بصدري وجع كنت احسبه نام يا صدري

31

بيت سلطانه ..
دهشه من شوفة دمعته ..لحظات والصمت بينهم سيد الموقف ..
امتد كفها برعشه وخوف ومسحتها : ممكن تناظرني ..
وقف وهو يثني شماغه ولاتكلم ..وقفت ومسكت يده : مصعب ..
وهو مايناظرها ووقف وبتأنيب : يكفي ..وجدي على قلبي يبغى اللي مايبغاه ..!
ياوجدي على قلبي .. بحزنه وكثر بكــاه
على واحد ن يذكره دايم .. وهو ناسيه
غريب البنادم في طبوعه وفي ممشاه
يقفي عن المقفل / ويقبل على مقفيه
يجي واحد ن يعطيه قلبه ... ولا يبغاه
وتلقاه معطي قلبه لــ شخص مايبغيه
بنفس الرعشه وكفها يمتد وهي تلف وجهه لها : ناظرني ..
جات عينه بعينها وانكسرت عينها بسرعه وهو يناظرها بعيونه الناعسه : سلطانة أنا آنسان أحبك من وأنتي بالابتدائي ولما ملكتك صار عندي مناعه عن أي ضيقه .. صرت استحي اطلب الله عز وجل عقب هالنعمه اللي من علي فيها ..صرت بكل سجده احمد الله على جمعتنا ..
حكيه مؤثر جداً بالنسبه لها ..
احتقرت تصرفها بحقه كثير .. فكرت للحظات آنسان يحبها هالحب وتعامله كذا ..!
مسكت يدينه وبلعت ريقها وهي ترفع يدينه وتبوسها وتهمس له : لاتستغرب مني هالصد والبعد والجفا , مصعب ثمان سنين عشت كأني بغابه منقطعه عن أغلب البشر وخاصة أنتم ي الرجال لاني عانيت كثير من أبوي و عمي وزوج أمي وكملها سعود..!
يناظرها وهي تبرر وتقوله عن بعض جروحها والعبره بصوتها واضحه وتردعها ماتنزل .. ضاق من حزنها وإلمها وحبها أكثر ..
وهي تدنق وتالي استجمعت آنفاسها وكلمت وكفوفها ماسكه يدينه : تخيل معي كم لحظه انضربت من آمي لاجل زوجها ..!
كم مره انشد شعري وانصفقت من أبوي لاجل كذب زوجته وتبليها علي ..!
وكم لحظه ضربني عمي وتوني صغيره ماعديت 16 سنه ..!
وكم لحظه تهزأت من الاغلبيه لاجل ستايلي وأسلوبي بالحكي ..!
وكم لحظه انضربت بالكهرباء لاجل التعب اللي دخلت فيه عقب سالفة سعود ..!
تخيل معي تكون منبوذ من أهلك وقرايبك ..
فيه آقسى من كذا ..!
جابها لصدره وضمها وعذرها بقلبه قبل لسانه ينطقها ..ارتاح خاطره وهي تحوطه بيدينها وهو يحسس بتسلل دموعها على ثوبه ومعها دموعه حس بكبر همها واللي عانت منه ..
جات تبعد عنه بعد فتره ضمها أكثر وتالي ناظر بوجهها ومسح دموعها :إن الله احياني ومد لي بالعمر لانسيك كل جرح منهم ..
ارتاح قلبها له وهي تسأله : تنسيني .. آآآه يامصعب ماظنتي آنسى جروحهم إلين أتوسد يمناي ..
آدمنته جروحها من أقرابها وهو يبوس راسها : ماعاش راسي إن مابدلت هالدموع وهالضيقه بأفراح ..وضحكه ماتفارق شفاتك ..
بيأس مميت : ماظنتي .. تقدر ترجع ميت ضمن الاحياء ؟
يناظرها : عسى ربي يخليك لي .. ياسلطانه بدلي نظرتك السودا للحياة ..
: فترة كبيرة من عمري شربت وتشبعت بهالشي وصار مني وفيني ..
: راح نبدل كل شي سيئ بعكسه ..
ضحكت بحزن وبعدت عنه :مشكله اللي يبني آمل على سراب ..!
ابتسم بآلم على يأسها وحزنها وقال وهو يتحداها : سمعت بأنك عنيده ..
ناظرته ..
: واضح العناد لو ماقلتي لي من تعقيده هالحواجب ..
حاولت تفك تعقيده حواجبها وابتسم لان هالشي طبع فيها ..
ابتسمت وهي تبعد شعرها وتربطه ..
قرب لها وهو يفك شعرها : لاعاد تطيحين قلبي ..
لحظات وضحكت له وهي تتكي على الجدار :اسألك ؟
وهو طاير بالغمام من ضحكها وتغير مودها للاحلى بلحظات قليله : لبيه ..
:ممم ليه بكيت ؟
نزل عيونه شوي ورفعها لعيونها مباشرة : تخيلي معي شخص يحب وبفكر من طفولته معشوقته ويأخذها عقب سبع سنين من المحاولات ويملكها بالعقد وأول جلسه لهم رايقه تقوله يطلقها ..!
أي قلب للعاشق ذا لو مابكى ..!
حالتني قبل شي مثل اللي يملأ يده ما ويفرح بجمعته له ويكتشف عقب وقت بأنه مامسك منه شي ..!
حـالي مع وصلك مثل قآبض المي
لآ صار في وسطه ملآ اليد منه
ولا شالهآ لقى انه ماهو قابضن شي
ما غــير دمع في كفوفـه يكـنـه
وهي تناظره :ماستاهلك ..
: لييه ؟
سلطانه وهي تناظره أكثر : لاستايل مثل البنات (دنقت وضحكت بخسرية ) على فكرة ذا كلامهم دائما لي ..
رفع ذقنها : تدرين واللي خلق مصعب ماشفت فيك من اللي يقولون شي الا جمالاً يوسفي وأخلاق ينحكى فيها وحشمه يقتدى فيها .. سوس لو بنت غيرك مرت بظروفك كان حالها مأساوي من كل شي .. لايهمونك المهم أنتي بعيونك وعيون مصعب والبقيه آذر التراب بعيونهم ولايهمونك ..
وهي تناظره وتسأله :ليه تحبني ؟
ضحك : وليه ماحبك ؟!
:لاترد على سؤالي بسؤال ..
وهو يضحك : هذا جوابي ..
:ممم يمكن آهلك مايتقبلوني ..
:اهلي همهم سعادتي وعلى فكرة أمي وعمتي يحبونك على محبتي ..وأكثر من مره قالوها لي ..
:وخواتك ؟
: مرت أخوهم غلاتها من غلاه ..
سكتت ..
باس راسها : تبين عرس أو لا ؟
: عادي ..
ابتسم : يعني نأخذ رأيي ..
ماعلقت وابتسمت ..
فرحته مايعادلها فرحة ويقولون مافيه آجمل ولا آلذ من دموع الفرح وعبر عنها مصعب وهو يدخل بنوبه بكا غريبه ومفأجاه تركته يجلس الكنبه ويغطي وجهه بشماغه..
ذهلها بكاه ..!
جلست على رجولها قباله وهي تبعد يدينه المجدره على وجهه : مصصعب ..