray honay se pehlay usne apne baen janib baithi hui Sarjeena aunti ke kaan mein thora sa jhuk kar sargoshi ki.

"Mein kuch der ke liye bahar ja rahi hon. Thori der baad aa jaoon gi."
Sarjeena aunti ne sir hila diya. Woh poori terhan ghazal se mehfooz ho rahi theen.

Aleeza apni shaal ko apne gird mazeed lapete hue aik haath mein coffee ka mug liye bahar ki taraf chali gayi.

Moseeqi ke shore aur roshiniyon se yak dam qadray tareqi aur khamoshi mein aakar usne ajeeb sa sukoon mehsoos kiya. Fiza mein khunki bohat barh gayi thi, usne apni terhan kuch aur logon ko bhi coffee ke mug ke sath ya khaali haath bahar mojood paaya. Un mein aur us mein farq sirf yeh tha ke woh akeli thi...

Coffee ke ghoont letay woh wahan tehalne lagi. Danista tor par usne baqi logon se khasi daur jane ki koshish...

Woh us waqt wahan kisi se hello haae nahi chahti thi. Islamabad mein uske chand mah ke qiyam ne usay Ayaz aur Sarjeena ke halqa ahbaab mein khasa muta-arif karwa diya tha, aur is waqt bhi Bhorban hai mein taqreeban wohi sab log mojood thay. Jinhein woh Islamabad ki mukhtalif taqrebaat mein dekha karti theen.

Open air ki seerihoon mein baithy woh daur tareqi mein pahoron ke dhundley luho aur unpar kahin kahin tamtamati roshiniyon ko dekhnay lagi.

Usay wahan baithy thori der hui thi, jab usne bohat dur se kisi ko apni taraf atay dekha. Anay wala mard tha. Woh bohat dur se usay pehchan nahi parhi thi, magar anay walay ka rukh chunkay uski simt tha is liye usne nah chahte hue bhi anay walay shakhs par apni tawajah markooz rakhi.

Is se pehlay ke woh uske bohat qareeb ajata, usne usay pehchan liya.

Woh Junaid Ibrahim tha....

☆☆☆

Junaid se uska pehla taaruf wahin Bhurban mein hi hwa tha.

Woh do pehar ke qareeb Sarjeena ke sath wahan pohanchi thi. Do pehar ke khanay ka intizam club ki taraf se tha. Hotel ke hall mein buffet ke liye woh bhi Sarjeena ke sath gayi thi. Sarjeena hall mein jatay hi ladies club ki wahan pehlay se mojood bohat si khawateen ke sath guftagu aur khush gpyon mein masroof ho gayeen. Aleeza ne apni plate mein kuch khana liya aur aik khaali maiz par ja kar baith gayi.

Usay khana khatay hue abhi kuch hi der hui thi jab Sarjeena uski taraf aayi. Unke sath aik daraaz qad no jawan bhi tha.

"Junaid! yeh hai Aleeza , jis ka mein abhi thori der pehlay zikar kar rahi thi."
Sarjeena aunti ne qareeb atay hi barri be takalufi se Junaid naami us shakhs se Aleeza ka taaruf karwaya. Aleeza ne haath mein pakra hwa chammach plate mein rakh diya aur kuch herat se uske sath hello haae ki, jo halki si muskurahat ke sath uski taraf mutwajjah tha.

"Aur Aleeza ! yeh Junaid Ibrahim hai. Hamaray bohat hi achay jan-nay walon ka beta hai. Architect hai... Mein tumhe akailey baithy dekh kar isay pakar layi... taa ke tumhe company de... Mein abhi kuch der masroof hon...."
Sarjeena aunty ne barri be takalufi ke sath kaha.