ببيت جد كادي ..
دفت يده ب عنف عنها ..
محمد متأزم : كااادي ..
غطت كل نفسها ولاردت عليه ..
محمد بعد الغطا : قلببي خلاص ..
ماردت عليه وظلت ترجع الغطا عليها ..يأس منها وطلع بهدوء تام مثلما دخل لاجل مايحسون جدانه فيه ..
دفنت وجهها أكثر ب المخدة وهي تبكي بقهر ..كرهت محمد ب لحظه وهي تضرب السرير وهي تبدأ تبكي ب شكل أكبر :ي ررربي ي الله ..
.
.
.
شقة سطام * الجوري ..
توه كان داخل من الاستراحة ..شافها تصلي ..ناظر ساعته بغرابة وتالي ناظر شاشه جواله لقى الساعة 1 على آخرها ..
فصخ الشوزات ووالشراب ورمى نفسه على السرير وهو فارد يدينه على السرير ومغمض عيونه ..
آنتظر لفترة وكانت بعدها تصلي , جلس وشوي وخلصت ..
سطام يناظرها بتعجب : أي صلاة ؟
الجوري تستغفر وتحرك بس شفايفها ..خلصت : الوتر ..
لوى شفايفه :ماشاء الله ..
نزلت جلالها وسحب كفها وهو يجلسها جنبه : بكرة بدوام مع أبوي..
ابتسمت : جاهزز ؟
ابتسم وهو يحط كفها بوسط يدينه : شوي , جوجو ودي آنااام..
ابتسمت : طيب شوي خل تبدل ملابسك ..
فصخ القميص : لا بنام كذا ..
ضحكت : طيب بدل البنطلون ..
ميت نوم : لا لا .. بخخمد ..
نام على الغطا ..
الجوري : لا , سطام تحرك شوي ..
تعدل شوي وغطته ..
ناظرها وهي تخفف نور الابجورة ..بصوت نايم : جوجو أحببك..
ابتسمت : وأنا بعد أحبك ..
دخلت للغطا وتغطت زين وهي حاسة بتغير سطام ناحيتها وتدعي بسرها ي عساه دوم كذا ..
.
.
.
اليوم الثاني ..
العصر ..
ببيت أبو رتيل ..
ناظر عساف وآستغرب جيته كثير ..
عساف يفرك يدينه ببعضها : أنا جايك طالبك ومعاي اللي يدسم هالعطا ..
ناظره أبو رتيل بعدم فهم ..
عساف : أنا من امس والجو مهوب جوي .. كيف ياعم تزوج رتيل ل شخص مثل طارق ..
أبو رتيل : نصيبها جا وزوجتها ..
عساف : لكن طارق مهوب من ثوبكم ..
أبو رتيل: تزوجت البنت , لكن شاللي لك ب السالفة ؟
عساف: ياعمي ماسألت عنه ..
أبو رتيل خبر اللي يبيه من حكيه: عساف شاللي بغيته .. كنت تبغاها ؟
عساف ناظره : آيييه ..
أبو رتيل: بزوجك أختها ونسبك يشرف..
ابتسم بتوتر : الله يشرف مقدراك ..بس أنا ي عم مالي خاطر الا ب رتيل..
أبو رتيل: البنت راحت بنصيبها ..
عساف : طلقها منه ..
ناظره بقوة : لو منت غالي ماكان مررتها لك ..
عساف : ي عم , لك شيك مفتوح من المليون إلين العشرة مليون ..
انصدم أبو رتيل: للدرجة ذي ؟!!
عساف : أبغاها لو كلفني هالشي عمري .. ياعمي وش راح تقول للناس لامن سألوك من نسيبك ؟!
سكت شوي وتكلم : تراه من كبار العوايل ..
