كسرة كلب

البارت 11

#كسرة_كلب
البارت 11
بقلمي روسكان
لبيج قصص روسكان
كومي ولج جوعان سويلي عشه..
حاجيتهه بنتر..
حنين..استغربت من النبرة مالته وكلامه هستوني جنت نايمه بحضنه..
ولج؟
شنو ماعاجبتج الولج؟
لاحبيبي بس..
قاطعني..حبيبي؟؟
وضحك باستهزاء لان كتله حبيبي..
خاف صدكتي نفسج تزوجتيني..
بس ..بس احنه صدوك تزوجنه شدتحجي انت؟
تتذكرين المهتلف دلوع الماما؟
دموعي نزلت لا اراديا وهو باوع لدموعي وهي دتنزل بنظرة شماته..ابتسمت بصدمه ع كلامه طخ براسي الي جنت خايفه منه..
ايييييي.. هذا المهتلف ردلجج الصاع صاعين..
الله ذب عليه هدوء رهيب بس عيوني تصب دموع عشرة عشرة..عبالك سجين وانغرس بكلبي..هذا الي جنت خايفه منه هذا الي جنت احسبله حساب..بس وين حسابي راح..ليش امنت بي ..اااخ ربي لييييييش كلمه الليييش اكلت كلبي اكل وهو يحجي ويزيد عليه  كلامه يعذبني احسه بسمار ويدك براسي ..
كسرتج..بنت عمي الزعطوطه ..ثار 5سنين.
تجرات ارد عليه..
وتحجيهه بكل صلافه وحقارة..واني عرضك قبل لا اصير زوجتك ..
احترمي نفسج ولتتجاوزين .
عبالك انت رجال من هيج انتقمت ؟
اجاني راشدي قوي سطرني حسيت اذاني نشلعت ومااسمع شي بس صوت صفارة باذاني..
هاي حته بعد متتجاوزين..
ماتحركت من مكاني..ظليت كاعده ع الجربايه وهو كعد يعدل بنفسه ع المرايه واجتني قوة مجري منين كتله..
تصدك ماصدمتني بتصرفك هذا..
باوعلي من المرايه..
شنو قصدج؟
ماصدكتك ..الجر الناعم والمداراة والتمسكن ..مانخدعت بي ..انت نفسك المهتلف الي وكفتله الزعطوطه ام 15سنه..صح كونت نفسك شهاده ووظيفه وبيت وسيارة بس بعدك تحس بنقص لذلك هيج سويت بعرضك.
كافي بلا لغوه زايده وكومي سوياي عشه..
كمت من الفراش ع حيلي لفيت نفسي بالجرجف وفتحت الكنتور طلعت جنطه ملابسي وبديت احط بيهه ملابسي..
شدتسوين؟
مثل متشوف.
اي لامه ملابسج ووين رايحه؟
عندي بيت ..راجعه لبيت اهلي مالهه داعي ابقه هنا بعد..
ضحك باستهزاء..
اي مو هي بكيفج.
اكيد طبعا بكيفي.
جر الجنطه من ايدي وكعت بالكاع رحت عليهه رجعت الملابس الي وكعت للجنطه وشلتهه وسديتهه ودا البس عبايه اسلاميه فوك ملابسي جرني من شعري صحت اخ اخ شعري ..جرني حيل واباوع وجهه انكلب مو هو حسيت بخوف ورعب من عيونه خوفتني شفت موتي بيهن..
ماكو طلعه من البيت.
اطلع ومو بكيفك.
ضربني راشدي مرة ثانيه وكعت بالكاع ومن الكاع شلت روحي وركضت اريد اطلع من الغرفه وفعلا فتحت الباب وطلعت وركضت لباب المطبخ جانت جنطتي بعدهي بالمطبخ اخذتهه بسرعه وهو طول هذا الوكت يركض ورايه وصلت للباب الخارجي تذكرته مقفول صيحت وصلي همام جرني من شعري وسحلني من زندي بقوة اذاني حيل..
وين ولج وين رايحه؟
هو طول وعرض وصدر عريض قوي واني ضعيفه يمه يعني اي مجهود ديسوي ويايه ميتطلب هواي قوة منه يعني بايد وحده يسحلني من زندي ودفعني بغرفه ثانيه الغرفه الي جانت مسدوده وكال فارغه ومسويهه مخزن مؤقتا شمرني بيهه وقفلهه عليه..
انهاريت بالكاع ظليت ابجي واشهك بصوت عالي وكمت اصيح اريد احد من الجوارين يسمعني ويلحكني بس ماكو ظليت اضرب بالباب الى ان تعبت وسكتت عرفت ماكو فايده لصياحي ولا للبجي ..بطني موتتني من الالم لان مماكله شي اخر شي اكلته قطعتين كيك بالعقد مالتي بس الم بطني ماجان بكد الم كلبي ..جنت احس وجع بكلبي ماكدر اتحمله لو اجرح نفسي من وريدي اهون عليه من هيج شعور يذبحني بالالم ..كسر كلبي ..حبيته وكسر كلبي ..تجاهلت حدسي  وشكي ومخاوفي وحبيته ..كسرني بكل حقارة ..هاي باختصار  ليله زواجي ..التفتت للغرفه بيهه فراش وبطانيه وحده بس بارده  مابيهه تدفئه سبلت ..جنت بعدني بملابس النوم والعبايه الاسلاميه فوكاهن رحت للفراش دفنت وجهي بالمخده وتغطيت ظليت ارجف بارده الدنيا حاولت ادفي نفسي قرفصت ع روحي وسحبت رجليه لبطني ..الم فظيع ..الم جوع..والم كسرتي والم كلبي تجمعن عليه مانشفت دمعتي ..تبللت المخده بدموعي ..باوعت للسكف لرب العالمين كتله يارب خلصني ذبيت حملي عليك ..تعبت ..حيل ..يتيمه اني ..حسبي الله ونعم الوكيل..غفيت من التعب ماحسيت بشي للصبح..
وللحكايه بقيه..