كسرة كلب

البارت 26

اسفه ع التاخير تعبانه وكذا وعفيه لاتستعجلوني القصه طويله اذا بالكم مو طويل خلي تكمل القصه واقروهه كامله
..متابعه ممتعه.

البارت 26:
حنين..ثاني يوم الصبح طلعت من غرفه ريمه رحت لغرفتي جان هو نايم ماحس عليه لبست روب جان الجو بارد ورحت غسلت وبديت احضر ريوك وجانت الساعه تقريبا ب8:30..جهزته وكعدت اتريك وحدي بهدوء واني اصلا جنت ماخذه اجازة اسبوع من الحضانه وجنت مقرره اني ماداوم بس ريمه ادزهه ويه الخط للحضانه بس شو اليوم تكاسلت يوميه اكعد ب 6:30 حته بدون منبه ..يمكن تعبانه من ركض عزيمه البارحه حسيت اكو صوت خاف ريمه كعدت بس طلع هذا همام ديغسل ..اجاني للمطبخ بوجهه ابتسامه ناعسه ..سلم ..
صباح الخير ..
وتقرب عليه باس راسي ..
رديت عليه..
صباح النور ..
وكعد كبالي يتريك ..
صبيلي جاي ..
اي ثواني ..تفضل..
تسلمين ..
بداخلي مستغربه من تصرفاته يعاملني ولا كانه صاير شي البارحه ..
راح يخبلني هذا الرجال..كلما ارفع راسي الكاه يباوع عليه ..
البارحه ان شاء الله نمتي مرتاحه ؟..
اي الحمدلله ..وانت ؟
لا الحمدلله خوش نومه نمت مرتي شارده مني يم بنتهه ..
ابتسمت ع كلامه ..
المفروض انت متعود تنام وحدك..
اي صح بس مو طلعت متزوج فبعد مترهم النومه العزابيه..
رفعتله حواجبي ..
كلت بكلبي شلون صلافه ابد ميستحي ..
هو ضحك بطرف شفته مثل الي قاصد بكلامه ديستفزني..
ماهتميت كمت ع شغلي تنظيف وترتيب ولملت سفرة الريوك وهو احسه وراي وراي يتفرج عليه وعينه مني.
شعجب ريمه لسه ماكعدت ؟
تتاخر بالنوم كسوله.
هاا ..دكعديهه خطيه خلي تتريك وبعدين ترجع تنام..
لا..تتنحس وتظل تبجي اذا كعدتهه وهي مشبعانه نوم ..وبعدين عوفهه خليني اخلص شغلي ماطولهه نايمه.

اني ادير بالي عليهه وانتي كملي شغلج.
صفنت بوجهه ليش ديلح..
شبيج مضيعه شي بوجهي؟
مابيه شي.
صدوك شعجب اليوم ممداومه؟
اخذت اجازة اسبوع.
هاا شعجب؟
مو..علمود انت تتاقلم وتتعود هنا يمنه.
ها هيجي ..مشكورين يابه دنتعبج ويانه.
تعبك راحه.
كملت شغل جوة بقتلي بس الطارمه اغسلهه لان الاسبوع الفات كوله جان مطر الدنيا والطيانه ومليوصه لوص كلت اغسلهه علمود ابلش طبخ الغده وطلعت وهم طلع ورايه ..ذبيت الروب وكفيت رداناتي وردانات البجامه مال التراكسود همين حته ماتباا وهم هو وراي وراي يلحكني وين ماروح وبديت اغسل الطارمه والجو جان باااارد.
همام ..مثل ماكالت غزالتي اني وراهه وراهه ..اراقبهه حركاتهه تصرفاتهه ضحكتهه..غزااله بعد..شافتني صافن رشت عليه المي فزيت ..
عليمن صافن؟
ع غزالتي.
لاجديات .
جديات صافن ع غزالتي.
ابتسمت بخخجل.
بللتيني ولج.
لاتصفن بعد.
شفتهه ترجف من البرد..الشفه زركهةوترجف ،الخشم احمررر..نزعت قمصلتي وتقربت منهه.
شفتهه ارتبكت من تقربت يمهه ورادت تغطي ع هذا الارتباك وحسيتهه هم تريد تبللني لان صونده المي جانت بعدهه بيدهه.
لالا بداعه ريمه لاتبلليني.
ذبت الصونده من ايدهه من وصلتلهه وصرت كبالهه..
همست ..منو جابرج تغسلين الطارمه والجو هيج بارد ؟
واثناء ماجنت احاجيهه لفيت القمصله مالتي ع ظهرهه ولزمت ايديهه ثنينهن بايديه ادفيهن بحراره اديناتي وانفخ عليهن ..جاوبتني..
لعد شسوي الطارمه وصخه.
اي كوليلي واني اسويهه.
جانت طول للوكت عيونهه بعيوني السحر الي بعيونهه اسرني عبالك طفله ودتحتمي بحضني اول مرة احس بهيج احساس حلو تمنيته يستمر لو ما البرد واشوف شفايفهه زركه ..
كتلهه فوتي جوة واني اكمل .
بس..
بدون بس فوتي كعدي ريمه وريكيهه كافي كسل.
عبالك منومه مغناطيسيا ودتحاجيني وتسمع كلامي .
حبيت عنادهه وطاعتهه اليه.. طبت واني كملت غسل الطارمه.
حنين فتت للبيت علكت الصوبه رغم مابكل غرفه اكوسبلت تدفئه مفتوح بس حسيت روحي ارجف من البرد اوووف وقمصله همام ع ظهري فدوة لريحته.
كعدت ريمه وغسلتلهه وبديت اريكهه واحنه كاعدين بالمطبخ فاتحه الهيتر ودفيانين فات همام..
ولكم يابه موووت برد ..بالعظام البرد يكص كص..
ابتسمت الله يساعدك.
ماباوعلي راسا انتبه للكمر اليمي ريمه ..
يايابه حبيبه بابا كعدت.
وهي السخيفه حارت شسوت وهو ماصدك اجاهه شالهه وتبوس وشبكات للبابا .وكعد هو يوكلهه ..اني اكثر شي احبه علاقه همام ببنته .
استغليتهه فرصه اني وكمت بديت اطبح الغده واسترق نظرات عليهم وهمه شقه وضحك تكول عبالك صاحبته مو بنته سوالف وضحك وبوسات ..فدوة..
شويه ظليت اتفرج عليهم ماغار بس اتمنه العلاقه الي تجمع همام وبنته تصير بيني وبين همام بهاي البساطه وبهاي هاي السهوله وبهذا القرب بس ماعرف احس اكو حاجز بيني وبين همام وخايفه مني .
راقبتهم شويه بعدين كمت ع شغلي دا اكمل طبخ للغده وظليت يمكن ساعتين بالمطبخ ..خلصت ولزمت مبايلي اتصفح فيس اجه كعد يمي ظليت ملتهيه بالفون حسيته يباوعلي ويهز برجله يمكن متوتر ويمكن معاجبه تصرفي وياه مثل عبالك متجاهلته بس اني ابدا مو قصدي اتجاهله واضايقه بالعكس مخليته راحته يتعود ع وضعيه بيته وحياته اما بالنسبه اليه فاحس روحي شارده حته من نظراته اليه ماعرف ليش .
بشنو مشغوله؟
هيج ..اتفرج فديوات تضحك.
_
_
_

