كسرة كلب

البارت4

#كسرة_كلب
البارت4
بقلمي روسكان
لبيج قصص روسكان
ثاني يوم نفس الروتين بالدوام وسولفت لضمياء عن كولشي صار وكولشي حجيته ويه همام واتوكلت ع الله بسالفتي لان حيل خايفه منه وشبه مقتنعه هذا مو زواج عادي هاي كسرة هشم ورد الصاع صاعين اليه يعني ثار 5سنين مضت ولقائي بابن عمي اليوم هو الي يحدد هذا الشي الخايفه منه اني .
همام..خلي اعرفكم بنفسي اني همام عمري 27سنه من 5سنين دخلت كليه عسكريه بعد ماصار بيه موقف هز كياني وغيرلي حياتي خطبت بنت عمي وهي جانت زعطوطه يمكن ميتجاوز عمرهه 15سنه رادو اهلي الم روحي واستقر ويخلوني ابطل سوالف مكسره واتعلم اتحمل مسؤوليه ومجان احسن من بنت عمي الي تستحملني بس بوقتهه من خطبتهه هي رفضتني وموبس هيج لسه اتذكر تخوصرت ووكفتلي وكالت عليه مهتلف وصايع ودلوع الماما وماعندي مسؤوليه بوكتهه كان كلامهه صحيح بس ماتقبلتهه من #زعطوطه مامخلصه ثالث متوسط بنفس الوقت حسيت ع نفسي اني عمري 22سنه رجال مو صغير يعني وجان لازم اكون كد المسؤوليه اهلي الي كبرووا ورادوني اكون نفسي واكون عائله واذا بنت عمي مارضت بيه الغريبه ترضه المهم قررت اسوي حل جذري لنفسي قررت اتغير وقدمت ع كليه عسكريه بعد ماقدمت سادس خارجي ونجحت ولان العسكريه تربي وتقسي عظم الولد وتسويه رجال وتبني الشخصيه القويه المهيوبه ومضت السنوات وتخرجت واول ماتخرجت شدولي نجمه يعني ملازم صرت وصار عندي راتب حاولت ابتعد عن التبذير ومكسراتي القديمه واشتريت قطعه ارض قريبه ع اهلي وراهم بشارعين وبنيتهه ع كيفي والوالد ساعدني اشتري سياره والحمدلله كونت نفسي  وجنت ايام نزولي من دوامي اعاون الوالد بمعمل الالمنيوم اوقات ومرت 5سنوات واني عيني من ذيج الزعطوطه بنت عمي الصلفه ام لسان طويل كل اجازه وكل نزول اراقبهه طبتهه وطلعتهه وحته من صارت طالبه كليه ماغابت عن عيني صح لبسهه فري وسافره وتسوق سيارة وعايشه بس هي وامهه بس تربيتهه متعوب عليهه ثكيله ومن صارت حنين مرحله ثانيه كليه تمرضت والدتهه بالمرض الخبيث وراحت لدار حقهه وفتحت ويه اهلي موضوع الزواج من بنت عمي وماجذب عليكم واكول انو خطه زواجي منهه جانت بس لان غيرتي شالتني عليهه لان مبقالهه احد وجانت تبات ببيت اهلهه وحيدهه وماقبلت تستقر ببيت اهلي رغم الحاح اهلي عليهه لذلك قررت اتزوجهه وهم هي اجت والله جابهه يمي ذاك موقفهه ما انساه ابد وجنت مخطط اذلهه واعذبهه واكسرلهه خشمهه ويمكن حقدي يوصل انو حته اتزوج عليهه يعني ذاك الخشم اليابس والعرامه ردت اكسرهه بس مافكرت بضرب لان اني عسكري وعندي اساليبي بالتحقيق والبرود والعذاب النفسي جنت كولش حاقد عليهه وحقدي عاميني..
اهلي راحوو خطبوهه بس موافقت راسا طلبت وقت تفكر بي وطلبت تلتقي بيه لان عدهه شروط..
المهم هي من جهه ذكيه عرفتهه حست من ناحيتي بشي غلط بالموضوع واتوقع جانت متخوفه من سالفه رفضهه السابق اليه قبل 5سنين واللقاء جان جس نبض اليه يمكن راح تعتمد ع حدسهه وياي من تشوفني وردات فعلي ع شروطهه وطريقه تعاملي وياهه واني قررت العب دور ابن العم العاشق علمود تفكر انو موقف قبل 5سنين خلاني اتمسك بيهه اكثر واكون نفسي علمودمن ارجع اخطبهه اكون جدير بيهه..
بنفس الوقت شروطهه كانت راس مال اليه علمود اعرف شنو نقاط ضعفهه ويبدي العقاب والحرب النفسيه الي مقرر اضوكلهياه.