انا فعيونك مواطن دولته صارت عييونك

Part32

بدت تسوي الشاي وراحت تجيب البلوفرات وطلعت توديهم عشان يمدي تجيب الشاي وشافت حمد قايم بينام:حمد يالشايب خير سويت شاي لنا اجلس اشرب منه
حمد:دام فيها شاي اجل بجلس انتضر
رسيل بضحك:خلاص خلصته بس جيت اجيب بلوفر ساره وارجع
ناضرت سعود الي كان يبتسم وابتسمت ودخلت جابت الشاي ورجعت تصب لهم
عزام:بكره بمشي الرياض طولتها بزياده انا مع شغلي لو تاخرت فصلوني
الجد عواد:بحفظ الله يوليدي وللحين سعود يبي معك؟
سعود:اي ياجدي بدور لي حتى انا وظيفه هناك
رسيل الي من سمعت الطاري تضايقت بس بينت انه عادي
عزام:عاد استاذنكم بروح انام عشان امشي وانا شبعان نوم وها ترا الي مايصحى بروح بدون اودعه
مسك:ياليل طيب تعبنا اليوم بنام نومه اسطوريه
عزام:نامي النومه الاسطوريه الحين عشان تصحين وانتي شبعانه نوم
مسك ضحكت:اي والله دايخه بشرب شاي رسيل واقوم انوم
بدت تنقص الجلسه شوي شوي عشان ينامون ومحد كان ناوي يسهر بعد التعب الي تعبوه بعد ماقامو الكل ماباقي الا رسيل وسعود ورسيل شافت سعود للحين ماتكلم وقامت تجمع كاسات الشاي عشان تدخلهم معها
سعود:رسيل زعلانه عشاني بسافر؟
رسيل:ماني زعلانه
سعود:اجل اذا زعلانه وش بتسوين لكن والله ماني متاخر الخميس جايكم وبإذن الله كل خميس عندكم وانا بس اشوف اذا فيه وظيفه ولا لا اذا مافيه برجع انشب لك كل يوم وتكرهيني قبل الزواج
رسيل ابتسمت :ادري بس مابغاك تروح تعودت عليك
سعود:معليك كل يوم بالجوال راسليني واتصلي علي لو تبين وقرب منها يحضنها ونطق:قومي نامي عشان تصحين واودعك
رسيل:بس بشيل الكاسات داخل
سعود:انا ادخلهم معي
راحت رسيل تنام وانتهت هاليله السعيده عليهم
في صباح الفجر
ام عايد:يابنات قمن يلا وعدن عمكن قبل يمشي
رسيل الي فزت من سمعت طاري مشي وراحت تتوضى وتصلي الفجر وبعدها بدو يصحون البنات ورا بعض
عند العيال الي كانو جالسين مع سعود وعزام ونطق سيف:مابقول بشتاق لك بإذن الله جيّه عليكم وجيّه علينا مابنطول على بعض
عزام:اكييييد مابنطول معليك
ام سامي نادت سعود:تعال سلم على اخواتك ومرتك قبل تمشي
سعود وهو متوجهه لها:وبجي عشان اودعك انتي وجدتي وعماتي
بدا سعود يسلم على اخواته وامه وجدته وعماته ووصل لرسيل وحضنها ونطق:مهما بعدت انتي بالقلب وانا على وعدي امس
رسيل الي استحت من كلامه بسبب وجود اخواته وامها وامه وعماته البقيه بس لفت ولقتهم مو مجودين ! ودرت ان سعود قايل لهم
رسيل:ليه تقولهم يطلعون
سعود:تبيني مااودعك زين؟
رسيل:لا بس مدري
سعود الي سمع عزام ينادي:يلا استودعك الله وكان بيمشي بس استوقفه حضن رسيل المفاجاء وابتسم وخلها لين هي تتركه بنفسها
