LOYAL HEARTS #2: BACK TO YOU

FIFTY

                  

 

CHAPTER FIFTY

_________________________________________________________________________________

 

Maingay kaming lumabas ng Coliseum. Nakasuot na ng sando ang nakaakbay sa'king si Azriel  dahil ayaw ko siyang basta basta nalang magta-topless dito sa labas. Ayaw niya rin namang ipatanggal ang jersey shirt na pinasuot niya sa'kin.

Panay ang pagmamayabang ni Archer sa ginawang pag-shoot kanina. Binaha siya ng kantyaw nina Brennan at Terrell dahil sa naging foul nung second quarter.

"Shit talaga! Ten points sana naging lamang natin kung di lang ako sinangga nung Roberto. Foul tuloy, di ko pa napasok." umiiling niyang maktol.

"Di ka raw pang one pointer eh." komento ni Brennan.

"Oo nga. Pang three points lang." pagmamayabang niya. Nakatanggap ulit siya ng kantyaw galing sa'min. Conceited much?

"Huwag ka nga! Yabang mo!" sinupalpal ni Kelly ang mukha ni Archer. "Si Azriel nagpanalo sa inyo!"

"Eh ako naman ang nagpasa ng bola sa kanya. So kasali rin ako sa nagpanalo sa'min." he retorted.

"Touché." ngiwi ni Kelly.

Tumawid kami sa daan at pumasok sa JY Square mall na katapat lang ng Coliseum. Napagkasunduan naming magpalamig muna sa loob bago kami bumalik sa school para sa awarding. Isasabay na rin namin ang pag kain ng late lunch.

"Ba't huli na kayo dumating?" tanong ni Archer habang nakasakay kami sa escalator. Umupo siya sa hagdanan.

"Nanood pa kami ng dance contest! Sumayaw kaya sina Amber at Carlo." ani ni Lian.

"May video kami! Ang galing nila." deklara ni Noemi. Tinapik niya si Kelly at pinakuha nito ang cellphone na ginamit sa pag-video kanina.

"Patingin."

Naghanap muna kami ng upuan sa foodcourt. Maraming tao, karamihan ay inokupahan ng mga estudyanteng nanood ng game sa coliseum. Pumwesto kami sa harap ng nagbebenta ng barbecue at ibang sari't saring pagkain, malapit sa stall ng Waffletime. Pinanood muna nila ang video bago nag order ng pagkain.

"Ang galing mo pala Amber." komento ni Brennan. "sayang wala si Kent, di niya 'to napanood."

Katapat namin ang mga boys maliban kay Azriel na katabi ko. Silang tatlo ang nanood ng video. Malakas ang volume ng phone kaya rinig ko ang mga hiyawan mula rito.

"Saan pala siya?" tanong ni Carlo habang nagta-type sa cellphone.

"Extension duty sa Sotto." sagot ni Terrell.

Tumayo na sina Kelly upang mamili ng pagkain. Tumingin sila sa'kin, naghihintay na sumunod ako sa kanila.

Nilingon ako ni Azriel. Presko na ang mukha niya galing sa pagkakapawis kanina. "Anong kakainin mo?"

"Magdi-dinner naman tayo sa bahay. Tinext ko na si mama."

"Hindi ka nag-lunch, so you have to eat something." aniya.

Tinanaw ko ang tinda ng mga pagkain sa likod niya. Kumalam ang tiyan ko sa mga nakahilerang ulam. Tiyan na mismo ang nagkumbinse sa'king kailangan ko ngang kumain. Malayo pa naman ang dinner.

"Tara." Isang beses akong tumango hudyat upang dumulas siya paalis sa upuan upang makaalis ako.

"Diyan kayo?" turo ni Lian sa napili naming pagbilhan. Sunod niyang tinuro ang may nakadisplay na umuusok na sisig. "Doon kami."