My Crush Is A Fujoushi

Chapter (1)

Unicode

**********

''Cupid က ပစ်လိုက်တဲ့ အချစ်မြားက တစ်ခါတစ်လေ လက်ချော်သွားပြီး ရောက်ချင်တဲ့နေရာကို ရောက်သွားတတ်လို့ ချစ်ချင်တဲ့ လူကို ချစ်မိသွားတတ်တယ်''
****************************************************************************************

ရှေ့ကနေ ခပ်မြန်မြန်လျှောက်နေရင်း ရုတ်တရတ် တုံ့ခနဲရပ်လိုက်တဲ့ စုံစုံ ကြောင့် ဖုန်းပွတ်ရင်းလမ်းလျှောက်လာတဲ့ ယမုံတစ်ယောက် စုံစုံ့နောက်ကျောနှင့် တိုက်မိသွားသဖြင့် မျက်နှာကို ရှုံ့မဲ့လိုက်မိသည်။

''ရပ်မယ်ဆိုရင်လည်း နည်းနည်းလေးတော့ ကြိုပြောပါလားဟယ်.. ''

ယမုံက တိုက်မိလိုက်သဖြင့် နာသွားသော နှဖူးပြင်ကို လက်ဖြင့်ပွတ်နေရင်း ပြောနေသော်လည်း စုံစုံ ကတော့ ယမုံ့စကားကိုအာရုံမရောက်ဘဲ လမ်းမကြီးရဲ့ တစ်ဖက် ကိုသာ မျက်လုံးအကြည့်တို့က နေရာယူထားလျက်..။

ပြီးတော့ စုံစုံတစ်ယောက် မျက်လုံးပေါက်ထွက်မတတ်ကြည့်နေရင်းပင် မျက်နှာက မှိုရသလို ပြုံးဖြီးဖြီးစပ်ဖြဲဖြဲလေး ဖြစ်လာတာ။

''ဟီဟီး .... ဒီမနက်ခင်းကတော့ အချစ်တွေနဲ့ သာယာသွားပြန်ပြီ.. မနက်စောစောစီးစီး ချစ်စရာ အတွဲလေးတစ်တွဲနဲ့ တွေ့လိုက်ရတာ ''

လက်နှစ်ဖက်ကို ဆွဲခြင်းတောင်းကို ကိုင်ထားရင်းကနေ ရင်ဘတ်နားထိကို ယှက်လိုက်ကာ ပြောနေလေတော့သည်။

စုံစုံပြောတဲ့ အတွဲဆိုတာ ဘာအတွဲကိုပြောတာမှန်း ဝါသနာတူ သူငယ်ချင်းပီပီ သိလိုက်ပြီ။ စုံစုံဆိုသည်မှာ အတွဲအမျိုးအစားအများကြီးရှိသည့်ကြားမှ တစ်မျိုးတည်းကိုသာ ကွက်ပြီး စိတ်ဝင်စားတတ်သည်လေ။

ယမုံကလည်း မိန်းကလေးပီပီ စပ်စုလိုသဖြင့် စုံစုံ့အကြည့်တွေရှိရာဘက်ကို မျက်လုံးကို ဦးတည်လိုက်မိတော့ မိမိတို့ တက္ကသိုလ် ဂိတ်ပေါက်ဝကို ကြည့်ရင်းပြောနေတာကိုတွေ့လိုက်ရလေသည်။

ကျောင်းတက်ချိန်ဖြစ်တဲ့အတွက်ကြောင့် ကျောင်းဂိတ်ဝမှာ ကျောင်းသားကျောင်းသူတွေ ပျားပန်းခတ်မျှ သွားလာနေကြလေသည်။ ထို့အပြင် ကျောင်းဂိတ်အပြင်ဘက်တွင်လည်း ကျောင်းသားများ ကျောင်းသားကဒ် ပါမပါ ဆံပင်ဆိုးထားတဲ့ ကျောင်းသားတွေပါမပါ စစ်ဆေးနေသော ဒုပါချုပ်နှင့် ဌာနမှူး ဆရာဆရာမများ ရှိနေသည်ကိုပါ တွေ့လိုက်ရတော့တာ။