يوم رسيل شافت سعود واقف استحت وركضت عند عزام تسلم عليه
العنود:عزام بفقدددك لميين بطبخ اخر الليل
عزام:ياحبيبتي مو نهاية عمري معليك كل اسبوع جايك تسوين لي انواع واشكال من الاكل
العنود:لاتصدق نفسك بالحيل انت عاد
سامر:شف ذي!! جحدتنا وش الي لمين تطبخين حنا موجودينن
العنود:لا معليش اعتزل الطبخ لين يجي اخوي حبيبي
سيف:ياشينكم امش امش عزام بس
سعود:يلا عاد استودعكم الله
-وطلعو عزام وسعود بالسياره ومسكو طريق الرياض-
عند البنات الي فجاءه حسو بضيقه لان صعب تكونين متعوده على شخص كل يوم تشوفينه وتجي فتره ماتشوفينه كل يوم
رغد تأففت:رغم اني ماودعتهم بس صدق حزنت ودي نغير جو
لمار:حتى انا والله ضييقه
ساره:عاد فيه كوفي فاتحينه نجربه؟
مسك:لا تكفون مالي خلق كوفيات جيببو ونجلس بالسطح برا غييوم ونعزم سلمى تجينا
امجاد:صح والله احسن بالكوفي مابناخذ راحتنا
ساره:خلاص تمام دورو احد يجيب الكوفي وانا بشوف سلمى اذا يمدي تجي
راحت لينا لحمد ونطقت:حمودي ودني الكوفي بجيب لنا
حمد:حموديييي اطلعي عني بس بنام
لينا:خير حمد انا محتزمه فيك توديني تبيني ارجع للبنات متفشله انك عييت!
حمد ماكان يبي يخليها بخاطرها ونطق:الشكوى لله جيبي عبايتك وتعالي
لينا:احبببك يلاااا الحيننن جايتك
حمد:ها تاخرتي ماوديك
لينا:معلييييك عد العشر وانا عندك
طلع حمد يشغل السياره على مابال تجي لينا
-بالطريق عند عزام وسعود-
عزام الي كان كاتم مشاعره لين حس انه خلاص مايقدر يكتم اكثر بس ينتضر احد يساله ويكب العفش له
سعود الي انتبه على عزام ساااهي ومو منتبه زين ونطق:عزام انتبه وش فيك
عزام:سعود لو اقولك شي يكون بيني وبينك؟
سعود الي شاف بل جالسه تمشي بالطريق ونطق:حتى البل بتدري
غبي انت اكيد ماني معلم احد
عزام بضحك:للتاكيد يعني
سعود:وش عندك علمني
عزام:والله مدري من وين ابدا بس انا شفت وحده من بنات عايد وللحين مو قادر اطلعها من عقلي وجالس افكر فيها كل شوي ومشوي يوم مشيت من عند اهلي حسيت بضيقه كان ودي اودعها كان ودي اعلمها اني ابيها ولا يجي احد ياخذها مني
سعود:لاتفكر كذا ياعزام علم امك انك تبيها والباقي ييسرها ربك هذاني معلم امي من اول ماكبرت رسيل وكل شوي تاجل لين جا اليوم وتكلمت فيه والحين هي بين يديني لا يوسوس لك الشيطان امجاد لك ان شاء الله
عزام:بشوف وانا عمك
سعود:ياشينك كمل الطريق بس
عزام الي حس براحه انه علم احد وبدا يكمل الطريق زين بدون هواجيس
-نرجع عند البنات-
ساره:بنات سلمى تقول جايه ولاتسون حلى سوته ومحد اكل منه بتجيبه لنا
امجاد:الله تم بروح افرش بالسطح لاتتاخررون
مسك:بمشي معك يلا
طلعو يفرشون الفرش وطلعو البنات وراهم وانبهرو من جمال الجو
