كسرة كلب

البارت الاخيررر

البارت 37 :
الاخييييير ..
ظلينه ثنيناتنه ناكل بهدوء وعيونه ع ريمه نراقبهه بعدين تحولت عيوني لا اراديا تراقب وجه حنين وملامحهه..
سالتهه بهدوء..
شلون خطرلج تجين لهنا ؟
ابعد مكان عنك اكدر اوصله.
ليش شردتي؟
اختنكت ..ردت مكان مابي انت.
شفت عيونهه انترست دموع ماحجيت شي بعد ماردت احرجهه اكثر ..حاولت ماترمش لان الدمعه بالكوة معلكه بطارف الرموش بس ترمش توكع ..اويلي يابه لعد شكد اذيتهه..
باجر من الصبح نرجع..
كلتهه بثقه وشفتهه باعده عيونهه عني وهزت براسهه بمعنى اي مستسلمه ..شفت الدمعه طفرت من عينهه مسحتهه بسرعه ..
كومي غسلي وجهج.
مردت كلبي دموعهه .
من كامت باوعتلي بعيوني نظرة جديه وكالتلي ..
ارجع وياك بس مارجع لبيتك..بس ليكون عندك علم.
شفتهه مو مال اناقشهه هنا وهسه وهي بهيج وضعيه هسه تنهار بجي بنص العالم ..جاوبتهه همس ..
ماشي براحتج..
وعافتني وراحت للحمامات تغسل وجهه.
تعبتني هالبنيه اعرف بنفسب احبهه دا كابر ودا اعاملهه بحقارة وماكو طريقه نكسه مااذيتهه بيهه ..ليش هيج ياربي..
ومن بعدهه شفتهه راحت لريمه ..كملت اكب وكمت غسلت وميت من النعاس من البارحه منايم وفد مرة تعبان من الطريق..
رجعوا يمي ..
بابا لاح الوح للزوو (بابا راح اروح للزوو).
شنو؟
وجهت كلامي لحنين شنو وين رايحين ؟
للزوو ..يعني حديقه حيوانات.
هاا يله لعد نروح.
هيييي هييييي!!
وكامت تكمز ريمه.
لاح الوح اشوف القلد (القرد يعني )..
حنين ..وانت هم تجي ؟؟
اي ليش لا شو مستغربه .
عبالي تعبان من الطريق.
واني ميت نعاس مو بس تعب بس ماحجيت ..ريمه تريد تتونس واحنه باجر راجعين..
ميخالف يله نروح للزوو ع كولة ريوم.
لزمت ايدهه لريوم وامهه لازمه ايدهه الثانيه ..
فد اربع ساعات بالزوو ماخلينه حيوان ماشفناه اهم شي القرد ريمه تموت ع القرد وفد ساعتين بمدينه الالعاب وكل راس ساعه شاميه لو جرك لو نمنمات شكل وعصاير هم تونسنه وهم انتخمنه اكل وراهه صارت ب 8بالليل ..دخلتهم مطعم وكعدنه نتعشه وريمه تباوع للالعاب ..الحلو بيهم اكثر المطاعم والمولات بيهه العاب اطفال حتى يلتهون باللعب والاهل يفترون بالمول او ياكلون ع راحتهم .
ريوم بابا حبيبي اليوم كافي لعب ..
اليد اليد مااا مااا.
حبيبتي لاء.نتعشه ونرجع كافي تعبنه اليوم ولعبنه هواي .
حنين ..اذا تعبان اني اخذهه وانت ارجع للفندق.
لاماكدر اعوفكم وحدكم.
المطعم قريب ع الفندق عادي يعني ناخذلنه ساعه ونرجع.
لا موبس هيج ..لغيت حجز الغرفتين بالفندق.
شفتهه استغربت قطبت حاجبهه..
لعد وين نبات اليوم ؟
حجزت سويت النه.
منو احنه؟
رفعت حاجب من سؤالهه..
انتي وريمه واني منو يعني .
ليش ؟؟
كل عقلج اخليج تنامين وحدج انتي وريمه.
ضحكت عليه ما مامن بيه ويخاف خاف ارجع اشرد من ينام..
جان قفلت علينه الباب واخذت المفتاح ورحت لغرفتك.
لاااء سويت احسن كبال عيني.
باوعتلي صفح وصدت وجهه عني.
راحت ريوم تلعب ورا ما تعشينه اخذتلهه ربع ساعه وكمت كلت يله كافي..
ورجعنه للفندق اخذنه مفتاح السويت ولكينه غراضنه بي كلفت موظف ينقلهن للسويت..
