كسرة كلب

البارت 33:صدمه

البارت 33 :
بعد شهر..
مر شهر واجنه علاقتنه حلوة ودتتحسن صح اعصاب وصياح ومشاكل واحس داعاشر شخص ثاني جديد بطبع وشخصيه جديدة ماعرفه من قبل ودا اتعلم عليه شويه شويه .
احس همام فقد الامل برجوع ذاكرته وبدة يتاقلم للوضعيه لحياته وعائلته ..ميكولي احبج ابد بس اشوف احساس الحب بعيونه وبتصرفاته وخوفه عليه وغيرته الزايده يحاسبني بقسوة ع الشعرايه اذا طلعت من حجابي وشغله وسهراته مابطلهه ولابطل شرب بس قللهه وماكام يجيب اصدقائه للبيت بس بعده يشرب ومن يشرب اكلب وجهي عليه او ماصير كدامه اروح ابات بغير غرفه وثاني امشي الشغله طبيعي وهو يبالغ بدلالي مثل الي يعرف نفسه مسوي شي غلط ويدللني علمود يداري ع غلطه واني اغض نظرعنهه لان حسب مايكول هو صاحب كيف ميشرب للسكر والثماله يشرب بس للونسه وتغيير المزاج.
صار فترة ميتقربلي طول النهار شقه وضحك وحته من نتعارك منطول زعل ويصالحني حلو بس من يجي الليل غير نومه الحضن ماكو شي وبده يزعجني هذا الموضوع وظليت افكر ليش ميتقربلي فكرت يمكن بسبب اخر مرة من صديته ورفضته يمكن حز بنفسه رفضي اله وكام بعد ميتقربلي اذيت رجولته هيج فسرتهه مافكرت بغير شي وقررت انسه المستحه والاحراج واني اتقربله .
فد يوم من الايام خليت ريمه عد بيت جدهه تبات يم اجدادهه وقررت افاجئ همام بليله حلوة خابرته كال يتعشه برة كلت خوش تعشيت شي خفيف وجهزت نفسي ع السريع سبحت ومكياج ولبس اختاريت اللون الي يحبه بنفسجي والمكياج سموكي ع بنفسجي طوخ وكعدت انتظرة ..ها وكتله لاتتاخر عليه هذا الحجي ساعه 9:00 بالليل فتحت التلفزيون اكلب بي بملل والمبايل كذلك ماكو شي جذبني او يلهيني ضجت وتاخر عليه همام ..
لل10:30 ياله اجه ..سمعت باب المطبخ انفتح عرفته اجه  ابتسمت فرضت وجهي ماكو داعي للضوجه بعدين نتحاسب عود ع التاخير وماريد تصير مشكله لان لاريد اعكرله مزاجه ولا مزاجي ..
رحت ع ميز التواليت عدلت نفسي ع المرايه نزعت الروب ورشيت عطر جددته ..فتح عليه باب الغرفه ..
اول مافتحهه شافني واكفه ع المرايه التفتتله ابتسم بادلته الابتسامه..
مساؤؤ.
يسعد مساك حبيبي.
شو البيت هدوء وريومه مو بغرفتهه ؟
ريوم وديتهه لبيت جدهه تبات يمهم اليوم .
شفته ابتسم .
اليوم بس اني وياك ..
وغمزتله ..وللصبح..
شفته ضحك وبلش يفتح دكم قميصه ..
تقربت اريد اني افتحهن اله.
بديت افتحهن وهو لازم ايديه من معاصمي وعين عليه وعين ع الدكم افتحهن ومن تلتقي عيونه نبتسم.
شناويه عليه اليوم؟
ابتسامتي تلاشت تدريجيا عبالك احد كفخني ع وجهي ..اعرف نبرة صوته من يشرب شلون يصير هو يظل واعي ميسكر بس الحجايه تطلع من حلكه بخدر يمط بيهه بس واعي لكولشي يصير حته المشاعر الي يحس بيهه كان يكون غضب او عصبيه اثارة او رومانسيه وكل ردة فعل تجاه اي شعور يصير مبالغ  بي يعني مثلا اذا يتعصب وهو شارب يصير مجنون عصبي نااار ويصير كلامه سجاجين تجرح ماكو شي اسمه عيب كل حجايه تجي ع لسانه يكولهه حتلو فشار ..
