كسرة كلب

البارت 12

#كسرة_كلب
البارت 12
بقلمي روسكان
لبيج قصص روسكان
الصبح من كعدت باوعت للبرده جان اكو ضوه يعني الصبح صاير والشمس طالعه بس ماعرف بيش الساعه ..كمت رحت للباب مال غرفه جانت مقفوله البارحه لان حاولت افتحهه منفتحت بس هسه لا نفتحت ارتاحيت صارعندي امل اشرد من البيت بلكي همام لسه ماكاعد بعدين صفنت البارحه اني نمت وهي مقفوله  اليوم كعدت لكيتهه مفتوحه يعني اكيد كاعد قبلي ..المهم طلعت من الغرفه لكيت همام بوجهي ..درت وجهي ومشيت من يمه رحت للحمام غسلت وجهي اباوع بالمرايه عيوني مورمه وغاطه صغرانه من البجي وخدودي بيهن حمار اثار راشديات البارحه ..غسلت وطلعت ..بدون مقدمات حجه وياي..
امي وابويه راح يجون هسه روحي غيري ملابسج رتبي روحج وحطي شي ع وجهج واي حجايه زايده ناقصه انهيج واحسب الله ماخلقج سمعتي لو لا؟
هاقصدك نمثل عليهم ..الزوجين السعيدين ..وصخام عزه بعينك الي سويته بيه وهذا الاثر الي بوجهي..
رجع تقربلي بسرعه ولزمني من شعري بقوة..
اكص لسانج واشوه وجهج همين اذا تفكرين تحجين شي من الي صار البارحه لاهلي.
دفعني بقوة ردت اوكع بالكاع.
يله ولي من وجهي وسوي الي كتلج عليه.
رحت فتت لغرفه النوم ..باوعت ع الجربايه انهاريت بجي..هنا اخذني ..صح برضاتي بس جان ضاملي دكه ناقصه كولهه سم وحقارة ..هنا كسرني وحطم كل امل حلو رسمته بحياتي..
فتت للحمام سبحت وحضرت دراعيه لونهه شكري البسهه نشفت شعري وشيورته وحطيت مكياج خفيف بس كبرت عيوني بالكحل اديه ترجف ماسيطر احط ايلاينر وكثرت احمر خدود علمود ميبين اثر الراشديات ..لبست وتعطرت ورتبت الغرفه باوعت الساعه جانت ب 10الصبح طلعت بوجهي للمطبخ اشوف شعدنه اسوي ريوك..كالي..
كولشي لاتسوين امي جايبتلنه الريوك ..
جان كاعد بالهول يتفرج تلفزيون واني كعدت ودرت وجهي عنه ماردت اشوفه شويه واندكت الباب خزرني وحذرني احجي شي لاهله وراح يفتح الباب الهم ..دمعت عيوني بس لزمت نفسي..
طبت عمتي رادت تهلهل باوعتلي استحت بس راضتني بابتسامه مثل الي استسمحتني تهلهل بس مرة لان هذا ابنهه الوحيد وتزوج هلهلت ع الخفيف وضحكت شويه بوجهه لان بصراحه خفت من همام لان جان ديراقبني ويراقب رده فعلي وتصرفاتي وحته حركاتي..
صباح الخير يعرسان..
صباح الخير عمه
هلايمه صباح الخير
الف مبروك بعد روح عمتج الله يهنيكم ويسعدكم .
تسلمين عمه.
باستني وبس حضنتني اني ماسيطرت ع دموعي كمت اشهك بحضنهه بصوت عالي..
يمه بنيتي شبيج حبيبه؟
عين ع عمتي وعين ع همام ماكدر احجي شي خايفه منه وخزرني عود اسكتي وراد يلغمط السالفه همام كاللهه..
يمه متاذيه من البارحه..
يايمه غير ع كيفك وياهه
هو بعد هذا الي صار يمه شسوي.
التفتتلي وحضنتني مرة لخ..وتحاجي همام ..
يمه هله هله بزوجتك بعدهي صغيرة وعروس ..داريهه ياحبيبي.
اي يمه صار..
وانتي حنونه لاتبحين كافي شده وتزول..
نصت صوتهه وسالتني..
صار عندج نزيف؟
لاعمه ماصار..
لعد ماكو شي سلامات بس الم بسيط ويروح.
هي تحجي واني شهكتي تعله..
يله حنونه جبتلكم الريوك كافي بجي..
اي عمه سكتت.
راحت عمتي للمطبخ وماردت ابقه وحدي ويه همام لحكتهه للمطبخ وكعدت ترتب السفرة واني اساعدهه وسويت جاي وحطينه الاكل ع الميز طب همام للمطبخ وعينه مني..
يمه لعد ابويه وين؟
عنده شغل حبيب شويه ويجي.
يمه اليوم غداكم يمنه.
لايمه ماكو داعي اصلا راح نروح.
وين؟
صدمني كلامه شو اني ماعندي علم وين نروح..
اي يمه حجزت لاربيل اسبوع عسل.
ضحكت عمتي..
اي يمه بالعافيه الله يسعدكم.
ضليت صافنه ع همام هذا صدوك يحجي.
كعدنه نتريك تلاثتنه..ومن بعدهه عافتنه عمتي وراحت لبيتهه كالت عرسان وخل ياخذون راحتهم ..وهمام فهمهه احنه مسافرين اليوم للاربيل وورة شويه اجانه عمي ابو همام وباركلنه وهم كعد شويه والظاهر عمتي سولفتله ع روحتنه لاربيل لان راسا راح واخذ مفتاح بيت اهلي لان كال اجوي ناس عليه اجروه ونهايه الشهر يوصلني الايجار..وهم ظليت وحدي ويه همام..
مارتاحيت لكعدتي كمت رحت للمطبخ لملمت سفرة الريوك ورجعت كولشي لمكانه ورتبت ونظفت الطباخ ورجعت لغرفه المخزن حطيت راسي ع المخده افكر شلون اشرد وشراح يخلصهه ويه همام زين اذا اشرد وين اروح لبيت اهلي هستوه تاجر واذا رحت لبيت عمي شاكول الهم ..هسه من طلع عمي هم شفت همام قفل الباب الخارجي هي بيهه قفل وزنجيل يزنجل الباب ويطك القفل والمفتاح يظل بجيبه ع طول ..اوووف تعبني التفكير.. اجتني فكرة اتصل ع ضمياء هي الوحيده الي تعرف كولشي ولو سولفتلهه راح تفهمني لان من البدايه تعرف القصه وتعرف من شنو جنت خايفه ..زين مبايلي وين بجنطتي اتذكر شلتهه البارحه من المطبخ من ركضت وطلعت بيهه ..هاا..ظلت الجنطه بالطارمه ومبايلي هم بالطارمه شلون خاف ينباك ..لوخاف احد يدوك عليه وهمام يسمعه وياخذه..
اجه همام ووكف بباب غرفه المخزن..
شنو حضرة جنابج تستنكفين تكعجين وياي بغرفه وحده؟
اني غلست ماجاوبت بس درت وجهي