My Crush Is A Fujoushi

Chapter (36)

Unicode

*********

ညဆယ့်တစ်နာရီကျော်။

စုံစုံ စာကြည့်စားပွဲတွင်ထိုင်ကာ Laptop ဖြင့် ရုပ်ရှင်ကြည့်နေသည်။

စိတ်အာရုံထွေပြားနေသော အချိန်မှာ 2 Moons တို့ Sotus တို့လို စောင်ကိုက်စရာ BL လေးတွေကို စမြုံ့ပြန်ကြည့်ရင်း အာရုံစူးစိုက်ဖို့ ကြိုးစားနေရတာ။ သို့သော် ဘယ်လိုပင် အာရုံစူးစိုက်ဖို့ ကြိုးစားပါသော်ငြား ညနေပိုင်းက အစ်ကိုဖြစ်သူ ပြောသွားသော အကြောင်းကိစ္စကိုသာ ခေါင်းထဲ တစ်ဝဲလည်လည်ရောက်လာသည်။

လွန်းက မိမိနှင့် ရှင်းခန့်မောင် ချစ်သူတွေ ဖြစ်မှ ကိုကြီး နေဦးထွဋ်ကို စဉ်းစားမည်တဲ့လား။ လွန်းက တမင်လုပ်တယ်ဆိုတာသိသော်လည်း စုံစုံ ပြန်စဉ်းစားကြည့်တော့မှ တုန်လှုပ်မိတာတော့အမှန်ပင်။ ဘာမှမဆိုင်သော ကိုကြီးနေဦးထွဋ် ကြားထဲက အလကားခံစားရမည်ကို မလိုလားပါ။

စုံစုံ ဂရုမစိုက်သလို ပြောခဲ့သော်ငြား အခုသေချာ ပြန်စဉ်းစားကြည့်တော့မှ စုံစုံ စိုးရိမ်လာမိသည်။

ရှင်းခန့်မောင်နှင့် လွန်းရတုဟာ ညီအစ်ကိုထက် မပိုပါဆိုသော အချိန်တွင် နေဦးထွဋ်နှင့် လွန်းရတုဟာ စုံစုံ့ရဲ့ ဦးစားပေး OTP ဖြစ်လာခဲ့ပြီ။ ရှင်းလွန်းဆိုသော အလွန်တရာလိုက်ဖက်သည့် OTP လေးဟာ အမှန်မဟုတ်ဘူးဆိုတာ သိလိုက်ရတုန်းက စုံစုံ တော်တော်ခံစားလိုက်ရတာ။ အခု နေဦးထွဋ်နှင့် လွန်းရတုတို့ ဟာ စုံစုံ့ ပယောဂကြောင့် တစ်စုံတစ်ခု မှားယွင်းသွားခဲ့မည်ဆိုလျှင်။

စုံစုံထိုသို့တွေးလိုက်ရင်းမှာပင် ကြက်သီးတွေထလာပြီး ရုပ်ရှင်ပင် ဆက်မကြည့်နိုင်တော့ဘဲ ခေါင်းကို ခါရမ်းလိုက်မိသည်။ အခုလက်ရှိ ကွန်ပျူတာ Screen ပေါ်တွင် မြင်နေရသော 2 Moons The Series မှ P'Pha နှင့် Wayo တို့ မိုးရေထဲတွင် မျက်နှာချင်းဆိုင်ရပ်နေသော အခန်းတွင် နေဦးထွဋ်နှင့် လွန်းရတုကို မြင်ယောင်လာသည်။ အရမ်းကို လိုက်ဖက်မည့် ချစ်သူစုံတွဲဖြစ်လာမည်မှာ အမှန်။ ဒီလိုမျိုး OTP လေးကို ပျက်ဆီးသွားခဲ့မည်ဆိုလျှင် ကာယကံရှင်နှစ်ယောက်အပြင် စုံစုံပါ ခံစားရမည်။