اني اطيت مقدمات عن الحاله الي يصير بيهه همام من يشرب لذلك جنت يوم الي يشرب اختفي من كدامه وماتواجه وياه بس مرات تصدف نتشامر بالكلام وبعد ماتحمل اظل ساكته فالاسنه وارد عليه واطلع من الغرفه راسا انام يم بنتي.
الي صارمن تقربت ع همام وحجه كلماته قريب مني شميت ريحه الشرب ماعرف شصار بيه احس شياطين صارت كدامي اعرف اني مو كده من يعصب بس ماكدرت الزم نفسي واعصابي من الحاله العصبيه الي جنت بيهه يعني خابرته من الساعه ثمانيه ونص انتظرة ومتحضرتله وهو شهر ممتقربلي وفوك كل هذا يجيني شارب ..ماتحملت طلعت من طوري وياه
حاجيته..
هاي شنو همام..
شنو ..؟
شارب؟؟
شفته صفن بوجهي وجاوبني ببرود او حاول يتصنع البرود .
شويه بس ماثكلت.
ليش ؟
شنو ليش ؟عادي يعني كعدة ويه جماعتي ودنتونس .
ومتتونس الا لمن تشرب ؟
اي تدرين انتي اني اشرب بس علمود المزاج وهيج.
همام مو خابرتك اني من وقت ؟ موكتلك لتتاخرعندي مفاجاة الك ؟
اي وعفتهم واجيت.
اجيتني شارب.
الف مرة كتلج اني صاحب كيف ارتاح من اشرب .
شنو المامرتاح منه ؟ اني.. بنتك .. تقصيري ..مسؤولياتك؟ شنو همومك احجيلي يمكن اشيل عنك
الحمل واساعدك ليش تشرب لييييييش؟
طبعا اني اعصاب وبس اصيح وصوتي عالي وهو يحجي بهدوء بس احسه شويه شويه ديغلي لان صوتي عالي عليه..
ماعندي هموم..ماعندي شي اشتكي منه.
لعد ليش تشرب ..غير افتهم شنو العله البيك ..الف مرة تعاركت وياك علمود تبطل ليش هيج دتسوي بيه جاوبني!!
ومراح ابطل ..ارتاحي ويله وطلعي من الغرفه اريد انام صدعتي راسي ..
ماطلع ماخليك ترتاح اذا متطيني وعد تبطل شرب.
لاامشي بكيفج ولا بمزاجج وشرب مراح ابطل مو همام الي مرة تمشي كلامهه عليه.
همام !!ماصيرلك مرة بعد اذا خلبت قطرة شرب بحلكك .
ولاتصيرين ..يطبج مرض..والله زين ..جايه تهددني بس هي هاي البقت عليه.
تعوذ من الشيطان همام مدا اداهرك اني وروح بابا اخذ بنتي واطلع بعد
تكمله البارت 33 :
اخذ بنتي واطلع ومتشوف وجهي بحياتك بعد.
انتي تعوذي من الشيطان وروحي من وجهي هسه لا اشوفج همام ثاني عمرج مشايفته.
شسوي يعني ؟تضربني؟ترة تعودت وبعد ميهمني الموضوع ..
لزمني من زندي بقوة..
انتي والله شايفه نفسج ونافختهه مدري عليمن ترة اني مو لسواد عيونج رجعت بس علمود الفلوس والاملاك واخذتهن رجعتهن باسمي مشوفيني شامرج صارلي شهر ممتقربلج ..انتي مجرد وسيله فرغت حاجتي بيج وخلص شمرتج ..عبالج جبتولي ورقة وتحليل وكلتوا هاهيه اني ابنكم همام وخلص لاعيني لا همام ولا بطيخ ..ورقتكم بلوهه وشربوا ميهه ..اجتني زوجه وبلاش واملاك وبيت وسيارة ووظيفه وباسمي مخبل اكول لا طبعا اجاريكم باللعبه مالتكم.
كل هذا الكلام واني صافنه مصدومة ومامصدكه..
عافني وطلع من الغرفه كعدت بالكاع الدموع متطلع من عيوني الصدمه مدا اكدر اتحملهه ..صدمه ..صدمه..ماعندي كلمه اقوى اكولهه .
وللحكايه بقيه..