كسرة كلب

البارت 27

البارت 27 :
صلينه وتغدينه ولملمت ونومت ريمه الظهريه ..جنت كاعده ع القنفه اتفرج تلفزيون ومبايلي بيدي ..طلع همام من الغرفه عبالك جان ينتظرني وايس من جيتي وطلعلي للهول ..كعد يمي لزك ع القنفه ظل يباوعلي واني سويت نفسي منتبهه ع الفلم واني حرام ولاطكه بي بالي مو يمه ابد ..
همام..غريزة المحقق الي بداخلي صحت فجاه مسويه نفسهه منتبهه ع الفلم وهي بالكوة تاخذ نفس وتبلع ريك وكل شويه تتنهد ..حاجيتهه بهمس ..
روحج الج ..
فزت ..هاا
اسم الله شبيج ماكلت شي.
لعد شبيك.
مابيه انتي شبيج؟
متباوعلي عود منتبهه ع الفلم بس كوة تبلع ريكهه وتبلعم واشوف النفس يصعد وينزل من يم ريكهه وهنا بالضبط بين عظمتين الترقوة اكو شامه مو واضحه بس تبين من تتقرب هنا نفسهه يصعد وينزل وتشوف صدرة والشامه يعلى ويهبط ويه النفس ..دمرتني ..دمرني تاثيري عليهه ارتباكهه وخوفهه رغم ماهي مزوجه ..دمرتني هي..
تنهدت بتعب نفسي مو جسدي..
متنامين؟
منعسانه.
اني همين..شنو هذا الفلم حلو؟
اي اتفرج خوش فلم.
سالتهه بخبث ..شنو قصته؟
راسا باوعتلي بنظرة خزرتني عود لتلعب هاي اللعبه وياي..
اني ضحكت ..
اذا ممتابعه الفلم ونعسانه ليش ماجيتي للغرفه ؟
ماريد.
ليش؟ شارده مني؟
باوعتلي بحقد..
هي كوة يعني؟
لاعيوني مو كوة ..بس ارجع واكول شلون تتعودين عليه اذا انتي 24ساعه شارده مني.
سكتت ماجاوبتني.
طفيت التلفزيون وكتلهه
اريد اسولف وياج.
عن شنو؟
هيج اكو اسئله ببالي .
اوك اسمعك اسال.
التفتت عليه وصرت كباله وبعدنه كاعدين ع القنفه وصارت الكعده مثل كرسي الاعتراف وشعور ممتع ومتحمسه اجاوب عبالي راح يسالني عن اهله واحداث ..
بس صدمني من اول سؤال..
تزوجنه عن حب؟
سكتت باوعت بعيونه ثواني رفعلي حواجبه عو ها جاوبي.
اممممم لا..
لعد شلون وافقتي؟
انت ابن عمي وبابا متوفي من زمام وامي توفت وعمو ابوك عرض عليه اجي يمكم اعيش لان ظليت وحدي ومجان يرهم ابقه وحدي عايشه بالبيت..
اهاا فوافقتي.
مو راسا بعد شروط..كعدت وياك واتفقت عليهن.
مثل شنو الشروط؟
دراستي جنت طالبه كليه مرحله ثانيه وشرطت عليك تخليني اكمل دراسه ..
هاا وبعد شنو من شروط حطيتيلي؟
جنت متخوفه منك.
ليش ..؟
خطبتني قبل ورفضتك.
رفعلي تك حاجب ..
تقدمتلج ورفضتيني ؟
اي جنت صغيرة والدنيا زاهيتلي وبابا وماما ع راسي .
لعد شلون تقدمتلج مرة لخ؟
ماعرف يمكن عمو جبرك.
اذيتج؟
شتريد من هاي الاسئله ؟
بلكي اتذكر شي متريدين تساعديني؟
اي طبعا اريدك تتذكرواريد اساعدك بس احس هذا كم معلومات هواي عليك يمكن عقلك ميكدر يسوعب ..
داراجع طبيب وهو نصحني هيج اسوي بس كالي شويه شويه علمود استوعب وبلكي الكلام يذكرني بموقف او حادثه وابدي اتذكر.
اي شوف كالك الطبيب شويه شويه .
دا ارتب قصه داخل دماغي والاحداث دا اخذهه منج انتي دتسولفيلي وماريد شي ثاني ..هسه جاوبيني اذيتج؟؟
بس بالبدايه ..بعدين صرتلي اب وام واخ وصديق وحبيب ..
حس همام بنبرة حزن بصوتي..
والله وطلعت خوش رجال اني ..
ضحكت لان حسيته حس ع نبرة الحزن بصوتي وحب يغيرلي نفسيتي فضحكني ..
بعدهه الحنيه بي..
شكد استمر زواجنه واختفيت؟
انخطفت ماختفيت ..شهر استمر.
شفته ملامح وجهه انصدم  وعرفت ليش فابتسمت..
شهر بس ؟؟
اي والله ..سوده عليه عريس وخطفوك الميخافون من الله ..وهاي مرت 3سنين ياله رجعتلي..
وانتي ابد ما ارتبطتي ولاتطلكتي مني بغيابي ؟
مافكرت ..جان عندي امل اشوفك مرة ثانيه جنت حاسه انك عايش  الامل قوة هي ساعدتني اصبر وانتظرك العمر كوله مو بس 3سنين.
3سنين وماكطعتي الامل؟
مالكينه جثه الك.
تحبيني ؟
شتشوف انت؟؟
صفن بعيوني ..تنهد وذب زفير..
منعستي؟
بلي نعست ..
امشي نكوم لغرفتنه..
