මුහමාලේ අපේ ඔපරේෂන් එකට හරියටම මාසෙකට කලින් යුධ අගල් කපාගෙන ඉස්සරහට යන්න කියල අපිට නියෝග හම්බුනා....
"හැමෝම හොඳට මතක තියාගන්න ඕනෙ කොටින්ට අපේ මේ වැඩේ වැඩේ ගැන කිසිම ඉවක් වැටෙන්න බෑ....!! පරිස්සමෙන් වැඩටික කරපල්ල කොල්ලනේ..."
"හරි සර්..."
අපිට යුධ අගල් කපන්න සිද්ද උනේ රෑට ඒ කොටින්ට පේන්නෙ නැති වෙන්න. මොකද උන් දවල්ට තල් ගස් උඩට නැගල ඔත්තු බලනව අපි මොනවද කරන්නෙ කියල.... අඩි හයක් ගැඹුරට අපිට එහාමෙහා යන්න පුළුවන් විදිහට හතුරට උදැල්ලක සද්දෙවත් ඇහෙන්නෙ නැති වෙන්න... මීටර් දහය ගාණෙ හතරදෙනාගෙ ටීම් වලට මේ අගල් කපන වැඩේ පැවරුණා....
අගලෙන් අයින් කරන පස් පිටට දාන්න අපිට බෑ.මොකද එහෙම කරොත් කොටි ඒක දකිනව... ඒහින්ද අපි කරේ පස් ගෝනි කරේ තියාගෙන පස්සට ගෙනියපු එක....අගලෙන් අයින් කරන අලුත් පස් කොටින්ට පේන්නෙ නැති වෙන්න අපි කොළ අතු දාලා කවර්කරා.. අගලෙ තැනින් තැන තල් කොට පස් ගෝනි දාලා තාවකාලික බංකර් ක්ෂණිකව හැදුව...මේකාලෙදි අපේ කොල්ලන්ගෙ ජීවිත ගෙවුනෙම අගල ඇතුලෙ පස් එක්ක.....
මුහමාලෙ යුධ අගල් කැපීමෙ අපේ මේ රහසිගත ක්‍රියාවිත ජීවිතේට අපි කිව්වෙ බිංකුණ්ඩා ජීවිතේ කියල... මොකද ඉතිං අපිත් ඌ වගේ බිම හාරල ගොදුර අල්ලගන්නනෙ බලන්නෙ....
මේ ඔප් එකේදි බාධා ඇතිවෙන එක අඩු කරගන්න අපිට සෑහෙන්න කපටි විදිහට වැඩ කරන්න උනා... රෑට අගල් කපද්දි කොටින්ට උදලු යකඩ සද්දෙ ඇහැන්නෙ නැති වෙන්න අපි උන්ගෙ ආරක්ෂක වළල්ලට රෑ තිස්සෙ වෙඩි තිබ්බ වගේම කාලතුවක්කු ප්‍රහාර එල්ල කරා.... ඒකෙන් අපිට පුළුවන් උනා කොටින්ව නොමග යවල අපේ මෙහෙයුම රහසිගතව කරගෙන යන්න....
"දිනුෂ්ක ලෑස්තිද...? මං ගාවින්ම හිටපන් හරිද... වැඩි ඈතකින් එන්න එපා..."
"හරි කැප්ටන් මං ලෑස්තියි..."
"මහියා , නලියා පරිස්සමෙන් උඹලත්. ඇටෙව්වා... එළියට ආවා.. පිපිරෙව්ව පැනගත්ත.... මතකනෙ උපදෙස්... එක තප්පරයක් වැඩිපර රැඳෙන්න එපා... හොඳ කල්පනාවෙන් වැඩේ කරපල්ලා... ආයෙමත් ඉක්මනට මෙතනදි හම්බෙමු එහෙනං...."
