كسرة كلب

البارت 20: يافرحه ماتمت

البارت 20:
حنين ..راقبته وهو ديبدل ..ماكشخ بس لبس تراكسود رصاصي وبي خطوط ع الجانب اسود وتعطر واخذ السويج وصحت وراه..
حبيبي ..
عيونه..
رجعلي مثل المشتاق واني بعد لحكت اشتاقله بهالثواني الي دار وجهه بيهن عني ..
شراح تجيب اكل؟
اكو شي ببالج؟
بيتزا.
اوك بيتزا لاحلا حنونه.
وببسي حباب ..
خاف مو زين عليج حبي.
بنفسي والله وكون مجرش.

وج مجرش شنو بارده الدنيا ..
حباب..باوعتله بتوسل ..وبرطمت مثل الجهال..
تدللين ..بخاطرج شي بعد؟
سلامتك.
تقرب عليه باس شفتي جريتله شفته بخباثه اذيته ..كالي..اني اعلمج من ارجع ..وباسني من راسي وطلع..
مودع بالله..
مادريت هاي اخر مره احجي وياه..ولا دريت هاي اخر بوسه اتبادلهه وياه..وما وفالي بوعده من كالي اني اعلمج من ارجع ..مارجعلي ..كتله الله وياك ..كتله مودع بالله ..شكبر اسمك ربس ودعته عندك ..حبيبي مارجعلي..
الي صار ..من لحظه الي طلع بيهه همام من البيت كمزت اتحضرتله لبس ومكياج وسوالف دلع علكتهه يادوخه ياحمل يابطيخ ..همام اخذ كلبي وصار نور عيوني الي اشوف بيهن وكعدت انتظرة ساعه و2و3ساعات.
مابطلت اتصال بي ع مبايله جان يدوك الى ان يفصل وماكو رد ..خفت وبالي صار بي حسبات وكامت الافكار الموزينه تحي وتروح بدماغي  هو طالع من ساعه 6ونص وهسه ب10 اتصلت ع عمي ابو همام وخبرته هيج وهيج السالفه  راسا الرجال اجاني للبيت طلعتله استغربت سيارة همام واكفه بباب البيت ..السويج بيهه بالداخل والمبايل هم دكيت ع صدري ياربي دخيلك بسلا الي ببالي..عمي الظاهر فكر نفس تفكيري وراسا اتصل ع الشرطه ..ساعه او اقل وهمه يعاينون السيارة ع اساس مكان الحادث واقرب واقوة استنتاج هو همام انخطف من باب البيت اني تخربطت مادري بالدنيا شصار بيهه صرت زركه واشهك الهوة اريد هوة اختنكت رشوو عليه مي وكعدت بالكاع اسمع الضابط مال التحقيق شيحجي. .يكول مبينه احد منتظرة يطلع من بيته وينفذ ومنطقتهم هادئه وليل  ..تخبلت تهسترت ماعرف شسوي اجتي واجتي ضمياء وامهه وانكلب بيتي كلاب ..كل شويه اركض للشارع اريد اكلع ادور عليه ويرجعوني ..املخ بروحي بشعري ..اريده رجلي اريده رجعولياه ..جنت متحضرتله المكياج الطوخ والكحل والايلاينر كوله من البجي والدك ع وجهي كوله ساح صار شكلي يخوف عبالك فزاعه مال زرع ..همام شمعه حياتي راح  واخذ روحي وياه كسر كلبي مرة ثانيه  ..جنت انوح مو بجي لا ابد وبامي من ماتت ماسويت هيج ماعرف ليش كل المده الي عرفت بيهه همام شهر وبس..
الشرطه اخذت تلفونه وتسجيل مكالمات ورسائل كولشي محذوف طلعوه وكالو اخر ايام قبل خطفه اكو جهه جانت تهدده لان هو ضابط بجهاز مكافحه الارهاب هذا العرفته عن شغله هو مجان كايلي شنو يشتغل بالضبط يمكن لخطورة مكانه والتحقيقات ويه ارهابيين خلته عرضه للتهديدوفعلا اتهدد وانخطف جنت بس اعرف هو ملازم وهاهيه ميحجيلي شي عن شغله.
مرن يومين والي خطفوو اتصلوا ع جهازي وطلبوا فديه 8دفاتر ..
بعت ذهبي وسيارتي وسيارة همام اهله هم باعوا وكملنه المبلغ خلال يومين وخابرونه اتفقوا ويانه ع مكان تسليم المبلغ بدون تدخل الشرطه بس كولشي جنه نسويه وكل تصرف نتصرفه بعلم وبتخطيط الشرطه عدهم خبراء يعلمونه شنحجي وشلون نتصرف وسلمنه المبلغ وماكو همام..
يوم يومين3 اسبوع وهمام ماكو ..دورنه بالمستشفيات والطب العدلي ومراكز الشرطه والسجون مالكينه لا اثر ولاجثه ولا اي خيط يودينه لطريق همام وكف عقلنه لاهو الراجع ومكحلين عيونه بشوفته ولا احنه اللاكين جثته ودافنينه ونعرف مصيره بالقبر ونزورة وكت نشتاقله..
وصلت بيه الحاله كمت احسد الناس الي يموتون احبابهم وعدهم جثه يدفنوهه حته من يشتاقون لاحبابهم يروحون لقبرهم يزوروهم ويبجون ويحجون وياهم ويعاتبوهم  ع الفراك .
اني المن اعاتب ووين اروح من اشتاق الوضع وكف عقولنه مثل واحد معلك لاهو للسما ولا هو للكاع واحنه بالعراق وماظل امل عدنه نلكاه عايش بس هم مالكيناله جثه.
عمي ابو همام وعمتي شكل وياهم ضغط واني شكل وياي انخفاض بالسكر والضغط الواطئ كمت ماتوازن  من ادوخ بسرعه اوكع لازم 24ساعه نساتل وشي حلو علمود يبقه سكري بالمعدل الطبيعي .
ضعفت كولش واربعه اشهر اني حامل ومادري بنفسي وحته من دريت الخبر لا بي فرحه ولا بفد شي حلو يفرحني بس حسيت عمتي فرحت لان الطفل صار عندي من ريحه الغالي وعمي اصر اكمل دراستي ذيج السنه علمود التهي لان التفكير والقلق كام ياكل بيه اكل واني حامل كالي الدراسه شويه تشغلني بلكي اهتم بصحتي وبالطفل وسويت مثل ماراد ماضيعت السنه ع نفسي ورسبت دور اول ب6 مواد من اصل 9 بس اجه قرار حته الراسب يمتحن وحته يكدر يحملهن اذا مانجح بيهن كولهن والحمدلله شديت حيلي بالدور الثاني ونجحت ب4مواد وحملت 2 وبشلاع الكلب صرت مرحله ثالثه.
همام مانسيناه بس الحياه مشت بينه وتقرب موعد ولادتي وولدت طفله سميتهه ريم لان اجتي عيونهه كبار وحلوات ..ريم همام..
للحكايه بقيه..