امجاد:الحمدلله ماطلعنا بالكوفي نجلس هنا ونناضر الجو المزيون
ساره:صدقتي
كانو يسولفون البنات لين تجي لينا وسلمى
لينا الي وصلت الكوفي وقالت الطلبات ونطقت:حمودي تبي؟
حمد:ان سمعت الدلع مره ثانيه يويلي
لينا:خييرر ليه انقلع مايصلح معك غير حمد
حمد:انا ابيه كيفي
لينا:طيب تبي ولا لا
حمد:لا مو مشتهي شي
اخذت لينا الطلب ورجعو البيت ووصلت سلمى للبنات وبدو يسولفون مع بعض عن الي امس صار
سلمى:ياابنات فيه وحده عسللل مررره جلست تمدحكم وتمدح علاقتكم مدري مين هي بس ماشفتها الا هالمره
البنات الي بدو يععدون لها البنات الي يعرفونهم ونطقت سلمى:لا لا ذي بيضاء وشعرها ويفي ولابسه موفي غاامق وجنبها اختها نفسها تهبل ماشاء الله ولابسه اخضر غامق بعد
لمار:عرفتهاااا عرفتهااا جدتي امس علمتني عنهممم نسييييتتت
رغد:ذولا رنيم ولين؟
لمار:ااايييي ذولااا ابوهم صديق جدي وامس جا تذكرت
سلمى:ماشاء الله قبوللل حتى امهم
ساره:لفتوني هالبنتين مع اني ماكنت عارفتهم
سلمى:مره ماشاء الله
لمار:خلونا نتصل عليهم يجوون احس ودي اتعرف عليهم
لينا:ابك ذي ماعندها بريكات
سلمى:اقول حتى انا وديي
امجاد:كلنا بس بنات مالي خلق اتكشخ تكفون خلوه بكره عشان نرتب الدور الي تحت ونجلس فيه
العنود:اي صادقه وماعندنا شي لهم نقول لجدتي تتصل على امهم ويجون
رغد:اي احسن بكره
بنص سوالفيهم بدت السماء ترشرش مطر
امجاد:الله يييجنننن ببكييي
ساره:وناااسه من زمانن عن المطرر اشتقتت
بدو يلمون اغراضهم ويلعبون بالمطر
ام عايد الي درت ان البنات فوق وطلعت لهم :انزلن الله يهديكن برد عليكن ياابنياتي
رغد:تكفين يمه تعالي العبي معيي بالمطر مره يجننن
ام عايد الي كانت بترفض بس شافت نظرات رغد وتقدمت:شوي وانزل اخاف اتعب زياده
امجاد باست راسها:لا بسم الله عليك ان شاء الله مافيك الا الخير
بعد دقايق نزلو البنات تحت يتدفون ويغيرون بعد ماامتلو من المويا
عند العيال بالمحلات
عايد:ياعيال دام فيه هنا عمال شرايكم نكلم عمي نصير نجي مره باليوم بعد الفجر نشيك ونرجع البيت مو احسن؟
سعد:تبي الصدق بنطفش نقوله يوم بالاسبوع نسوي كذا عشان نروح العزبه
سيف:عاد هالجو يبي لهاا طلعه وكشته
سامي:صدقت بروح اكلمه
ابو عايد والجد عواد وعياله كانو جالسين بجلسه مقابل محلاتهم ويسولفون عن ايامهم وهم صغار
ابو عايد:يوه للحين اتذكر فرحتي بحمل ام عايد بعايد يوم اول مادرا انت
الجد عواد:ومن حبي وغلاتك لك سويت لك عشاء وهو ماجا بس طلع رجاال
سامي الي داهمهم:شرايكم اليوم نخلي المحلات على العمال؟ الجو يبي له كشته
ابو سامر:انت ماتتعب مااشاء الله عليك قبل امس المزرعه وامس ملكة اخوك والحين تبي كشته!