طبيت بوجهي للحمام ..المي دافي يفك العظام فك ويريح.
السويت جان بي غرفه نوم بيهه سرير نفرين وغرفه ثانيه بيهه سرير نفر واحدوتلفزيون وثلاجه وصحيات ..اني اخذت الغرفه البيهه سرير ابو نفر وريمه وحنين اخذن الغرفه الثانيه.
من طلعت من الحمام لكيت ريمه نايمه وحنين فاتحه فيس رحت لغرفتي تمددت ووقتت مبايلي ع الساعه 6الصبح ورحت بسابع نومه.
ساعه ب 3 بالليل حسيت عطشان والثلاجه يمي كمت فتحتهه وشربت مي وصار عندي فضول اشوفىحنين نايمه لو كاعده ..
تقربت منهه نايمه ببراءه.. تذكرت من جانت تنام بالهول لو بغرفه ريمه واني اشيلهه واوديهه بفراشي احضنهه وانام حتلو مزاعلين وحتلة منتحاجه نتحاضن وننام حضنهه اماني وجنتي ..صارلي 10ايام ماشفت طعم النوم اتكلب بفراشي لان هي مو يمي ولابحضني ..
تقربت خليت ايد جوة ركباتهه وايدي الثانيه جوة ظهرهه وشلتهه تعلكت اديهه بركبتي مثل قبل لا اراديا ابتسمت ودفنت راسي بركبتهه اووووف ياعطرهه ياخذ الروح ويردهه ..ماحست عليه اخذذتهه لفراشي..
حنين ..حسيت بي بس مافتحت عيوني ..هو ..اعرف انفاسه ..دفو شفايفه ع ركبتي ..لمسه شواربه ..خشونه ايديه..10ايام شايفه الويل جارعه المر بغيابه عني اريده واريد قربه بس اذاني هواااي ..
اووووف ياكرامتي ..اووف ياكسرة كلبي..
حسيت بي حطني بفراشه وحضني وصار وجهي كبال وجهه وبعد مترهم اتظاهر بالنوم جفوني تتحرك تفضحني وارتبك من قربه..
دفن راسه بركبتي وحسيته شهك يشمني ويتنفس انفاسي ..فتحت عيوني ولان وجهه بوجهي حس بحركه عيوني من فتحتهن وراسا رفع راسه ..
شدتسوي ..؟
جاوبني بتوسل وعيونه ذبلانه..
احبج ..
دمعت عيوني وبقت عيوني بعيونه ..قربه دمرني ..كل خليه بجسمي تصيح اريده وكلبي المكسور منه يصيح اريده دكاتي تقرة الف بالثانيه اعرف بنفسي تخربط كياني ..العيون ظلت تتعاتب
تكمله بارت 37 :
وتحجي كلام لسانه فاشل يعبر عنه كتله ..طلكني ..
جاوبني..
اموووت عليج.
جرحتني مرات متنعد.
اني اسف ..طيني فرصه.
طيتك هواي ..ماظلت كرامه.
بين اليحبون ماكو شي اسمه كرامه..
منو كالك احبك ..؟
عيونج وانتي نفسج كوولج ..نايمه بحضني وانتي زعلانه مني وتريدين تتطلكين..
تنهدت كولشي بيه فاضحني..
ماطلكج..
اخلعك..
ابتسم ..كالي ..كويه والله..
اطلبج لبيت الطاعه.
وشنو هذا ؟
يعني اوفرلج بيت وارجعج اليه غصبن ماعليج.
وليش هيج تسوي ؟
احبج ومافرط بيج بعد.
لعد ليش فرطت قبل ؟
غبي ومتنعاد بعد ..وشرب ابطل وعيونج وضرب تنكسر ايدي اذا تنمد عليج بعد..شنو بعد رايده تامريني امرر.
شنو الغيرك هيج ؟املاك ورجعتهن باسمك ..اني وشبعت بيه غصب وبرضاتي وشمرتني من بعد ماخلصت حاجتك مني.
اني احجي وهو يسد باذاناته ويغمض عيونه بقوة ويعض شفته واني استمريت بالكلام تالي حط ايده ع حلكي سكتني.
كافي كافي كافي الله يخليج اسكتي .
وخرت ايده ..
ليش اسكت هذا كلامك .
جنت شارب والله ومو واعي لكلامي..
تدري شحسيت وكتهه؟
تنهد وسكت واني كملت ..
حسيت اني بنت شارع رخيصه ....
اششش اسكتي لخاطر الله كاااافي .
اني غبي اني طايح حظه وحقير ..
كملت عليه..