اخذ ايدي وكومني ومثل المنومه مغناطيسيا رحت وراه دخلنه الغرفه طب بالفراش ونمت يمع ماحسيت بغرابه بالموقف لان هو جان فاصل ماعرف بشنو يفكر ماتقربلي ولاتباوعلي اصلا مثل الي عنده حسبه براسه اتصور ديفكر بكل كلمه كلتهه اله وكل حدث ..
دعيت ربي يساعده علمود يتذكر ودقايقروغفيت بعد مادري شصار.
كعدت ع ريمه تنده بيه طلعت كاعده وفايته لغرفتنه وتريد تكعدني باوعت ساعه 5:30 دنيا مغرب كعدت ع حيلي لكيت همام يفرك بعيونه نامت ريمه بيناتنه وككعدت تتحارش بابوهه وتكعد بي الى ان كعد ..
صح النوم..
ابتسملي وكمت غسلت ورجعتلهم بعدهم يلعبون والله هالريمه ماخذه عقله لابوهه.
رحت تفرجت شويه تلفزيون وصليت وسويت عشه وكالعاده ريمه وكالعاده ريمه ابوهه يوكلهه خلصنه ولملمت السفرة وهمام هو الي غسل المواعين فاجاني بهالتصرف وحبيته منه رحت بدلت لريمه لان لوخت ملابسهه وغسلتلهه وجنه كاعدين ثنيناتنه وريمه دتلعب يمنه..فتح موضوع فجاه..
لعد اذا ظلينه شهر مزوجين وانخطفت شوكت صارت ريمه؟
امممممم راسا من اول مرة يمكن ..
خجلت وهو ضحك..
هههههههه طلعتي لاقطه.
سرحت بعيد بهذاك اليوم سولفتله بصفنه ..الي يشوفني يكول دا باوع لعيون همام
بس اني جنت اباوع للفراغ الكدامي سارحه وعبالك انعاد يوم خطف همام كدامي ..بيومهه كتلك شاكه انو اني حامل وكتلي نروح ونحلل كتلك خليهه ع باجر وطلعت تجيب عشه والطلعه ماجانت بيهه رجعه .
وبعد مارجعت.
اييييي .
لحد ماشفتيني كدام الحضانه بيوم الوكعتي واخذتج للمستشفى.
اي.
وشلون عرفتوني مخطوف ؟
الشرطه والتحقيقات وجنت ضابط بجهاز مكافحه الارهاب الك اسمك ومنصبك وسمعتك سابقتك وكل هذا الحجي مندري بي احنه والشرطه اخذت اذن من القاضي وطلعنه اتصالات ومحادثات مبايلك وعرفنه..
يومين وطلبوا فديه ..
شكد؟
8 دفاتر..
اخ يااابه ومنين جبتوهن ؟
بعت ذهبي وسيارتي ..
شفته رفع حاجب ..كملت
وسيارتك وعمو هم قاطعني..
عندي سياره؟
اي كمارو حمرة.
ياياابه كمارو ..
اي والله وطينه 8دفاتر وانت ماكو ..
عندي املاك؟
اتوقع ..هذا البيت الك والسيارة عمي عوضهه فلوس وحطهه باسم ريمه بالبنك وبعد يمكن محلات عندك مشغل بيهه عمال يجيبولك وارد شهري.
بس من بعد ماصار الي صار كولشي تحول لريمه لان ورث وطلعتلك شهاده وفاة اسم الله عليك واني صرت الوصيه عليهه لان قاصر فكواشي صار باسمي لحد ماتبلغ السن القانوني.
شفته فتح حلكه وعيونه ..
والله هو عمي اصر نسوي هيج كال ماضامن عمري وهذا ضمان اليه ولريمه خاف يصير فد يوم قدر حته منتبهذل.
هم زين ذكرتني ماطول هذا الاسبوع مجازه نروح اني وياك نسقط شهادة الوفاة .
اي ويصير ترجع الاملاك باسمي ؟
تفاجات من سؤاله ..بس كلت بداخلي هذا حقه..
اي اكيد يصير بس المعامله طويله.
عادي قابل شكو وراي ..حته اتفرغ منهه وارجع لدوامي.
ناوي ترجع؟
لعد وين اروح ..اظل كاعد بالبيت مثل النسوان .
لاموهيج قصدي يعني ..انت شجنت تشتغل بالفترة الراحت؟
تكسي ومرات يجيني شغل اطلع اصبغ بيوت.
لو تلزم محلاتك مو احسلك مماترجع للوظيفه العسكريه .
رد عليه بنتر..لا مو احسن .
براحتك خفت اناقشه .
راح اروح انوم ريمه ..شكلهه نعست ..
عوفيهه اني انومهه .
اخذ ريمه شالهه وفات لغرفتهه ينومهه واني انطرحت ع القنفه اريح جسمي واتفرج تلفزيون شودقايق وبعد ماحسيت ع روحي  ..غفيت ..
همام..رحت نيمت ريمه تعلقت بهالطفله ومطيرة عقلي وهي هم متعلقه بيه وصايرة ماتنام الا اسولفلهه قصه ..وتاخرت ياله نامت خلصنه 3قصص ورجعت للهول عبالي اسولف ويه حنين شويه لكيت طفلتي الثانيه هم نايمه ..
للحكايه بقيه
تكولون البارتات ممله ومدا نستفتد شي من الاحداث يعني هي قصه عن اشخاص ديمارسون حياتهم اليوميه يعني اكيد اكو شي روتيني بايامهم دا انقله الكم وهي بعد قصه يعني الي تشوفو ممل هو سرد متسلسل للاحداث وارجع واكول الي ميكدر يطول بال خلي تخلص القصه ويقراهه كولهه تحياتي..