سامي:اح يايبه بس والله حنا العيال بنطلع مو كلنا
الجد عواد ابتسم وشاف سامي وابوه يتناقشون وقال:رح رح يوليدي وانتبهو على الطريق لاجاكم مطر اغدو عندنا
سامي قرب وباس راس الجد ونطق:احببك الله لايخليني مننك
الجد عواد:ولا منك امش قبل اغير رايي
راح سامي ركض للعيال وعلى طول رجعو البيت يجهزون اغراضهم ويمشون
عزام وسعود وصلو الرياض واتصلو على اهلهم يطمنونهم وبعدين دقو على العيال
عزام:وراكم مو بالمحلات
سعد:بنروح نكشت بالعزبه الجو مايتفوف
سعود:يمدي نرجع؟
حمد بضحك:اودعك بحسن منها اذا رجعتو
عزام:يلا عاد بس اتصلت اطمنكم وصلنا وببنزل الشغل
سعد:سعود معك؟
عزام:اي بينزل يدور له معي اقرب لي احسن
سعد:زين بالتوفيق
قفل الجوال وجهزو وبعدها انطلقو لعزبتهم
عند البنات بعد مانزلو من المطر بدو يرجفون برد ونطقت ام سيف:قمن غيرن ملابسكن برد
لمار:يمه برردد بررددد مالي خلق اغييير حتىى
ام سيف: كيف بتدفين وملابسكم مليانه مويه؟ قومي يلا انتي والبنات غيرو وتعالو وعطو سلمى من عندكم حتى هي برد عليها
دخلو البنات يغيرون ملابسهم الي امتلت مويا ونفس الشي ام عايد ونزلو تحت ونطقت مسك:بسووي لنااا هوت شوكلت واجيكم
رغد:يمييي اشتهييته صدقق يبي لها مع هالاجواء
امجاد:سوي لامي وعماتي اعشاب
مسك:وحده منكم تجيني تسوي الاعشاب وانا الهوت شوكلت
لينا قامت:يلا انا بسويه
بدو البنات يسولفون مع امهاتهم وسلمى تسولف معهم وخلتها الجده ام عواد تتصل على امها تجيهم وجتهم ام سلمى وكلهم متجمعين حولين الدفايه
مسك بدت توزع الهوت شوكلت عليهم وجلست معهم برضو تسولف
عند العيال
عايد الي كان متثلم من البرد:بررد برد
سامي:جمدده شبو النار وببدا اسوي الغداء عشان يكون غداء وعشاء دام الوقت تاخر
سعد:يلا اجل بسوي الشاي والقهوه لين تخلص
بدا سامي يسوي الغداء بمساعدة حمد والعيال الباقين متجمعين حولين النار ومعهم عامل العزبه اسمه "فريد"
فريد:فيه نفر امس يجي هنا يسال عن ابو عايد
عايد: مين تعرفه
فريد:لا اول مره اشوفه
سعد:يمكن من اصحابه قبل
عايد:ابوي ماقد جاب طاري احد غير احمد النذل وعمي مافيه غيرهم
سعد:مدري والله اذا رجعنا نشوف مين هو
سامي:كمم احط رزز
سامر:مدري حط الي تحطه حنا جواعه
سامي:اذا بقى محد ياكله غيرك
سامر بضحك:عادي بس اخلص جيعاان
عايد الي قام من العيال وراح البل وكان يصور حمد طلعتهم ولف الجوال على عايد ونطق"وذا البدوي ماغير مع نياق جدي" وعايد ابتسم من كلام حمد وقال له:شسوي احبهن
حمد:وانا احبك
عايد بنقد:كمل الفلوق واانت ساكب بس
حمد:مايستااهل مشاعري المهم شوفو اخواتي ذا اخوكم سعد وذا ورع ولدكم سيف وذاااك سيف يسوي الغداء لنا وذا فريد جالس معنا
بعد فتره خلص سامي الاكل وحطه لهم:بررد برردد بناكل ونمشي
سيف:اي اكيد
حمد:وذا الغداء من يد سامي
سامي:وانت زين ماتصورني وانا رايح الحمام
عايد ضحك:لو درى عنك صور
حمد:يلا عاد مع السلامه زعلوني العيال
وبدو يضحكون على حمد الي قفل كاميرة الجوال وارسله لقروب العايله الي كلهم فيه وبدو يتغدون