عساف يزيد : ترى السالفة فيها أجيال ياعمي ,ويعلم الله أني شاري قربكم وأبيها ولك أنها تطلع من العده والليلة اللي بعدها عرسنا , ومهرها مثل ماقلت لك شيك مفتوح , ولك أسكنها ب أرقى القصور وأكتبه ب أسمها ولك آحط تحت الخدم والحشم واسفرها لكل بلدان العالم ولك احط بحسابها ضعف مهرها من غير عرسها بسويه ب المكان اللي تختاره ..
أبو رتيل يناظره بذهول ..
عساف يزيد أكثر وبصدق وجنون فيها : وبكتب لها اللي تبيه من أملاكي وتختار آسمنها وأغلاها ..شرأيك ياعمي ؟!
أبو رتيل مذهول من اللي يسمعه : أنت صادق ؟
عساف : ولك أني آمهد لك الصفقات ب السوق ..
آبتسم : وليه ماطلبتها من قبل ؟
عساف : ماعلينا من اللي قبل , أنا أبغاها وشاريها ياعم ..
أبو رتيل: لكن رجلها يقولي مشاري ب أنه يبيها وهي تبغاه ومرتاحة معاه ..
عساف: بنسيها آياه ..
أبو رتيل : تبغاها ؟
عساف بتصميم : أبييها واشتري قربها ب الغالي والنفيس ..
أبو رتيل فكر ب لحظات ب كل شي ممكن يتحقق له ويزيد الثروة والجاه والمال ..: وكيف نطلقها ؟
عساف : الشرع يعطيك مافيه تناسب اجتماعي , (بحذر شديد) لكن لاتدري الا لما تجي للرياض لو درت ماجات ياعم ..
أبو رتيل يفكر ..
عساف يوقف وهو يزين شماغه : آنتظر الاخبار الزينة ..وصدقني ياعم لو تطلق رتيل منه ل تجي الهدية اللي تجمد على الشارب..
ابتسم أبو رتيل وطلع مع عساف لاجل يوصله للباب ..
صك الباب ودخل ل داخل ..
أم رتيل كانت طالعة ..
أبو رتيل: اجلسي بغيتك ب سالفة ..
أم رتيل: فيه جمعة عند أختي ..
أبو رتيل : اقعدي ي مره ..
شافت اهتمامه ب الكلام وجلست :شفيه ؟ الله يستر ذكرتني بسالفة رتيل ..!
أبو رتيل: السالفة تخص رتيل ..
خافت عليها : فيها شي ؟
أبو رتيل: لا , بس بنتك تقدم لها عساف ..
ضحكت بطنازة ..
أبو رتيل: تراني صادق وقدم لمهرها شيك مفتوح من المليون للعشرة من غير مميزات ثانية ..
عقدت حاجبها : الظاهر ناسي بإن رتيل متزوجة ..
أبو رتيل وقف : بطلقها من رجلها ..
أم رتيل وقفت : الظاهر صاير شي بمخك , موب كفاية زوجتها من غير علمي ومن غير عرس لولا الولد قال راح يجون للرياض ويسوون عرس ..
أبو رتيل بتعصيب : آسمعيني الحين لا أحد يشم خبر وبندبر جية رتيل للسعودية ولاتحس وبطلقها منه بالاجبار ..
أم رتيل : منت بصاحي خاف ربك ..
أبو رتيل: أبغى مصلحتها , بنتك راح يجيها ضعف المهر بحسابها من غير القصر والعرس وأنتي أكيد تبين العيشة الزينة ل بنتك ..
أنت تقرأ
بصدري وجع كنت احسبه نام يا صدري
Romanceالكاتبه : وحيدة و اهلي كثيرين الرواية راح تحكي عن نفسها بس أبطالنا تربطهم علاقات من إسمى العلاقات الانسانية وهي الصداقة وإن لم يكونون معاً بالأجساد ولكن الاهم بأن القلوب تكون على اتصال دائم , تحس بنبضها الاخر بألمه ووجعه وضحكاته وآدق تفاصيل حياته ..