تكمله بارت 26 :
اهم مني؟
من شفته هيج حجه تركت المبايل..
لاء مو اهم منك وهاي سديناه تدلل.
التفتت عليه.
مو انت جنت ملتهي تلعب ويه ريمه.
اي صح.
وينهه هسه؟
دتلعب بالميكانو.
ضحكت ..فدوة حبيبتي ولاتمل من لعبه الكراج والسيارات .
سكتنه وعيونه بعيون بعض..شعور غريب ..دفو مفاجئ ..حراره صعدتلي ..بارده بس حسيت عركت من الخجل ماكدرت ابقه اباوع بعيونه نزلت عيوني وهم ماكدر امنع ضحكتي او اضمهه عنه رغم عني ابتسمت ..
اخذ ايدي وباسهه هالتصرف فاجاني ورفعت عيني بعينه..
حاجاني بهمس..
بعدج تستحين مني ومامتعوده عليه ؟
هزيت راسي بمعنى اي وايدي بعدهه بين راحة ايديه الدافيه ..
وشلون تتعودين عليه ونوخر هذاالخجل منج اذا انتي مو يمي مكابله المطبخ وكاعده ،حته الاجازه اخذتيهه علمودي علساس..
اخذت ايدي من بين ايديه ع كيفي وهمست ..
ان شاء الله اعوضك ..
وكمت من يمه..بس كمت نفس الايد الي جريتهه منه سحبني منهه ووكعت بحضنه ..عيني بعينه وهو ماكر وواثق من نفسه ومن تاثيرة عليه ويباوعلي نظرة ذيب ماكرة..
علميني شلون راح تعوضيني.؟
ظليت صافنه بوجهه.
يله حركي روحج شويه شكد بارده وجامده..
مو بارده..
لعد يله شوفيني شلون تعوضيني.
بده يتقرب مني عرفته راح يبوسني رخيت نفسي وحسيته هو هم رخه ورخت قوة ايديه عليه استغليتهه فرصه وانهزمت منه كمت وركضت وكتله اعوضك بالشرده وضحكت ..هو ضاج ابد ماضحك..
اهوو هاي شلون وياهه اليوم منخلص.
رحت لريمه بالهول ولحكني همام ..فات من يمي وحجاهه همس..
عبالج تشردين مني هيج ..وراج وراج وعندي الليل شطوله غزالتي..
حجاهه بمكر وشدد ع اخر كلمه ..خزرته وسالته..
جوعان اصب غده؟
ماعرف مو كولش ..يوميه شوكت تتغدون؟
بكيف ريمه شوكت متجوع اني اصب غده بس ع اكثر ورة اذان الظهر.
هاا خوش هسه اذن لو بعده؟
ب12:30اذن ع اكثر ..راح اصلي واصب يله روح صلي.
ماشي.