عند البنات الي كانو مو يم جوالاتهم وبس رسيل الي معها الجوال ونطقت:وناااسه العيال مسوين فلوق تعالو نتابعه
مريم بضحك:فلوق؟متاكده بيكون كل شي الا فلوق بس افتحيه لنا
بدو يتابعون البنات ويضحكون على حمد واسلوبهم مع بعض ونطقت الجده الهنوف:ياجعلني ماانحرم لامنكم ولا منهم يارب
مريم الي كانت جنب جدتها وحضنتها:ولا يحرمنا منك يابعد الدنيا
عند عزام وسعود الي راحو الشغل وقدم سعود على وظيفه وقالو له تعال بكره نعطيك اذا نقبلك ولا لا اما عزام بعد يشتغل شغلته وسعود طلع يتمشى بشوارع الرياض لين يخلص سعود ويرجع ياخذه
عند بيت ال عواد الي كانو فيه العمال وكسرو الجدار وكان باقي فيه تعديلات وقالو بيرجعون له بكره العمال
والعيال بعد الغداء رجعو البيت وتروشو وجلسو حولين النار الي شابينها لهم بالمشب
الجد عواد:روحو ازهمو البنات عندنا
سعد:عندهم سلمى وامها وقالت لي امي مايطولون شوي ويمشون
عايد:صصححح يبه تذكرت فريد قالي امس جاه واحد يسال عنك وسالته قد شفته؟ قال لا ماقد شافه تعرف احد من زمان مو شايفه ولا وش السالفه
ابو عايد:لا والله ماني متذكر احد كل الي اعرفهم للحين يعرفوني ويعرفون اخباري
مايمدي عايد يتكلم الباب دق وطلع له حمد يفتح الباب وانصدم من الرجال الي اول مره يشوفه:هلا مين انت
:ذا بيت ابو عايد
حمد:اي هو بس مين انت
:زين بدخل واكلمه اذا مافيه مشكله
حمد تنرفز انه مايرد على اسالته بس رحم كبر سنه وقال:ادخل ادخل
حمد الي كان سابقه ونطق:فيه رجال يبيك ياعم
ابو عايد:عساه خير دخله
دخل ابو رحيل ونطق اول كلماته:لايمكن للعمر يفرقنا ياخوي العمر
فز ابو عايد من سمع كلمته وراح يحضنه وبدت تنزل دموعهم وكلهم كانو منصدمين من عدم معرفتهم للشخص ولا عرفو اسمه
بدا ابو رحيل يسلم على العيال والجد عواد وعياله ونطق ابو رحيل:اعذرني ياخوي بس يوم نقلت وماعلمتك بنتي هاجر كانت بالمستشفى ونقلوها على طول الرياض ولا يمديني ارجع اخذ اغراضي على طول مشيت من المستشفى لين الرياض ويوم تحسنت حالة بنتي رجعت للجنوب ولا شفت سيارتك حولين الباب ولا شفت البيت منور ولا شفت ولدك يلعب حولين الباب وقلت يمكن ترجع لكن مرت السنين ومارجعت ويوم شفت مافيه امل تذكرت اخو مرتك يوم يعزمنا وسالته عنكم وقال لي نقلو نجد وجيت وساللت العزب الي على الطريق وبس واحد قال لي يعرفك بس مايعرف موقع بيتك ويوم جيت عند المحطه حقت مدخل نجد علمني رجل عليك يوم شافني اسال راعي البقاله وهذا انت قدامي
عايد الي تذكره ونطق:ارحببب والله كيفك وكيف الاهل ووين ماجو معك رحيل ورحيم
ابو رحيل:جيت هالمره لحالي اتاكد اذا انتم للحين بنجد ولا لا المره الثانيه ان شاء الله اجيبهم يسلمون عليكم
ابو عايد: ابد البيت بيتك وحيااك ولاني شايل بخاطري عليك بسبب غيبتك وكيف بنتك الحين عساها بخير وكيف ملك
ابو رحيل:لا بخير الحمدلله يارب وملك ماعليها كلهم بخير الا انت كيف بنياتك
ابو عايد:كلهم بخير الحمدلله
ابو رحيل وقف:عاد استاذنكم برجع الجنوب عند اهلي ولنا لقى ثاني بإذن الله واشر على حمد:وانت اسف على الاسلوب بس كنت خايف يطلع مو بيته وافقد الامل

سبحان الله ،استغفرالله