ونذل وناقص..
اشش ولج مو اخذج الواهس .
ابتسمت ..
يمه ضحكت غزالتي..
زادت ابتسامتي..
والله احبج ..سامحيني وطيني فرصه .
خلي نرجع ونشوف.
ماكو نرجع ونشوف ..من نرجع ترجعين لبيتي لحضني.
واذا رجعت حليمه لعادتهه القديمه ؟
خلعيني بدووون نقاش .
ضحكت ع سوالفه ..
بس مو تخلعيني وتشردين ..
ها ليش ؟
موتيني من الخوف عليج عبالي خطفوج.
هههههه وشعدهم وياي ويخطفوني اسم الله.
مادري والله هيج فكرت لان شو الخطف بهاي العائله صاير موده .
احجي عن نفسك عيني.
اي اني انخطفت وانتي شردتي.
ههههه عائله فريده .
اذا ارجع عندي شرط.
شنو هو؟
يتنفذ ارجع ميتنفذ ماكو رجعه .
شكله صعب شرطج هذا .
كول تم علمود اكولك الشرط .
غير اعرف شرطج .
لازم متريدني ارجع.
لاعيني اريد اريد يله تم بس كولي .
كول بداعه ريمه تم.
عمي بداعه ريمه تم.
مترجع لوظيفتك القديمه.
صفن بوجهي ..
انت حلفت بعد .
بس الامر الوزاري مالتي اجه .
حتلو اطلع تقاعد.
تخافين عليه ؟
مارديت ..
اذا ماجاوبتي ما اطلع تقاعد..
يعني قبلت بشرطي.
لسه ماقررت انتظر جوابج.
اي اي اي اخااف عليك وامووووت عليك .
يا يااابه .
شهك وحضنته حيييل ..احبك ..اموت عليك.
اجازتي اسبوعين خلي نبقه هنا شهر عسل ومنرجع باجر ؟
والله ؟متاكده ؟خاف تكلبين عليه ؟
لا اكلب شنو طيتك حجايه زلم .
ههههههه يعني انتي زلمه ؟
زلمه بدونك وانثى وياك .
يايمه فدوة لحلكج ينكط عسسسل ..
حضني حييييل ..
اوووي اووووي ..
ولج لاتكولين اووي تشتعل عشيرتي .
هههههههه وليش تشتعل واني موجوده.
هاا يعني اكو شي ؟
اكووو اشيااااء .
امي داعيتلي .
بس ها مو مال واحد متوحش .
امممممم طلبج صعب .
شالني ونومني فوكاه ..
يله اني راح اكعد عاقل وشوفيني شسوين ..
ماسوي شي ..
خزرني بالشقا .. سوي !!
بست شفايفه وخدوده وعيونه وكصته وحنكه بمكان الرصعه ..
اخر انذار الك واخر فرصه ..من بعدهه تحلم تشوف وجهي ..
كلتهه بتهديد وبجديه .
احبج.
حنين ..من بعد كل هالمعاناة عشت احلا ايامي ويه همام ..بعده فاقد الذاكرة  اكو فلاش باك ورحنه لطبيب باربيل كال اكو امل ترجع الذاكرة بمرور الوقت واتصلت ع عمي فرحته برجعتي لهمام حسيته فرح واطمئن واتمنالي السعاده والتوفيق ووصاني بالصبر لان الحياة الزوجيه متخلو من المشاكل ..اهم شي وجود شخص يحبك ويتمسك بيك.والباقي كوله يهون ..صدوك ماكو كرامه بين اليحبون .
خلصنه اسعد اسبوعين باربيل عوضنه شهرالعسل الي انحرمنه منه بزواجنه ومن رجعت لبغداد صارت عندي اعراض حمل رحت حللت طلعت صدوك حامل شهرين ونص ههههههه يعني من اول مرة ويه همام اول مارجعلي ..وهمام طااار من الفرح ربي يتمم علينه هالفرحه ويديمهه.. بعد شكم شهر صار عندي ولد سميناه كرار والفرحه صارت فرحتين لان بده همام يتذكر اشياء عن حياته وماضيه ورجوع ذاكرته صارت مساله وقت ..
يمكن القصه بيهه عبرة ويمكن مابيهه بس الاهم ماعندي دافع غير امتاعكم ..اكتب لغرض المتعه واتمنه تكونوا ضحكتوا بجيتوا عشتوا تفاعلتوا ويه احداث وتفاصيل القصه ..
دمتم في رعايه الله ..تحياتي روسكان .

انتهى 2/10/2017
الاثنين 12:16ظهراا